ຣັດເຊຍ ຫຼຸດອັດຕາສ່ວນການຖືຄອງເງິນໂດລາ ຄັ້ງໃຫ່ຍ ໂດຍກຽມຫັນໄປລົງທຶນໃນເງິນສະກຸນຢູໂຣ ຢວນ ແລະ ເງິນເຢນ ແທນ

ສໍານັກຂ່າວບລູມເບິຣກລາຍງານໃນວັນທີ 10 ມັງກອນ 2019 ວ່າ ທະນາຄານກາງຣັດເຊຍໄດ້ເທຂາຍສະກຸນເງິນໂດລາຈໍານວນ 101.000 ລ້ານໂດລາສະຫະລັດ ອອກຈາກກອງທຶນສໍາຮອງຂອງປະເທດ ໂດຍກຽມຫັນໄປລົງທຶນໃນເງິນສະກຸນຢູໂຣ ຢວນ ແລະ ເງິນເຢນ ແທນ


ການທະຍອຍເທຂາຍໃນຄັ້ງນີ້ມີຂື້ນຕັ້ງແຕ່ຊ່ວງລະດູໃບໄມ້ປົ່ງທີ່ຜ່ານມາ ເຊິ່ງເປັນຊ່ວງດຽວກັບທີ່ສະຫະລັດດໍາເນີນມາດຕະການຂວໍ້າບາດຣັດເຊຍຮອບໃໝ່

ດ້ານສື່ຂອງຣັດເຊຍໄດ້ເປີດເຜີຍລາຍງານຂອງທະນາຄານກາງສະຫະລັດລະບຸວ່າ ອັດຕາສ່ວນສ່ວນທຶນສໍາຮອງລະຫວ່າງປະເທດທີ່ເປັນເງິນສະກຸນໂດລາໃນພອຣດຂອງທະນາຄານກາງຣັດເຊຍນັ້ນຫຼຸດລົງໄປຢ່າງຫຼວຫຼາຍໃນເວລາພຽງສາມເດືອນ ລະຫວ່າງເດືອນມີນາ-ເດືອນມິຖຸນາ 2018 ຈາກເດີມທີ່ທະນາຄານກາງຣັດເຊຍຖືຄອງເງິນສະກຸນໂດລາໃນພອຣດສູງເຖິງ 43,7% ຫຼຸດລົງເຫຼືອ 21,9%


ຂະນະທີ່ເງິນທືນສໍາຮອງລະຫວ່າງປະເທດຂອງຣັດເຊຍຖືກແບ່ງເປັນອັດຕາສ່ວນໃໝ່ທີ່ມີເງິນສະກຸນຢູໂຣເປັນຫຼັກທີ່ 32% ເງິນຢວນຂອງຈີນເພີ່ມຂື້ນເປັນ 14,7% ພອຣດການລົງທືນໃນເງິນຕຣາຕ່າງປະເທດລວມແລ້ວອີກ 14,7% ໂດຍຈໍານວນນີ້ແບ່ງເປັນເງິນປອນສະເຕີຣລິງ 6,3% ເງິນເຢນ 4,5% ເງິນໂດລາແຄນາດາ 2,3% ແລະ ເງິນໂດລາອອສເຕຣເລຍ 1%
ນອກຈາກນີ້ສິນຊັບລວມຂອງທະນາຄານກາງຣັດເຊຍ ທີ່ເປັນທຶນສໍາຮອງຂອງປະເທດໃນຮູບສະກຸນເງິນຕຣາຕ່າງປະເທດ ແລະ ທອງຄໍາເພີ່ມຂື້ນ 40,4 ພັນລ້ານໂດລາຈາກເດືອນກໍລະກົດ 2017 ເຖິງເດືອນມິຖຸນາ 2018 ແຕະລະດັບ 458.100 ລ້ານໂດລາ


ທະນາຄານກາງຂອງຣັດເຊຍເລີ່ມເທຂາຍພັນທະບັດສະຫະລັດຢ່າງໜັກໃນຊ່ວງເດືອນເມສາ ແລະ ພຶດສະພາປີທີ່ຜ່ານມາ ຊະນິດທີ່ບໍ່ເຄີຍມີມາກ່ອນທ່າມກາງຄວາມເຄັ່ງຕຶງທີ່ເພີ່ມຂື້ນລະຫວ່າງສະຫະລັດອາເມຣິກາ ແລະ ຣັດເຊຍ ໂດຍພົບວ່າການເທຂາຍຄັ້ງໃຫຍ່ສຸດເກີດຂື້ນໃນຊ່ວງລະດູໃບໄມ້ປົ່ງປີຜ່ານມາ ຕີເປັນມູນຄ່າມະຫາສານເຖິງ 81 ພັນລ້ານໂດລາ ເຊິ່ງຂະນະນັ້ນຢູ່ໃນຊ່ວງທີ່ທາງການສະຫະລັດຂວໍ້າບາດນັກທຸລະກິດຣັດເຊຍ ບໍລິສັດ ແລະ ເຈົ້າໜ້າທີ່ການທູດຊອງຣັດເຊຍໃນສະຫະລັດອາເມຣິກາພໍດີ


ທາງທໍານຽບເຄຣມລິນ ລະບຸວ່າ ມາຈາກການຂວໍ້າບາດຂອງສະຫະລັດນັ້ນເປັນແຮງກົດດັນທີ່ບີບໃຫ້ຣັດເຊຍຕ້ອງຫາເງິນສະກຸນອື່ນເປັນທາງເລືອກເພື່ອຮອງຮັບຄວາມປອດໄພທາງເສດຖະກິດຂອງປະເທດ

ທ່າທີດັ່ງກ່າວຂອງຣັດເຊຍນັ້ນສອດຄ້ອງກັບຄໍາກ່າວຂອງ ປະທານາທິບໍດີປູຕິນທີ່ເຄີຍກ່າວເມື່ອເດືອນພະຈິກວ່າ “ເຮົາບໍ່ເຄີຍຄິດຖິ້ມເງິນໂດລາ ແຕ່ເງິນໂດລາກໍາລັງຖິ້ມພວກເຮົາ”
“ຄວາມບໍ່ແນ່ນອນຂອງການຊໍາລະໜີ້ດ້ວຍເງິນໂດລາຄືການສ້າງຄວາມປາຖາໜາໃຫ້ປະເທດອື່ນໆເທິງໂລກທີ່ເສດຖະກິດກໍາລັງເຕີບໂຕ ຕ່າງຄົ້ນຫາສະກຸນເງິນສໍາຮອງ ແລະ ສ້າງລະບົບການຊໍາລະເງິນທີ່ເປັນອິດສະຫຼະຈາກເງິນໂດລາ ຂ້າພະເຈົ້າເຊື່ອວ່າເຮົາບໍ່ໄດ້ເປັນຄົນດຽວທີ່ເຮັດສິ່ງນີ້”ປະທານາທິບໍດີປູຕິນ ກ່າວ


ທັງນີ້ ທຶນສໍາຮອງຂອງຣັດເຊຍນັ້ນເປັນໜຶ່ງໃນທຶນສໍາຮອງທີ່ໃຫຍ່ທີ່ສຸດເປັນອັນດັບ 6 ຂອງໂລກ ດ້ວຍມູນຄ່າສຸດທິກວ່າ 459.000 ລ້ານໂດລາ ຈາກຂໍ້ມູນເດືອນມິຖຸນາ 2018 ໂດຍຈໍານວນນີ້ລວມເຖິງການຖືພັນທະບັດຕ່າງປະເທດ ການລົງທຶນຂອງລັດຖະບານ ແລະ ຄໍາ.

Be the first to comment

Leave a Reply

Your email address will not be published.


*