ເມືອງປາກທາ ຈັດງານບຸນກິນຈຽງ ປະຈຳປີ 2019

ວັນທີ 8 ມັງກອນ 2019 ນີ້, ຢູ່ທີ່ບ້ານ ຫົວນ້ຳ ເມືອງປາກທາ ແຂວງບໍ່ແກ້ວໄດ້ຈັດງານບຸນກິນຈຽງ ຫຼື ໜໍເປເຈົາ ປະຈຳປີ 2019 ໂດຍການເປັນປະທານຂອງທ່ານ ປໍ ທໍ ນາຍບ້ານໆຫົວນ້ຳ ເປັນກຽດເຂົ້າຮ່ວມຂອງ ທ່ານ ສາລີ ວັນນະສານ ຮອງເລຂາພັກເມຶືອງ ຮອງເຈົ້າເມືອງໆປາກທາ, ມີບັນດາຫົວໜ້າຫ້ອງການ, ຄະນະພັກຮາກຖານ, ເຖົ້າແກ່ແນວໂຮມ, ແຂກເຊີນຕະຫຼອດຮອດມວນຊົນບ້ານໃກ້ເຮືອນຄຽງເຂົ້າຮ່ວມ.


ທ່ານ ໄລ ມົວ ຮອງນາຍບ້ານໆຫົວນ້ຳ ໄດ້ຜ່ານປະຫວັດຄວາມເປັນມາຂອງງານບຸນກິນຈຽງຫຼືໜໍເປເຈົ້າຂອງເຜົ່າມົ້ງໃນຄັ້ງນີ້ວ່າ: ຊົນເຜົ່າມົ້ງເປັນຊົນເຜົ່າໜຶ່ງທີ່ຈັດຢູ່ໃນໝວດພາສາ ມົ້ງ-ອິວມຽນ ໃນຈຳນວນ 50 ຊົນເຜົ່າ ຂອງວົງຄະນະຍາດເເຫ່ງຊາດ ເຊິ່ງມີປະຫວັດຄວາມເປັນອັນຍາວນານຄ້າຍຄືກັນກັບຊົນເຜົ່າອື່ນໆຂອງຊາດລາວ, ນັບເເຕ່ສັດຕະວັດທີ 19 ເປັນຕົ້ນມາ ຊົນເຜົ່າມົ້ງໄດ້ອົບພະຍົບເຄື່ອນຍ້າຍມາຈາກຕິເບດ, ຊີບີລີ, ມົງໂກລີ ເຂົ້າສູ່ປະເທດຈີນ ເເລະ ຕັ້ງຫຼັກເເຫຼ່ງຢູ່ລຸ່ມເເມ່ນ້ຳເຫຼືອງ ( ຮວງໂຮ ) ຍ້ອນສົງຄາມຈຶ່ງໄດ້ອົບພະຍົບ ເເລະ ເຄື່ອນຍ້າຍຖອຍລົງມາພາກໃຕ້ຂອງ ປະເທດຈີນ ເຂົ້າສູ່ຫວຽດນາມ ເເລະ ເຄື່ອນຍ້າຍຈາກຫວຽດນາມຜ່ານດຽນບຽນຟູ ມາຍັງບັນດາເເຂວງພາກເໝືອ ຮອດພາກກາງຂອງ ປະເທດລາວ, ຊົນເຜົ່າມົ້ງມີຫຼາຍເເຊງເຊັ່ນ: ມົ້ງເດີ, ມົ້ງຂາວ, ມົ້ງລາຍ, ມົ້ງເລງ, ມົ້ງຊີ, ມົ້ງຢົວ ເເລະມົ້ງດຳ, ມີພາສາປາກເວົ້າສະເພາະຂອງຕົນເອງ, ຊົນເຜົ່າມົ້ງມີເອກະລັກທາງດ້ານຮີດຄອງປະເພນີ, ຄວາມເຊື່ອຖື ເເລະວັດທະນະທຳເປັນຂອງຕົນເອງ, ເຊື່ອຖືຜີເຮືອນ, ເຊື່ອຖືຜູ້ທີ່ເປັນພໍ່ເເມ່ ເເລະ ບັນພະບູລຸດ, ນັບຖື ສຶບສາຍຕະກຸນທາງພໍ່ຫຼືຝ່າຍຊາຍເປັນຫຼັກ, ທ່ານ ຮອງນາຍບ້ານໆຫົວນ້ຳຍັງໃຫ້ຮູ້ອີກວ່າ: ງານບຸນກິນຈຽງຫຼືໜໍເປເຈົາຂອງເຜົ່າມົ້ງ ເເມ່ນເປັນການສະຫຼອງຜົນງານການເກັບກ່ຽວທີ່ຍາດມາໄດ້ຕະຫຼອດປີທີ່ຜ່ານມາ ເເລະເຜີຍເເຜ່ຮີດຄອງປະເພນີ, ວັດທະນະທຳຂອງຕົນເອງເປັນການສ້າງໂອກາດເຕົ້າໂຮມບັນດາພໍ່ເເມ່, ຍາດຕິພີ່ນ້ອງ ເເລະເເຂກທີ່ຢູ່ໃກ້ເເລະໄກໄດ້ພົບພໍ້ເພື່ອສະເເດງຄວາມສາມັກຄີ, ຄອບອົກຄອບໃຈຄວາມຮູ້ບຸນຄຸນເຊິ່ງກັນ ເເລະກັນ, ທັງເປັນການສົມມາຄາລະວະຕໍ່ຜູ້ອາວຸໂສ ເເລະຜູ້ນຳພາ ເເລະທັງເປັນການສ້າງໂອກາດໃຫ້ຜູ້ທີ່ເປັນພໍ່ເເມ່ໄດ້ເລືອກໃພ້ເລືອກເຂີຍ ເເລະຊາຍໝຸ່ມ, ຍິງສາວໄດ້ເລືອກຄູ່ຊີວິດຂອງຕົນເອງ.


ໂອກາດດຽວກັນນີ້ ທ່ານ ສາລີ ວັນນະສານ ຮອງເລຂາພັກເມືອງ ຮອງເຈົ້າເມືອງໆປາກທາໄດ້ມີຄຳເຫັນ ເເລະເນັ້ນນັກບາງບັນຫາເປັນຕົ້ນ: ເອົາໃຈໃສ່ປຸກລະດົມທາງດ້ານສຶກສາອົບຮົມການເມືອງ-ເເນວຄິດໃຫ້ພ້ອມກັນເຊື່ອໝັ່ນຕໍ່ເເນວທາງການປ່ຽນເເປງໃໝ່ຂອງພັກ, ທຸກໆຄອບຄົວຕ້ອງເປັນເຈົ້າການໃນການປົກປັກຮັກສາ ເເລະສາສ້າງພັດທະນາປະເທດຊາດ ເເລະພ້ອມກັນເອົາໃຈໃສ່ຮັກສາມູນເຊື້ອຄວາມດຸໝັ່ນຂະຫຍັນພຽນໄວ້, ທັງເປັນເຈົ້າການໃນການສາສ້າງພັດທະນາເສດຖະກິດຄອບຄົວໃຫ້ຮັ່ງມີຈະເລີນຮຸ່ງເຮືອງ

Be the first to comment

Leave a Reply

Your email address will not be published.


*