ດ່ານພາສີສາກົນພູເກືອ ເກັບລາຍຮັບໄດ້ເກີນແຜນ 3,16 %

ດ່ານພາສີສາກົນພູເກືອ ເມືອງພູວົງ ແຂວງອັດຕະປື ສາມາດປະຕິບັດລາຍຮັບໄດ້ລື່ນແຜນການປີ 3,16%, ລາຍຮັບສ່ວນໃຫຍ່ໄດ້ມາຈາກຄ່າຊັກພິເສດ, ຂາອອກນ້ຳມັນເຊື້ອໄຟ, ພາຫະນະເຄື່ອງກໍ່ສ້າງ, ເຄື່ອງອຸປະໂພກ – ບໍລິໂພກ, ທຳນຽມຄົນ – ພາຫະນະ ແລະ ອື່ນໆ.


ທ່ານ ເຄນໄຊ ທອງພຸດ ຫົວໜ້າດ່ານພາສີສາກົນພູເກືອ ໃຫ້ສຳພາດເມື່ອບໍ່ດົນນີ້ວ່າ: ໃນປີ 2018 ດ່ານພາສີສາກົນພູເກືອ ໄດ້ຮັບຕົວເລກຈັດເກັບລາຍຮັບ 23,8 ຕື້ກວ່າກີບ ແຕ່ຜ່ານການຈັດຕັ້ງປະຕິບັດສາມາດປະຕິບັດໝົດປີ 2018 ປະຕິບັດໄດ້ 24,5 ຕື້ກວ່າກີບ ເທົ່າກັບ 103,16% ຂອງແຜນການປີ.ລາຍຮັບສ່ວນໃຫຍ່ໄດ້ມາຈາກປັບ ໃໝ – ຂາຍເຄື່ອງຮິບ 4,5 ຕື້ກວ່າກີບ, ນ້ຳມັນເຊື້ອໄຟ 3,6 ຕື້ກວ່າກີບ, ເຄື່ອງອຸປະໂພກ – ບໍລິໂພກ 2,4 ຕື້ກວ່າກີບ, ທຳນຽມຄົນ – ພາຫະນະ 1,5 ຕື້ກວ່າກີບ.


ສຳລັບແຜນການປີ 2019 ດ່ານພາສີສາກົນພູເກືອ ໄດ້ຮັບຕົວມອບໝາຍໃຫ້ຈັດຕັ້ງປະຕິບັດລວມທັງໝົດ 22,4 ຕື້ກວ່າກີບ. ໃນນັ້ນ, ທຳນຽມຄົນ – ພາຫະນະ 7 ຕື້ກວ່າກີບ, ນ້ຳມັນເຊື້ອໄຟ 6,5 ຕື້ກວ່າກີບ, ເຄື່ອງອຸປະໂພກ – ບໍລິໂພກ 2,6 ຕື້ ກວ່າກີບ ແລະ ອື່ນໆອີກ. ເພື່ອບັນລຸຕາມເປົ້າໝາຍແຜນການໃນຕໍ່ໜ້າ ດ່ານພາສີສາກົນພູເກືອ ແຂວງ ອັດຕະປື ຈະເຂັ້ມງວດໃນການກວດກາຕິດຕາມເຄື່ອງຂອງສົ່ງອອກ – ນໍາເຂົ້າຜ່ານດ່ານໃຫ້ຖືກຕ້ອງຕາມລະບຽບກົດໝາຍ, ສ້າງແບບແຜນວິທີເຮັດວຽກໃຫ້ແທດເໝາະກັບສະພາບຕົວຈິງ, ອຳນວຍຄວາມສະດວກໃຫ້ຜູ້ປະກອບການໃນການນຳເຂົ້າ – ສົ່ງອອກສິນຄ້າຜ່ານດ່ານໃຫ້ວ່ອງໄວທັນກັບສະພາບການ ທ່ານ ເຄນໄຊ ທອງພຸດ ກ່າວ.

( ຂ່າວ – ຮູບ: ກະຊວງການເງິນ )

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *