ປ່ຽນສູ່ສິ່ງທີ່ດີກວ່າ ! “ເກົາຫຼີເໜືອ” ໃກ້ໝົດຍຸກ “ທະຫານມາກ່ອນ” ມຸ່ງໜ້າພັດທະນາເສດຖະກິດຢ່າງຈິງຈັງ

ການເດີນທາງຢ້ຽມຢາມນະຄອນຫລວງປັກກິ່ງ ປະເທດຈີນ ຂອງ ທ່ານ ຄິມ ຈອງອຶນ ຜູ້ນໍາສູງສຸດແຫ່ງສາທາລະນະລັດປະຊາທິປະໄຕປະຊາຊົນເກົາຫຼີ (DPRK) ຫຼື ເກົາຫຼີເໜືອ ໃນຊ່ວງອາທິດນີ້ ໄດ້ສົ່ງສັນຍານຊັດເຈນວ່າເກົາຫຼີເໜືອກໍາລັງປ່ຽນແປງໂຕເອງທາງນະໂຍບາຍຈາກ “ທະຫານມາກ່ອນ” (military first) ສູ່ “ການພັດທະນາເສດຖະກິດຢ່າງຈິງຈັງ”
ຄິມໄດ້ຢ້ຽມຊົມໂຮງງານຖົງເຫຣິນຖັງ (Tongrentang) ບໍລິສັດຜູ້ຜະລິດຢາແພດແຜນຈີນບູຮານຊື່ດັງ ເມື່ອວັນພຸດ 9 ມັງກອນ 2019 ເຊິ່ງຕອກຢໍ້າຄໍາປາໄສເນື່ອງໃນວັນຂື້ນປີໃໝ່ຂອງທ່ານ ທີ່ຕັ້ງເປົ້າໝາຍ “ຍົກເຄື່ອງ” ອຸດສາຫະກໍາພາຍໃນປະເທດ ໂດຍສະເພາະອຸດສາຫະກໍາຜະລິດຢາ (ເກົາຫຼີເໜືອຖືເປັນຜູ້ຜະລິດສະໝຸນໄພລາຍໃຫຍ່ ຜະລິດຕະພັນຫຼັກຄືໂສມເກົາຫຼີ)


“ເຮົາຕ້ອງປັບປຸງໂຮງງານ ແລະ ອຸປະກອນທາງການແພດໃຫ້ມີຄວາມທັນສະໄໝ ພັດທະນາຄຸນນະພາບຂອງສະຖາບັນການແພດ ແລະ ການໃຫ້ບໍລິການ” ສ່ວນໜຶ່ງຂອງຄໍາປາໄສທີ່ຄິມກ່າວກັບຊາວເກົາຫຼີເໜືອໃນວັນປີໃໝ່ ເຊິ່ງສື່ຮົງກົງຢ່າງ ໄຊນ່າ ມໍນິ່ງ ໂພສ (SCMP) ເຜີຍວ່າ ຄິມ ເວົ້າເຖິງ “ເສດຖະກິດ” ຈໍານວນ 38 ຄັ້ງ ເພີ່ມຂື້ນເກືອບເທົ່າຕົວຈາກຄໍາປາໄສປີໃໝ່ຄັ້ງກ່ອນ


ຄວາມຕັ້ງໃຈປ່ຽນແປງ “ທິດທາງຂອງປະເທດ” ຂອງຜູ້ນໍາຄົນນີ້ເຜີຍອອກມາຕັ້ງແຕ່ກ້າວເຂົ້າສູ່ຕໍາແໜ່ງຜູ້ນໍາສູງສຸດ ທ່ານເຜີຍວ່າຊາວເກົາຫຼີເໜືອຈະບໍ່ຕ້ອງ “ຮັດເຂັມຂັດ” ອີກຕໍ່ໄປ ໂດຍທ່ານເປີດໃຫ້ຊາວສວນຊາວໄຮ່ຄ້າຂາຍຜົນຜະລິດຢ່າງອິດສະຫຼະເສລີຫຼາຍຂື້ນ ໂຮງງານຕ່າງໆສາມາດຄວບຄຸມຄ່າຈ້າງດ້ວຍຕົນເອງ ແລະ ຜ່ອນຜັນຂໍ້ຈໍາກັດການເຮັດທຸລະກິດສ່ວນໂຕຂະໜາດນ້ອຍ


ທ່ານ ຄິມ ຍັງຮຽກຮ້ອງລະຫວ່າງການປະຊຸມພັກກຳມະກອນແຫ່ງເກົາຫຼີ(WPK) ໃນປີ 2013 ໃຫ້ຍຶດຖືນະໂຍບາຍ “ບະຢຸງຈິນ” (Byungjin ) ອັນໝາຍເຖິງການພັດທະນາເສດຖະກິດ ແລະ ອາວຸດນິວເຄຼຍໃນເວລາດຽວກັນ ແມ່ນຈະຍັງເອີ່ຍເຖິງອາວຸດນິວເຄຼຍ ແຕ່ກໍ່ຖືວ່າກ້າວຖອຍຈາກການຍຶດຫຼັກນະໂຍບາຍ “ຊອນກຸນ” (Songun) ຫຼື “ທະຫານມາກ່ອນ” ແລ້ວ
ນອກຈາກນັ້ນ ທ່ານຄິມ ປະກາດຄວາມສໍາເລັດຂອງການດໍາເນີນນະໂຍບາຍບະຢຸງຈິນໃນເດືອນເມສາປີກ່ອນ ກ່າວວ່າຄວາມພະຍາຍາມທັງໝົດຄວນເດີນໜ້າສູ່ “ການກໍ່ສ້າງເສດຖະກິດສັງຄົມນິຍົມ” ແລະ ນັບຈາກນັ້ນ ທ່ານຄິມ ກໍ່ຕະເວນເດິນທາງຢ້ຽມຢາມພື້ນທີ່ການກະເສດ ແລະ ໂຮງງານອຸດສາຫະກໍາ ພ້ອມກັບ “ຕິຕຽນ” ຫາກເລັງເຫັນວ່າໂຄງການພັດທະນາຕ່າງໆ ບໍ່ໄດ້ໄປໜ້າໄວພຽງພໍ.

Be the first to comment

Leave a Reply

Your email address will not be published.


*