ຄະນະກຳມະການຄຸ້ມຄອງອິນເຕີເນັດ ແຫ່ງຊາດສະຫລຸບວຽກງານ ປີ 2018 ແລະ ວາງທິດທາງແຜນການໃນປີ 2019

ຂປລ. ໃນວັນທີ 11 ມັງກອນ 2019 ຄະນະກຳມະການຄຸ້ມຄອງອິນເຕີເນັດແຫ່ງຊາດ (ຄຄ ອຊ) ໄດ້ຈັດກອງປະຊຸມສະຫລຸບວຽກງານການເຄື່ອນໄຫວປະຈຳ ປີ 2018 ແລະ ວາງທິດທາງປະຈໍາປີ 2019 ຂຶ້ນ, ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານ ຄະນະກຳມະການຄຸ້ມຄອງອິນເຕີເນັດແຫ່ງຊາດ, ມີຜູ້ຕາງໜ້າຈາກບັນດາກະຊວງ ອ້ອມຂ້າງສູນກາງ ແລະ ຄະນະກໍາມະການ ຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ບຸນສະເຫລີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີໂທລະຄົມ ມະນາຄົມ ແລະ ການສືສານ, ຮອງປະທານຄະນະກໍາມະການຄຸ້ມຄອງອິນເຕີເນັດແຫ່ງຊາດ ໄດ້ລາຍງານໃຫ້ຮູ້ວ່າ: ໃນໄລຍະໜຶ່ງປີຜ່ານມາ, ຄະນະກໍາມະການຄຸ້ມຄອງອິນເຕີເນັດແຫ່ງຊາດ ໄດ້ເຄື່ອນໄຫວວຽກງານການຄຸ້ມຄອງອິນເຕີເນັດ ໃນສປປ ລາວ ຢ່າງເອົາຈິງເອົາຈັງ, ເຊິ່ງເປັນປີທີ່ມີຫລາຍເຫດການເກີດຂຶ້ນ, ໂດຍສະເພາະແມ່ນຂ່າວຕ່າງໆ ກ່ຽວກັບເຫດການໄພພິບັດທີ່ເກີດຂຶ້ນໃນທົ່ວປະເທດ ແລະ ບັນດາຂ່າວທີ່ບໍ່ເປັນຄວາມຈິງອື່ນໆ ທີ່ຖືກກຸ່ມຄົນບໍ່ດີປ່ອຍອອກມາ ເພື່ອຫວັງສ້າງຄວາມແຕກຕື່ນໃຫ້ປະຊາຊົນໃນສັງຄົມທົ່ວປະເທດ. ສິ່ງເຫລົ່ານັ້ນ, ໄດ້ເຮັດໃຫ້ເຫັນເຖິງຄວາມສໍາຄັນໃນການຄຸ້ມຄອງອິນເຕີເນັດ, ເວົ້າສະເພາະກໍ່ແມ່ນສື່ສັງຄົມອອນລາຍ. ຄະນະກຳມະການຄຸ້ມຄອງອິນເຕີເນັດແຫ່ງຊາດ ໄດ້ຊີ້ນຳຂະແໜງ ການກ່ຽວຂ້ອງ ເອົາໃຈໃສ່ແກ້ໄຂບັນດາດ້ວຍຮູບການຕ່າງໆ ຢ່າງມີປະສິດທິພາບ, ເປັນຕົ້ນແມ່ນ ການສ້າງ ແລະ ນຳໃຊ້ບັນດານິຕິກຳ ທີ່ກ່ຽວຂ້ອງກັບການຄຸ້ມຄອງອິນເຕີເນັດ, ໂດຍສະເພາະ ກົດໝາຍວ່າດ້ວຍການຕ້ານ ແລະ ສະກັດກັ້ນອາດຊະຍາກໍາທາງຄອມພິວເຕີ, ແລະ ດຳລັດວ່າດ້ວຍການຄຸ້ມຄອງຂໍ້ມູນຂ່າວສານຜ່ານອິນຕີເນັດ, ທີ່ຖືເປັນປາຍມີອັນແຫລມຄົມ ແລະ ຖືກນຳໃຊ້ເປັນບ່ອນອີງໃນການຈັດ ຕັ້ງປະຕິບັດວຽກງານຄວບຄຸມ ແລະ ຈຳກັດ ການນຳໃຊ້ສື່ສັງຄົມອອນລາຍໄປໃນທາງທີ່ຜິດ.


ວຽກງານທີ່ພົ້ນເດັ່ນ ທີ່ຄະນະກຳມະການຄຸ້ມຄອງອິນເຕີເນັດແຫ່ງຊາດ ໄດ້ຈັດຕັ້ງປະຕິບັດຕະຫລອດ 1 ປີ ທີ່ຜ່ານມາ ລວມມີ ວຽກງານການສ້າງ ແລະ ເຜີຍແຜ່ນຳໃຊ້ບັນດານິຕິກໍາຕ່າງໆ ທີ່ກ່ຽວຂ້ອງກັບການຄຸ້ມຄອງອິນເຕີເນັດ, ໂດຍສະເພາະແມ່ນກົດໝາຍວ່າດ້ວຍລາຍເຊັນເອເລັກໂຕຣນິກ, ທີ່ໄດ້ຜ່ານໃນກອງປະຊຸມສະພາແຫ່ງຊາດ ຄັ້ງທີ່ຜ່ານມາ ແລະ ປັດຈຸບັນ ຄະນະຮັບຜິດຊອບກໍ່ສຳເລັດການປັບປຸງ ເພື່ອສະເໜີອອກກົດໝາຍຕາມຂັ້ນຕອນ. ນອກນີ້, ກໍ່ຍັງມີວຽກງານການເຜີຍແຜ່ຕອບຕ້ານ ແລະ ຕິດຕາມກວດກາ ບັນຫາງສຽງທີ່ບໍ່ດີໃນສັງຄົມ ໂດຍສະເພາະແມ່ນຜ່ານຊ່ອງທາງສື່ສັງຄົມອອນລາຍ, ເຊິ່ງໃນນີ້ບັນດາກະຊວງ ແລະ ຂະແໜງການທີ່ກ່ຽວຂ້ອງ, ເປັນຕົ້ນ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ, ແລະ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກໍ່ໄດ້ເຄື່ອນໄຫວປູກຈິດສຳນຶກໃຫ້ແກ່ພະນັກງານ ແລະ ສັງຄົມ, ໄດ້ມີການລົງໂຄສະນາເຜີຍແຜ່ຜົນດີຜົນຮ້າຍຂອງການນຳໃຊ້ ສື່ສັງຄົມອອນລາຍ ຢູ່ໂຮງຮຽນມັດທະຍົມ, ມະຫາວິທະຍາໄລຕ່າງໆ ຮ່ວມມືກັນລະຫວ່າງ ກະຊວງ ປທສ, ກະຊວງ ສຶກສາທິການ ແລະ ກິລາ, ແລະ ສູນກາງຊາວໜຸ່ມ. ວຽກງານເຕັກນິກທີ່ຕິດພັນກັບການປ້ອງກັນຊາດ-ປ້ອງກັນຄວາມສະຫງົບ, ວຽກງານກວດກາການນໍາໃຊ້ຄື້ນຄວາມຖີ່ ແລະ ສັນຍານອິນເຕີເນັດທີ່ບໍ່ຖືກລະບຽບ, ວຽກງານການຂຶ້ນທະບຽນຊິມຄາດ ແລະ ວຽກງານການຄຸ້ມຄອງລັດຖະບານເອເລັກໂຕຣນິກ ທີ່ຈະອໍານວຍຄວາມສະດວກໃຫ້ແກ່ການເຮັດວຽກ, ເກັບ ກໍາຂໍ້ມູນ ແລະ ການຕິດຕໍ່ສື່ສານພາຍໃນກົງຈັກລັດ ໃຫ້ມີປະສິດທິພາບ ແລະ ປະສິດທິຜົນກວ່າເກົ່າ.

