ລັດຖະບານ ຈະຫລຸດລາຍຈ່າຍບໍລິຫານລົງ 20% ໃນສົກປີ 2019

ລັດຖະມົນຕີກະຊວງການເງິນໄດ້ໃຫ້ຮູ້ໃນກອງປະຊຸມສະຫລຸບວຽກງານແຜນການ-ການເງິນວ່າ: ສົກ​ປີ 2019 ນີ້, ​ຈະ​ຈັດ​ສັນ​ລາຍ​ຈ່າຍ​ຢ່າງ​ມີ​ຈຸດ​ສຸມ, ​ໂດຍ​ສະ​ເພາະໃນຂະແໜງສຶກສາ​ທິການ ​ແລະກິລາ, ​ສາທາລະນະ​ສຸກ ​ແລະການ​ວິ​ໄຈ​ຄົ້ນຄວ້າ​ວິທະຍາສາດ​ຢ່າງ​ສົມ​ເຫດ​ສົມ​ຜົນ, ໂດຍຈະສືບ​ຕໍ່​ຜັນ​ຂະຫຍາຍ​ຄຳ​ສັ່ງ​ເລກທີ 09/ນຍວ່າ​ດ້ວຍ​ການ​ປະຢັດ​ລາຍ​ຈ່າຍ​ງົບປະມານ​ຂອງ​ລັດ​ໃຫ້ມີປະສິດທິພາບດ້ວຍ​ການ​ຊຸກຍູ້​ໃຫ້​ທຸກຂະ​ແໜງ​ການ ​ແລະທ້ອງ​ຖິ່ນ​​ປະຢັດ​ລາຍ​ຈ່າຍ​ບໍລິຫານ​ປົກກະຕິ​ເຊັ່ນ: ຊື່​ເຄື່ອງ​ໃຊ້​ຫ້ອງການ, ​ໄຟຟ້າ, ນ້ຳປະປາ, ​ໂທລະສັບ, ສ້ອມ​ແປງ, ປີ້​ຍົນ, ງານ​ລ້ຽງ ​ແລະອື່ນໆລົງໃຫ້ໄດ້ຢ່າງໜ້ອຍ 20% ທຽບກັບ​ລາຍ​ຈ່າຍ​ປີ 2018 ຜ່ານມາ,​ ​ເພື່ອ​ຫັນ​ເອົາ​ລາຍ​ຈ່າຍ​ທີ່​ປະຢັດ​ໄດ້​ນັ້ນ​ໄປ​ນຳ​ໃຊ້​ເຂົ້າ​ໃນ​ວຽກ​ງານ​ສົ່ງ​ເສີມ​ການ​ຜະລິດ ​ແລະການ​ປະຕິບັດ​ບັນດາ​ຄາດໝາຍ​ສຳຄັນ​ຕ່າງໆ​ຂອງ​ແຕ່ລະ​ພາກສ່ວນ​ຕາມ​ແຜນ​ທີ່​ສະພາ​ແຫ່ງ​ຊາດ​ໄດ້​ຮັບຮອງ,

 

ພ້ອມທັງກວດກາ​ຄືນ​ໂຄງກາ​ນລົງທຶນ​ຂອງ​ລັດ ​ເພື່ອ​ຈັດ​ລຽງ​ບູລິ​ມະ​ສິດ​ໃໝ່ສຸມ​ທຶນຮອນ​ໃສ່​ໂຄງການ​ທີ່​ຈຳ​ເປັນ ​ແລະມີ​ປະສິດທິ​ຜົນ,ພ້ອມ​ທັງ​ຫລຸດ​ຈຳນວນ​ໂຄງການ​ທີ່​ບໍ່​ທັນ​ຈຳ​ເປັນ​ຮີບ​ດ່ວນ ​ແລະບໍ່​ມີ​ປະສິດທິ​ຜົນ​ລົງຕາມ​ຄວາມ​ອາດ​ສາມາດ​ຕົວ​ຈິງ​ທາງ​ດ້ານ​ງົບປະມານ.ໄປຄຽງຄູ່ກັບການສືບ​ຕໍ່​ປະຕິ​ຮູບ​ວຽກ​ງານ​ການ​ເງິນຢ່າງຮອບດ້ານ ​ແລະ ​ແຂງ​ແຮງ, ​ໂດຍ​ການ​ປັບປຸງ​ກົນ​ໄກ ​ແລະລະບຽບ​ການ​ຄຸ້ມ​ຄອງ​ການ​ເກັບ​ລາຍ​ຮັບ, ​ລາຍ​ຈ່າຍ​​ຫັນ​ໄປ​ສູ່​ທັນ​ສະ​ໄໝ, ຫັນ​ການ​ຊຳລະ​ພາສີ-ອາກອນ ​ແລະຄ່າ​ທຳນຽມ​ຕ່າງໆ​ຜ່ານ​ລະບົບ​ທະນາຄານ​ໃຫ້​ໄດ້ 100% ຢູ່​ເຂດ​ທີ່​ມີ​ເງື່ອນ​ໄຂ, ເພື່ອ​ຄວາມ​ໂປ່​ງ​ໃສ, ຄວາມ​ຮັບຜິດຊອບ, ຄວາມ​ມີ​ຈັນ​ຍາ​ບັນ​ຂອງ​ຜູ້​ເຮັດ​ວຽກ​ໃນ​ຂົ​ງ​ເຂດ​ນີ້ ​ແລະ ​ແກ້​ໄຂ​ບັນດາ​ຂໍ້ຄົງຄ້າງ​ໃຫ້​​ເປັນ​ຮູບ​ປະ​ທຳ, ປັບປຸງ​ບັນດາ​ດ່ານ​ສາກົນ, ດ່ານ​ທ້ອງ​ຖິ່ນ ​ແລະດ່ານ​ປະ​ເພນີ​ໃຫ້​ເຂົ້າສູ່​ລະບົບ, ປັບປຸງ​ກົງຈັກ, ກົນ​ໄກ​ການ​ຄຸ້ມ​ຄອງ ​ແລະກວດກາ​ໃຫ້​ຮັດກຸມ ​ໂດຍ​ຫັນ​ເຂົ້າສູ່​ການ​ຄຸ້ມ​ຄອງ​ແບບ​ລວມສູນເທື່ອລະກ້າວ.

ຂອບໃຈຂໍ້ມູນ: ນສພ ລາວພັດທະນາ

Be the first to comment

Leave a Reply

Your email address will not be published.


*