ບໍລິສັດຍີ່ປຸ່ນ ເບິ່ງຫວຽດນາມໜ້າລົງທຶນທີ່ສຸດໃນເອເຊຍ

ຜົນການສໍາຫຼວດຂອງເອັນເອັນເອເຜີຍ ບໍລິສັດຍີ່ປຸ່ນທີ່ດໍາເນີນກິດຈະການໃນເອເຊຍເບິ່ງວ່າ ຫວຽດນາມ ເປັນຈຸດໝາຍດ້ານການລົງທຶນທີ່ໜ້າດຶງດູດໃຈທີ່ສຸດ ເພາະການເຕີບໂຕທາງເສດຖະກິດໃນລະດັບສູງ ລວມເຖິງສະຖານະອັນແຂງແກ່ນໃນຖານະສູນກາງການຜະລິດ ແລະ ຕະຫຼາດຜູ້ບໍລິໂພກຂະໜາດໃຫຍ່


ຈາກຈໍານວນຜູ້ຕອບແບບສອບຖາມທັງ 630 ຄົນທີ່ເຮັດວຽກໃນບໍລິສັດຍີ່ປຸ່ນທົ່ວເອເຊຍຕາເວັນອອກ ເອເຊຍຕາເວັນອອກສຽງໃຕ້ ອິນເດຍ ແລະ ອອສເຕຣເລຍ ພົບວ່າ 35,7% ຂອງຜູ້ຕອບແບບສອບຖາມເລືອກຫວຽດນາມເປັນປະເທດທີ່ເສດຖະກິດມີແນວໂນ້ມສົດໃສ ສູງກວ່າອັນດັບສອງຢ່າງອິນເດຍ 17,8%

“ເມື່ອເຮົາວາງຮາກຖານໃນຫວຽດນາມ ເຮົາສາມາດຂະຫຍາຍການດໍາເນີນງານຂອງເຮົາອອກສູ່ກໍາປູເຈຍ ລາວ ແລະ ມຽນມາໄດ້” ເຈົ້າໜ້າທີ່ຍີ່ປຸ່ນຄົນໜຶ່ງທີ່ຢູ່ໃນອຸດສາຫະກໍານອກການຜະລິດກ່າວ


ສໍານັກຂ່າວກຽວໂດ ລາຍງານວ່າ ຈາກການສໍາຫຼວດທີ່ຈັດຂື້ນຕັ້ງແຕ່ວັນທີ່ 26 ພະຈິກ -9 ທັນວາ 2018 ສັກກະຍາພາບການເຕີບໂຕໃນລະດັບສູງຂອງອິນເດຍຍັງຄົງດຶງດູດນັກລົງທຶນຍີ່ປຸ່ນ ໂດຍຜູ້ຕອບແບບສອບຖາມ ມີຄວາມເຫັນວ່າເສດຖະກິດຂອງອິນເດຍສາມາດຟັນຝ່າອຸປະສັກຈາກການຍົກເລີກທະນາບັດທີ່ມີມູນຄ່າສູງ ແລະ ການຮຽກເກັບພາສີສິນຄ້າ ແລະ ບໍລິການມາໄດ້


ທັງນີ້ ຜູ້ຕອບແບບສອບຖາມຊາວຍີ່ປຸ່ນ ທີ່ເຮັດວຽກໃນພາກການຜະລິດກໍາລັງຈັບຕາສັກກາຍາພາບການເຕີບໂຕຂອງອິນເດຍ ພ້ອມລະບຸເຖິງປັດໄຈບວກຈາກຈໍານວນປະຊາກອນ ແລະ ລາຍໄດ້ທີ່ເພີ່ມຂື້ນ ລວມເຖິງຄວາມຕ້ອງການຜະລິດຕະພັນໃໝ່ໆເພີ່ມຂື້ນຈາກການກໍານົດລະບຽບດ້ານສິ່ງແວດລ້ອມ


ຜົນສໍາຫຼວດຍັງລະບຸວ່າ ຈີນ ເປັນຈຸດໝາຍດ້ານການລົງທຶນທີ່ໜ້າສົນໃຈເປັນອັບດັບ 3 ໂດຍນັບຄະແນນໄດ້ 7,9% ຫຼຸດລົງຈາກ 12,6% ໃນການສໍາຫຼວດໃນປີ 2017 ໂດຍໄດ້ຮັບຜົນກະທົບຈາກຄວາມຂັດແຍ່ງທາງດ້ານການຄ້າກັບສະຫະລັດ

ສ່ວນອັນດັບທີ່ໜ້າລົງທຶນເປັນອັນດັບ 4 ດ້ວຍຄະແນນ 7,3% ເປັນຂອງປະເທດໄທ ໂດຍນັກລົງທຶນມີຄວາມມັກປະເທດໄທໂດຍລະບຸເຖິງການຟື້ນຕົວທາງເສດຖະກິດທີ່ນໍາໂດຍພາກອຸດສາຫະກໍາລົດຍົນ ແລະ ໄທມີສະພາວະແວດລ້ອມທີ່ເໝາະສົມໃນການເລີ່ມໂມເດລໃໝ່ໆ


ນອກຈາກນີ້ ອິນໂດເນເຊຍ ໄດ້ຮັບຄວາມສົນໃຈຈາກນັກລົງທຶນຍີ່ປຸ່ນເປັນອັບດັບ 5 ໂດຍໄດ້ຄະແນນ 6,7% ສ່ວນມຽນມາ ຕາມມາອັນດັບ 6 ໂດຍມີຄະແນນ 6,5% ຫຼຸດລົງຈາກ 8,7% ໃນປີກ່ອນໜ້ານີ້ ໂດຍໄດ້ຮັບຜົນກະທົບຈາກວິກິດຜູ້ລີ້ໄພຊາວໂຣຮິນຢາໃນລັດຢະໄຂ່

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *