ເອກອັກຄະລັດຖະທູດຈີນ ວິຈານແຄນາດາ “ສອງມາດຕະຖານ”

ສໍານັກຂ່າວຕ່າງປະເທດລາຍງານຈາກນະຄອນອອດຕາວາ ປະເທດແຄນາດາ ເມື່ອວັນທີ່ 10 ມັງກອນ 2019 ວ່າ “ເດິ ຮິລ ທາມສ” ເຊິ່ງເປັນໜັງສືພິມຂອງແຄນາດາ ຕີພິມບົດຄວາມຕ່າງຄວາມເຫັນຕໍ່ບົດບັນນາທິການລົງໃນສະບັບວັນພຸດທີ່ຜ່ານມາ ຂຽນໂດຍທ່ານ ລູ່ ຊາເຢ່ ເອກອັກຄະລັດຖະທູດຈີນປະຈໍານະຄອນອອດຕາວາ ມີເນື້ອໃນສໍາຄັນຄືການວິຈານລັດຖະບານແຄນາດາເຊິ່ງຈັບກຸມ ນາງ ເມິ່ງ ຫວ່ານໂຈວ ຜູ້ບໍລິຫານລະດັບສູງຂອງບໍລິສັດຫົວເວີ່ຍ ແລະ ທ່ານຍັງເປັນບຸດສາວຂອງຜູ້ກໍ່ຕັ້ງບໍລິສັດ ເມື່ອວັນທີ່ 1 ທັນວາປີຜ່ານມາ ແມ່ນວ່ານາງ ເມິ່ງ ໄດ້ຮັບການປະກັນໂຕ ແຕ່ທ່ານຍັງຕ້ອງຂື້ນສານທີ່ເມືອງແວນຄູເວີຣໃນວັນທີ່ 6 ກຸມພາ ນີ້ເຊິ່ງຈະເປັນການຕັດສິນວ່າຈະສົ່ງໂຕນາງ ເມິ່ງ ໃຫ້ກັບສະຫະລັດ ຕາມໝາຍຈັບໃນຂໍ້ຫາລະເມີດມາດຕະການຂວໍ້າບາດອີຣ່ານຫຼືບໍ່


ທັງນີ້ ທ່ານ ລູ່ ກ່າວວ່າການເມືອງແບບໂລກຕາເວັນຕົກຍັງບໍ່ເຄີຍປ່ຽນແປງຈາກການຕັ້ງຢູ່ເທິງພື້ນຖານຂອງ “ອັດຕານິຍົມ” ແລະ “ການຕັ້ງຕົນເໜືອກວ່າ” ການທີ່ແຄນາດາຂໍສຽງສະໜັບສະໜູນຈາກບັນດາປະເທດພັນທະມິດຂອງສະຫະລັດໃຫ້ຮ່ວມຮຽກຮ້ອງການປ່ອຍໂຕພົນລະເມືອງແຄນາດາ 2 ຄົນເຊິ່ງກໍາລັງຖືກຄຸມຂັງຢູ່ໃນຈີນ “ເປັນເລື່ອງສອງມາດຕະຖານ” ຢ່າງຊັດເຈນ ທັງທີ່ ນາງ ເມິ່ງ ຍັງຄົງຖືກຄວບຄຸມຕົວຢູ່ໃນແຄນາດາ ໂດຍເອກອັກຄະລັດຖະທູດຈີນໝາຍເຖິງ ທ່ານ ໄມເຄິລ ຄອຟຣິກ ອະດີດນັກການທູດເຊິ່ງເຄີຍປະຈໍາການໃນຈີນ ແລະ ປັດຈຸບັນຜັນຕົວໄປເຮັດວຽກໃຫ້ກັບອົງກອນອິດສິຫຼະ ແລະ ທ່ານ ໄມເຄິລ ສເປວໍຣ ນັກທຸລະກິດເຊິ່ງມີສໍານັກງານຢູ່ທີ່ເມືອງຕານຕົງ ໃນມົນທົນຫລຽວໜິງ ທາງຕາເວັນອອກສຽງເໜືອຂອງຈີນ ເຊິ່ງທັງສອງຄົນຖືກຈັບກຸມຕົວພາຍໃນເວລາບໍ່ດົນຫຼັງແຄນາດາຄວບຄຸມໂຕນາງເມິ່ງ


ແມ່ນວ່າຈີນບໍ່ເຄີຍໃຫ້ເຫດຜົນຢ່າງກົງໄປກົງມາ ວ່າຂໍ້ຫາ “ເປັນໄພຕໍ່ຄວາມໝັ້ນຄົງຂອງລັດ” ທີ່ ທ່ານ ຄອຟຣິກ ແລະ ສເປວອຣຖືກຟ້ອງຮ້ອງ ມີຄວາມເຊື່ອມໂຍງກັບກໍລະນີທາຍາດຂອງຫົວເວີ່ຍຫຼືບໍ່ ແຕ່ທຸກຝ່າຍເຊື່ວວ່າ “ບໍ່ໄດ້ເປັນເລື່ອງບັງເອີນ” ເຈົ້າໜ້າທີ່ການທູດຂອງແຄນາດາຫາກໍ່ໄດ້ຮັບອະນຸຍາດໃຫ້ເຂົ້າຢ້ຽມ ທ່ານສເປວອຣ ໄດ້ເປັນຄັ້ງທໍາອິດ ຫຼັງ ທ່ານ ຈອນ ແມກຄັລລັມ ເອກອັກຄະລັດຖະທູດແຄນາດາ ໄດ້ຮັບອະນຸຍາດໃຫ້ເຂົ້າຢ້ຽມຄອຟຣິກ 1 ຄັ້ງ ໃນເດືອນຜ່ານມາ.

Be the first to comment

Leave a Reply

Your email address will not be published.


*