ພັດທະນາອຸປະກອນຄວບຄຸມເຊລປະສາດດ້ວຍແສງ ຊ່ວຍກະຕຸ້ນຟື້ນຟູການເຄື່ອນໄຫວໃນກໍລະນີທີ່ເປັນອໍາມະພາດ

ການສຶກສາດ້ານປະສາດວິທະຍາສາດ (neuroscience) ເປັນວຽກທີ່ຕ້ອງໃຊ້ຄວາມລະອຽດອ່ອນ ແລະ ຄວາມຖືກຕ້ອງແມ້ນຢໍາສູງ ມີຄວາມພະຍາຍາມພັດທະນາຄິດຄົ້ນເຄື່ອງມືຫຼືອຸປະກອນຕ່າງໆທີ່ມີປະສິດທິພາບເລື້ອຍມາ ເເຕ່ເມື່ອບໍ່ດົນມານີ້ ສາດສາດາຈານຟິລິປ ເກີທຣັຟ ຈາກພາກວິຊາວິສະວະກໍາຊິວະການແພດ ແຫ່ງມະຫາວິທະຍາໄລອາຣິໂຊນາ ໃນສະຫະລັດອາເມຣິກາ ເຜີຍຂ່າວທີ່ໜ້າຍິນດີວ່າໄດ້ປະດິດອຸປະກອນອີເລັກໂທນິກໄຮ້ແບັດເຕີລີ່ ແລະ ບໍ່ຕ້ອງຕໍ່ສາຍໄຟໃຫ້ຫຍຸ້ງຍາກ ສາມາດຜ່າຕັດຝັງພາຍໃຕ້ໜັງຫົວ ເຊິ່ງເຊື່ອວ່າຈະນໍາໄປສູ່ຄວາມເຂົ້າໃຈເຖິງການເຮັດວຽກຂອງສະໝອງທັງໝົດ

ຈາກການໃຊ້ວິທີອອປໂຕເຈເນຕິກສ (Optogenetics) ເປັນເທັກນິກທາງຊີວະວິທະຍາທີ່ໃຊ້ແສງໃນການເປີດ ຫຼື ປິດກຸ່ມເຊລປະສາດທີ່ສະເພາະເຈາະຈົງໃນສະໝອງ ວິທີນີ້ຈະເຮັດໃຫ້ເຊລປະສາດເຕັມໄປດ້ວຍໂປຣຕີນອອປຊິນ (opsins) ທີ່ເປັນຕົວດູດຊືມໂຟຕອນ ຫຼື ອະນຸພາບຂອງແສງ ມີສັກກະຍາພາບໃນການແປງແສງເປັນໂຕນຳໄຟຟ້າທີ່ກຽມການເຮັດວຽກຂອງເຊລປະສາດ ທັງນີ້ ຄວາມເຂັ້ມຂອງແສງມີຄວາມສໍາຄັນຢ່າງຍິ່ງ ເພາະຈະຊ່ວຍໃຫ້ນັກວິໄຈສາມາດຄວບຄຸມວ່າສະໝອງມີຜົນກະທົບກັບແສງຫຼາຍເທົ່າໃດ ທີ່ສໍາຄັນຄື ອອປໂຕເຈເນຕິກສາມາດນໍາໄປກວດສອບການເຮັດວຽກລວມເຖິງຄວາມສໍາພັນໃນການເຮັດວຽກຂອງສະໝອງສ່ວນຕ່າງໆໄດ້

ນັກວິໄຈອະທິບາຍການເຮັດວຽກຂອງອຸປະກອນຊະນິດນີ້ວ່າ ແສງອາດຊ່ວຍກະຕຸ້ນເພື່ອຟື້ນຟູການເຄື່ອນໄຫວໃນກໍລະນີທີ່ເປັນອໍາມະພາດ ຫຼື ອານາຄົດອາດນໍາໄປຊ່ວຍປິດພື້ນທີ່ຂອງສະໝອງຫຼືກະດູກສັນຫຼັງທີ່ເຮັດໃຫ້ເກີດອາການເຈັບປວດ ແລະ ຈະຊ່ວຍກໍາຈັດຄວາມຕ້ອງການທີ່ເພີ່ມຂື້ນຂອງການໃຊ້ຢາຊະນິດທີ່ມີສານໂອປິອອຍ (opioids) ເປັນສ່ວນປະກອບ ແລະ ຢາແກ້ປວດປະເພດອື່ນໆໄປໄດ້ນັ້ນເອງ.

Be the first to comment

Leave a Reply

Your email address will not be published.


*