ສຳລັບທິດທາງແຜນການໃນຕໍ່ໜ້າ, ຄະນະກໍາມະການຄຸ້ມຄອງອິນເຕີເນັດແຫ່ງຊາດ ຈະສືບຕໍ່ສ້າງນິຕິກຳ ດຳລັດລຸ່ມກົດໝາຍ ກ່ຽວກັບວຽກງານເຕັກໂນໂລຊີການສື່ສານຂໍ້ມູນຂ່າວສານ ທີ່ຍັງເປັນຊ່ອງວ່າງ, ໂດຍສະເພາະນິຕິກຳຄຸ້ມຄອງສື່ສັງຄົມອອນລາຍ, ການຄ້າຂາຍອອນລາຍ ແລະ ອື່ນໆ. ພ້ອມທັງ ສືບຕໍ່ການສ້າງນິຕິກໍາ ສຳລັບການຄຸ້ມຄອງອິນເຕີເນັດ ແລະ ເອກະສານເອເລັກໂຕຣນິກ ໃຫ້ຄົບຖ້ວນສົບບູນກວ່າເກົ່າ ເປັນຕົ້ນແມ່ນ ການສ້າງນິຕິກໍາທີ່ກ່ຽວຂ້ອງກັບການບໍລິຫານລັດດ້ວຍເອເລັກໂຕຣນິກ. ສືບຕໍ່ຊຸກຍູ້ສົ່ງເສີມ ແລະ ຜັກດັນວຽກງານສ້າງຈິດສຳນຶກ, ການເຜີຍແຜ່ຕອບຕ້ານ, ກວດ ກາຕິດຕາມຫາງສຽງສັງຄົມຜ່ານສື່ຕ່າງໆ ໂດຍສະເພາະສື່ສັງຄົມອອນລາຍ. ສືບຕໍ່ວຽກງານການເຄື່ອນ ໄຫວຖອດຖອນບົດຮຽນ ແລະ ກໍ່ສ້າງບຸກຄະລາກອນ ໃຫ້ມີຄວາມສາມາດສູງຂຶ້ນ ໃນວຽກງານການຄຸ້ມຄອງອິນເຕີເນັດ. ສືບຕໍ່ຊຸກຍູ້ຜັກດັນໃຫ້ວຽກງານເຕັກນິກ ທີ່ຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຜົນສຳເລັດ ແລະ ປະກົດຜົນເປັນຈິງ. ພ້ອມດຽວກັນນັ້ນ, ບັນດາຂະແໜງການກ່ຽວຂ້ອງ ກໍ່ໄດ້ສະຫລຸບລາຍງານ ຜົນສຳເລັດ, ບັນດາສິ່ງທ້າທາຍ, ຂໍ້ຄົງຄ້າງ ແລະ ແຜນການໃນຕໍ່ໜ້າຂອງຂະແໜງການຕົນ ເພື່ອເຮັດໃຫ້ວຽກງານການຄຸ້ມຄອງອິນເຕີເນັດ ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.

ໃນກອງປະຊຸມ ຍັງໄດ້ເຜີຍແຜ່ດຳລັດວ່າດ້ວຍການຈັດຕັ້ງ ແລະ ເຄື່ອນໄຫວຂອງຄະນະກຳມະ ການຄຸ້ມຄອງອິນເຕີເນັດແຫ່ງຊາດ ສະບັບເລກທີ 559/ນຍ, ລົງວັນທີ 31 ທັນວາ 2018, ທີ່ເປັນບ່ອນອີງທີ່ສຳຄັນໃຫ້ຄະນະ ຄຄອຊ ໃນການຈັດຕັ້ງປະຕິບັດວຽກງານຕາມຈຸດປະສົງ, ພາລະບົດບາດ, ສິດ ແລະ ໜ້າທີ່ ທີ່ລະບຸໄວ້. ພ້ອມນີ້, ກໍ່ໄດ້ຜ່ານຮ່າງດໍາລັດ ວ່າດ້ວຍລະບົບສາຍສົ່ງໂທລະຄົມ ມະນາຄົມ ເພື່ອປັບປຸງ ແລະ ແກ້ໄຂຂໍ້ຫຍຸ້ງຍາກ ຂອງວຽກງານການຄຸ້ມຄອງໂຄງລ່າງພື້ນຖານລະບົບສາຍສົ່ງໂທລະຄົມມະນາຄົມ ແລະ ອິນເຕີເນັດໃຫ້ດີຂຶ້ນກວ່າເກົ່າ, ເຊິ່ງກອງປະຊຸມ ຄະນະກຳມະການຄຸ້ມຄອງອິນເຕີເນັດແຫ່ງຊາດ ໄດ້ເຫັນດີ ດ້ານເນື້ອໃນ ແລະ ປະຕິບັດຕາມຂັ້ນຕອນສ້າງນິຕິກໍາ ເພື່ອສະເໜີ ເຂົ້າຫາລັດຖະບານ ໃນປີ 2019 ນີ້.

Be the first to comment

Leave a Reply

Your email address will not be published.


*