ຈີນ ຍ້າຍທີ່ຕັ້ງຂີປະນາວຸດ “ພິຄາດເຮືອ” ຫຼັງສະຫະລັດເຄື່ອນໄຫວ ຢົ່ວຢຸໃນທະເລຈີນໃຕ້ຫລາຍຄັ້ງ

ສື່ທາງການຈີນລາຍງານເມື່ອວັນທີ 9 ມັງກອນ 2019 ວ່າການເຄື່ອນຍ້າຍຈຸດປະຈໍາການຂອງຂີປະນາວຸດນໍາວິຖີຕໍ່ຕ້ານເຮືອຮົບຂອງຕົນ ພາຍຫຼັງເຮືອພິຄາດສະຫະລັດແລ່ນໃກ້ໝູ່ເກາະພາຣາເຊລເພື່ອ “ສໍາແດງເສລີພາບໃນການເດີນເຮືອ”

ຂີປະນາວຸດນໍາວິຖີພິໄສໄກຮຸ່ນໃໝ່ຂອງຈີນ ໄດ້ຖືກເຄື່ອນຍ້າຍໄປຍັງເຂດທີ່ຮາບສູງ ແລະ ທະເລຊາຍທາງຕາເວັນຕົກສຽງເໜືອຂອງປະເທດ ຫຼັງຈາກສະຫະລັດທະຍອຍສົ່ງເຮືອຮົບແລ່ນເຂົ້າໄປໃກ້ເກາະຕ່າງໆ ເຊິ່ງຈີນຄອບຄອງຢູ່ໃນທະເລຈີນໃຕ້


ໂກລບອລທາມສ (Global Times) ໜັງສືພິມແທບລອຍທີ່ເປັນກິດຈະການໃນເຄືອຂອງເຫຣິນຣືເປົ້າ (People’s Daily) ກະບອກສຽງຢ່າງເປັນທາງການຂອງພັກຄອມມູນິດຈີນ ໄດ້ສະເໜີຂ່າວການເຄື່ອນຍ້າຍຂີປະນາວຸດໄປປະຈໍາການໃນພື້ນທີ່ໃໝ່ຂອງຂີປະນາວຸດຕໍ່ສູ້ເຮືອແບບ ດີເອຟ -26 (DF-26 anti-ship missiles)  ຈີນອວດວ່າ ດີເອຟ-26 ເຊິ່ງໄດ້ຮັບສາຍາວ່າ ຂີປະນາວຸດ “ຜູ້ພິຄາດເຮືອ” (“ship-killer” missile) ມີຄວາມສາມາດທີ່ຈະຍິງໄປໄດ້ໄກກວ່າ 4.000 ກມ


ກ່ອນທີ່ຝ່າຍຈີນຈະເຜີຍແຜ່ຂ່າວເລື່ອງການປ່ຽນທີ່ຕັ້ງປະຈໍາການຂອງ ຂີປະນາວຸດ ດີເອຟ-26 ນັ້ນ USS McCampbell ເຮືອພິຄາດຕິດຂີປະນາວຸດນໍາວິຖີຂອງສະຫະລັດ ກາຍເປັນເຮືອຮົບນາວີອາເມຣິກາລໍາລ່າສຸດ ທີ່ຖືກສົ່ງອອກມາປະຕິບັດການແລ່ນໃກ້ໝູ່ເກາະພາຣາເຊລ (Paracel islands) ເຊິ່ງຢູ່ໃນທະເລຈີນໃຕ້ ໂດຍທີ່ຈີນອ້າງສິດ ແລະ ເຂົ້າຄວບຄຸມໝູ່ເກາະແຫ່ງນີ້ຢູ່ໃນເວລານີ້


ທ່ານ ລູ່ ຄັງ (Lu Kang) ໂຄສົກກະຊວງການຕ່າງປະເທດຈີນຖະແຫຼງວ່າ ການເຄື່ອນເຮືອຮົບໃນລັກສະນະເຊັ່ນນີ້ຖືວ່າເປັນການລະເມີດກົດໝາຍລະຫວ່າງປະເທດ ພ້ອມຍັງບອກໃຫ້ສະຫະລັດ ຢຸດຕິການກະທໍາທີ່ຢົ່ວຢຸໃນທັນທີ ຂະນະຜູ້ເຮັດໜ້າທີ່ເປັນໂຄສົກໃຫ້ແກ່ກອງເຮືອພາກພື້ນປາຊິຟິກ (Pacific Fleet) ຂອງກອງທັບເຮືອອາເມຣິກາ ກ່າວວ່າ ການປະຕິບັດການນີ້ເປັນສ່ວນໜຶ່ງຂອງຄວາມພະຍາຍາມ “ເຊິ່ງມຸ່ງທ້າທາຍການກ່າວອ້າງກໍາມະສິດທາງທະເລຢ່າງເກີນເລີຍ”


ຕາມຄວາມເຫັນຂອງຜູ້ຊ່ຽວຊານທາງການທະຫານທີ່ຢູ່ໃນປັກກິ່ງລາຍໜຶ່ງເຊິ່ງໄດ້ກ່າວກັບໂກລບອລທາມສ ວ່າຂີປະນາວຸດເຄື່ອນທີ່ເມື່ອຍິງອອກຈາກບໍລິເວນເຊິ່ງຢູ່ເລິກເຂົ້າໄປໃນຕອນໃນຂອງປະເທດຈີນ ຈະຍາກລໍາບາກແກ່ການສະກັດກັ້ນຍິ່ງກວ່າການໂຈມຕີທີ່ຍິງຈາກບໍລິເວນໃກ້ໆ ນ່ານນໍ້າ

ລາຍງານຂ່າວເລື່ອງ ດີເອຟ-26 ຂອງສະຖານີໂທລະທັດສ່ວນກາງຂອງຈີນມີຄລິບວິດີໂອປະກອບຂ່າວ ເຊິ່ງຊີຊີທີວີລະບຸວ່າ ນີ້ເປັນການປາກົດຕົວຕໍ່ໜ້າສາທາລະນະຊົນຄັ້ງທໍາອິດຂອງອາວຸດແບບນີ້ ນັບຕັ້ງແຕ່ທີ່ຖືກນໍາເຂົ້າປະຈໍາການໃນກອງທັບປົດປ່ອຍປະຊາຊົນຈີນ.

Be the first to comment

Leave a Reply

Your email address will not be published.


*