ມອບບັດລັດຖະກອນ ໃຫ້ກະຊວງ ອຄ 400 ກວ່າທ່ານ

ພະນັກງານລັດຖະກອນສັງກັດຢູ່ໃນ ກະຊວງອຸດສາຫະກຳ ແລະ ການຄ້າຈຳນວນ 440 ທ່ານ ໄດ້ຮັບບັດລັດຖະກອນແລ້ວ.
ພິທີມອບບັດພະນັກງານ – ລັດຖະກອນໃຫ້ກະຊວງອຸດສາຫະກຳ ແລະ ການຄ້າ ( ອຄ ) ຈັດຂຶ້ນໃນຕອນເຊົ້າຂອງວັນທີ 9 ມັງກອນ 2019 ທີ່ກະຊວງ ອຄ ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ສຸວັນນີ ລັດຕະນະວົງ ຫົວໜ້າກົມຄຸ້ມຄອງລັດຖະກອນ, ກະຊວງພາຍໃນ; ທ່ານ ພັນທອງ ພິດທຸມມາ ຮອງລັດຖະມົນຕີກະຊວງ ອຄ, ມີຫົວໜ້າກົມ – ຮອງຫົວໜ້າກົມ, ພະແນກ ແລະ ພະນັກງານຂອງກະຊວງເຂົ້າຮ່ວມ.


ທ່ານ ສຸວັນນີ ລັດຕະນະວົງ ກ່າວວ່າ: ການອອກບັດພະນັກງານ – ລັດຖະກອນ ເປັນວຽກໜຶ່ງທີ່ສຳຄັນເພື່ອເປັນການຢັ້ງຢືນ ແລະ ກວດກາບັນຊີຈໍານວນພະນັກງານລັດຖະກອນ, ທັງເປັນການປັບປຸງຂໍ້ມູນປະຫວັດລັດຖະກອນໃຫ້ຖືກຕ້ອງ, ສອດຄ່ອງກັບລະບຽບການ, ຫັນການຄຸ້ມຄອງພະນັກງານ – ລັດຖະກອນຕາມກົດໝາຍ, ລະບຽບການ ແລະ ທັນສະໄໝ, ເຮັດໃຫ້ການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍຕ່າງໆຖືກຕ້ອງຕາມຕົວຈິງ ແລະ ເພື່ອເປັນບ່ອນອີງໃຫ້ແກ່ກົມຈັດຕັ້ງ ແລະ ພະນັກງານ ກະຊວງ ອຄ, ກະຊວງພາຍໃນ ແລະ ການຈັດຕັ້ງທີ່ກ່ຽວຂ້ອງມີຄວາມສະດວກ ແລະ ມີຄວາມເປັນເອກະພາບໃນການຈັດຕັ້ງປະຕິບັດຕົວຈິງ.


ປັດຈຸບັນ, ພະນັກງານ – ລັດຖະກອນທົ່ວຂະແໜງອຸດສາຫະກຳ ແລະ ການຄ້າ ມີທັງໝົດ 2.716 ທ່ານ ຍິງ 813 ທ່ານ, ສັງກັດກະຊວງ ມີຈຳນວນ 440 ທ່ານ ຍິງ 197 ທ່ານ ເຊິ່ງໄດ້ຮັບບັດ 440 ທ່ານ ( ສະເພາະພະນັກງານ – ລັດຖະກອນສັງກັດກະຊວງ ) ແລະ ມີຈໍານວນໜຶ່ງທີ່ຍັງບໍ່ໄດ້ຮັບ ເນື່ອງຈາກພະນັກງານຈຳນວນໜຶ່ງກຳລັງໄປປະຈຳການ, ຮຽນຕໍ່ຢູ່ຕ່າງປະເທດ, ຈຳນວນໜຶ່ງຂໍ້ມູນສ່ວນຕົວບໍ່ສອດຄ່ອງກັບປະຫວັດລັດຖະກອນ ແລະ ນີ້ກໍແມ່ນເປັນບາດກ້າວໜຶ່ງຂອງການກວດກາຄືນຂໍ້ມູນພະນັກງານ – ລັດຖະກອນ ແລະ ເຫັນໄດ້ຄືດັ່ງກ່າວ ຕໍ່ໄປນີ້ຜູ້ທີ່ຍັງບໍ່ທັນໄດ້ຮັບບັດພວກເຮົາກໍຈະໄດ້ສືບຕໍ່ກວດຄືນ ແລະ ປະສານກັບຄະນະຮັບຜິດຊອບ ເປັນຕົ້ນແມ່ນກະຊວງພາຍໃນ ເພື່ອໃຫ້ພະນັກງານຂອງພວກເຮົາທີ່ມີສິດໄດ້ຮັບບັດຢ່າງຄົບຖ້ວນ.


ທັງນີ້, ບັດພະນັກງານ – ລັດຖະກອນ ຈະເປັນທັງບັດເອທີເອັມ ( ATM ), ບັດປະກັນສັງຄົມ ແລະ ປະຫວັດຂໍ້ມູນລັດຖະກອນຂອງຜູ້ຖືບັດຮວມຢູ່ໃນບັດດຽວ.

Be the first to comment

Leave a Reply

Your email address will not be published.


*