ໄອຍາການຍີປຸ່ນ ສັ່ງຟ້ອງອາດີດປະທານນິສສັນເພີ່ມ

ສໍານັກຂ່າວຕ່າງປະເທດລາຍງານຈາກນະຄອນໂຕກຽວ ປະເທດຍີ່ປຸ່ນ ເມື່ອວັນທີ່ 11 ມັງກອນ 2019 ວ່າ ສໍານັກງານໄອຍາການກາງນະຄອນໂຕກຽວຍື່ນເລື່ອງຕໍ່ສານແຂວງນະຄອນໂຕກຽວ ເມື່ອວັນສຸກ ເລື່ອງການຟ້ອງຮ້ອງ ທ່ານ ຄາຣລອສ ກອນສ ອາດີດປະທານບໍລິຫານຂອງບໍລິສັດນິສສັນ ມໍເຕີຣ ໜຶ່ງໃນຜູ້ຜະລິດລົດຍົນລາຍໃຫຍ່ຂອງຍີ່ປຸ່ນ ແລະ ລໍາດັບຕົ້ນຂອງໂລກ ເພີ່ມເຕີມຖານເຈດຕະນາປະພຶດບໍ່ຊອບທາງການເງິນດ້ວຍການປົກປິດລາຍໄດ້ໃນຊ່ວງໄລຍະເວລາ 3 ປີ ທີ່ຍັງບໍ່ມີການເປີດເຜີຍວ່າເປັນຊ່ວງລະຫວ່າງເວລາໃດ ໂດຍຂໍ້ຫານີ້ທ່ານເກຣັກ ເຄລລີ ນັກທຸລະກິດຊາວອາເມຣິກາເຊິ່ງໄດ້ຮັບການປ່ອຍໂຕຊົ່ວຄາວໄປກ່ອນໜ້ານີ້ຖືກຟ້ອງຮ່ວມດ້ວຍ


ທັງນີ້ພະນັກງານສອບສວນຈັບກຸມ ທ່ານເຄລລີ ເຊິ່ງຖືເປັນ “ມືຂວາ” ຂອງກອນສ ພ້ອມອາດີດເຈົ້ານາຍເມື່ອວັນທີ່ 19 ພະຈິກ 2018 ໃນຂໍ້ຫາລະເມີດກົດໝາຍການເງິນຍີ່ປຸ່ນ ທີ່ກ່ຽວຂ້ອງກັບການຫລີກລ່ຽງພາສີດ້ວຍການທີ່ ທ່ານແຄລລີ່ ປອມແປງເອກະສານເປີດເຜີຍລາຍໄດ້ຂອງ ທ່ານກອນສ ລະຫວ່າງປີ 2010-2015 ໄວ້ທີ່ 5.000 ລ້ານເຢນ ທັງທີ່ໃນຄວາມເປັນຈິງ ທ່ານກອນສ ໄດ້ຮັບຄ່າຕອບແທນສູງກວ່ານັ້ນ 2 ເທົ່າ ໃນຊ່ວງເວລາດັ່ງກ່າວ ແລະ ຕໍ່ມາ ທ່ານກອນສ ຖືກຟ້ອງເພີ່ມອີກໃນຂໍ້ຫາລະເມີດຕໍ່ໜ້າທີ່ ເຊິ່ງເປັນການຖ່າຍໂອນຄວາມສູນເສຍຈາກການລົງທຶນພາຍນອກທີ່ບໍ່ກ່ຽວຂ້ອງກັບບໍລິສັດເຂົ້າສູ່ຖານຂໍ້ມູນຂອງນິສສັນ ສົ່ງຜົນໃຫ້ບໍລິສັດຕ້ອງເປັນຝ່າຍແກ້ໄຂຄວາມສູນເສຍດັ່ງກ່າວເມື່ອປີ 2008 ຄິດເປັນມູນຄ່າຄວາມເສຍຫາຍປະມານ 1.850 ລ້ານເຢນ


ຂະນະທີ່ທ່ານ ໂມໂຕນາຣິ ອົດສືຣຸ ຫົວໜ້າທີມງານຝ່າຍກົດໝາຍຂອງກອນສ ຢືນຢັນວ່າຈະຍື່ນຄໍາຮ້ອງຂໍປະກັນຕົວລູກຄວາມໃນຄັ້ງນີ້ ແມ່ນຍອມຮັບວ່າ “ມີໂອກາດໜ້ອຍຫຼາຍ” ທີ່ສານຈະອະນຸມັດ ເນື່ອງຈາກຂໍ້ຫາລະເມີດຕໍ່ໜ້າທີ່ຖືເປັນຄວາມຜິດຮ້າຍແຮງຫຼາຍຕາມກົດໝາຍຍີ່ປຸ່ນ ແລະ ທ່ານກອນສ ອາດຈະຍັງຕ້ອງຖືກຄຸມຂັງໃນຄຸກອີກປະມານ 6 ເດືອນ ຈົນກວ່າຈະພິຈາລະນານັດທໍາອິດຈະເລີ່ມຂື້ນເນື່ອງຈາກການສືບສວນຄະດີເມື່ອຕົ້ນອາທິດນີ້ ເປັນການສືບພະຍານນັດທໍາອິດສະເພາະຄະດີປົກປິດລາຍໄດ້ 5.000 ລ້ານເຢນເທົ່ານັ້ນ ເຊິ່ງທ່ານກອນສ ຂື້ນສານດ້ວຍຕົນເອງໃນສະພາບຈ່ອຍຜອມ ແລະ ເມື່ອຍລ້າຢ່າງຊັດເຈນ ແຕ່ກ່າວດ້ວຍນໍ້າສຽງໜັກແໜ້ນວ່າຂໍ້ກ່າວຫາທັງໝົດ “ເປັນການໃສ່ຄວາມ” ແລະ ຢືນຢັນວ່າທ່ານບໍລິຫານງານໃຫ້ກັບນິສສັນດ້ວຍຄວາມຊື່ສັດສຸຈະລິດຕະຫລອດໄລຍະເວລາເກືອບ 2 ທົດສະວັດທີ່ຜ່ານມາ


ໃນເວລາດຽວກັນ ນາງ ແຄໂຣລ ກອນສ ພັນລະຍາຂອງ ທ່ານກອນສ ອອກມາຮຽກຮ້ອງໃຫ້ທາງການຍີ່ປຸ່ນເປີດເຜີຍສະພາບຄວາມເປັນຢູ່ຂອງສາມີໃນເຮືອນຈໍາໃຫ້ຫຼາຍກວ່ານີ້ ໂດຍກ່າວດ້ວຍວ່າກອນສ ເຊິ່ງອາຍຸ 64 ປີ ມີໂລກປະຈໍາຕົວ ແລະ ນັບຕັ້ງແຕ່ຖືກຈັບກຸມບໍ່ມີສະມາຊິກຄອບຄົວຄົນໃດໄດ້ຮັບອະນຸຍາດໃຫ້ເຂົ້າຢ້ຽມ ຍົກເວັ້ນພະນັກງານສອບສວນ ເຈົ້າໜ້າທີ່ຈາກສະຖານເອກອັກຄະລັດຖະທູດຝຣັ່ງ ບຣາຊິວ ແລະ ເລບານອນ ເຊິ່ງເປັນປະເທດທີ່ ທ່ານກອນສ ຖືສັນຊາດຢູ່ ແລະ ທີມທະນາຍຄວາມເທົ່ານັ້ນ.

Be the first to comment

Leave a Reply

Your email address will not be published.


*