ໂປແລນ ຈັບຜູ້ບໍລິຫານ “ຫົວເວີ່ຍ” ອ້າງລັກຂໍ້ມູນ

ສໍານັກຂ່າວຕ່າງປະເທດລາຍງານຈາກປະເທດໂປແລນເມື່ອວັນທີ່ 11 ມັງກອນ 2019 ຕາມທີ່ໜ່ວຍຂ່າວສານສະຫະລັດເຄີຍກ່າວຫາວ່າບໍລິສັດຫົວເວີ່ຍ ເທັກໂນໂລຢີ ຄອສ ຈໍາກັດກ່ຽວໂຍງກັບລັດຖະບານຈີນເພາະອຸປະກອນບາງຢ່າງຂອງຫົວເວີ່ຍນັ້ນຜິດກົດໝາຍເນື່ອງຈາກຖືກນໍາໄປໃຊ້ສໍາລັບການເຮັດໂຈລະກໍາໃຫ້ລັດຖະບານຈີນ ແຕ່ກໍ່ຍັງບໍ່ມີຫຼັກຖານມາເປີດເຜີຍຕໍ່ສາທາລະນະຊົນ ເຊິ່ງທາງຫົວເວີ່ຍກໍ່ຢືນຢັນປະຕິເສດມາຕະຫຼອດ ແຕ່ກະແສວິພາກວິຈານສົ່ງຜົນໃຫ້ຫຼາຍປະເທດຕາເວັນຕົກຕ້ອງກວດສອບວ່າເຫດໃດຈຶ່ງອະນຸຍາດໃຫ້ນໍາອຸປະກອນຂອງຫົວເວີ່ຍເຂົ້າມາໃຊ້ໃນເຄືອຂ່າຍໂທລະຄົມ ສ້າງສໍາພັນທີ່ແຕກລ້າວໃຫ້ກັບລັດຖະບານຈີນ

ໂທລະພາບທີວີພີຂອງໂປແລນລາຍງານວ່າ ເຈົ້າໜ້າທີ່ຝ່າຍຄວາມໝັ້ນຄົງຂອງໂປແລນໄດ້ເຂົ້າກວດຄົ້ນສໍານັກງານທ້ອງຖິ່ນຂອງຫົວເວີ່ຍ ແລະ ສໍານັກງານບໍລິສັດເຄືອຂ່າຍໂທລະຄົມ ອໍເຣນ ໂປລສກາ ເຊິ່ງມີບຸກຄົນສັນຊາດໂປແລນເຮັດວຽກນຳ ສ່ວນຜູ້ທີ່ຖືກຈັບກຸມນັ້ນ ຈາກການເປີດເຜີຍຂອງ ທ່ານ ມາໄຊຈ ວາສິດ ຮອງຫົວໜ້າຝ່າຍປະຕິບັດການພິເສດຂອງໂປແລນລະບຸພຽງວ່າ ເປັນຊາຍຊາວໂປແລນ 1 ຄົນເຊິ່ງຖືກກ່າວຫາວ່າເຮັດໂຈລະກໍາຮ່ວມກັບຊາຍຊາວຈີນ ເຊິ່ງເປັນນັກທຸລະກິດທີ່ເຂົ້າມາເຮັດວຽກດ້ານສື່ສານໂທລະຄົມໃນລະດັບຜູ້ບໍລິຫານເລື່ອງນີ້ ທາງການໂປແລນໄດ້ຕິດຕາມມາໄລຍະໜຶ່ງແລ້ວ ແລະ ຈະເຮັດການສືບສວນດ້ວຍຄວາມລະມັດລະວັງຢ່າງຍິ່ງ ໂດຍບຸກຄົນທັງສອງຖືກຈັບກຸມເມື່ອວັນອັງຄານທີ່ຜ່ານມາ ໂດຍສົງໄສວ່າເຮັດວຽກໃຫ້ກັບທາງການຈີນ ແລະ ສ້າງຄວາມເສຍຫາຍໃຫ້ກັບທາງການໂປແລນ

ຕໍ່ມາກະຊວງການຕ່າງປະເທດຂອງຈີນຖະແຫຼງວ່າ ລັດຖະບານຈີນມີຄວາມກັງວົນຢ່າງຍິ່ງທີ່ບຸກຄົນສັນຊາດຈີນຖືກຈັບກຸມໃນປະເທດໂປແລນ ສ່ວນບໍລິສັດຫົວເວີ່ຍຖະແຫຼງວ່າ ບໍລິສັດຮັບຮູ້ສະຖານະການທີ່ເກີດຂື້ນແລ້ວ ແລະ ກໍາລັງຕິດຕາມເລື່ອງນີ້ຢູ່ ແຕ່ຍັງບໍ່ສາມາດໃຫ້ຄວາມເຫັນຫຍັງໄດ້ໃນຂະນະນີ້

 

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *