ຊົນເຜົ່າມົ້ງ ແຂວງບໍ່ແກ້ວ ສະຫລອງບຸນກິນຈຽງ ຢ່າງຟົດຟື້ນ

ຂປລ.ປະຊາຊົນເຜົ່າມົ້ງ ບ້ານນ້ຳສະໝອກເໜືອ, ບ້ານໄຊຈະເລີນ, ບ້ານຫ້ວຍຊາຍນ້ອຍ, ບ້ານໂພນໄຊ ແລະ ບ້ານຝາຍ ເມືອງຫ້ວຍຊາຍ ແຂວງບໍ່ແກ້ວ ໄດ້ຮ່ວມກັນຈັດງານບຸນກິນຈຽງ ຫລື (ບຸນໜໍເປ່ເຈົາ) ຂຶ້ນໃນລະຫວ່າງວັນທີ 09 ມັງກອນ 2019 ນີ້. ເປັນກຽດເຂົ້າຮ່ວມຂອງທ່ານ ໂພເພັດ ບຸນທອງ ຮອງເຈົ້າເມືອງໆຫ້ວຍຊາຍ ທ່ານ ລີຕຸເລັ່ງ ຈົ່ງເຕັງ ຮອງຫົວໜ້າສະພາປະຊາຊົນແຂວງ ຄະນະຊີ້ນຳຈັດງານບຸນກິນຈຽງ, ມີການນຳຂອງແຂວງ, ເມືອງ, ພໍ່ແມ່ປະຊາຊົນບໍລິເວນບ້ານໃກ້ຄຽງເຂົ້າຮ່ວມຢ່າງຄືກຄື້ນມ່ວນຊື່ນ.

ທ່ານ ນໍເນັ່ງ ວ່າງ ເລຂາພັກບ້ານໆ ນ້ຳສະໝອກເໜືອ ກ່າວວ່າ: ການຈັດງານບຸນກິນຈຽງ ຂອງເຜົ່າມົ້ງ ແມ່ນເປັນການສະເຫລີມສະຫລອງຜົນງານ ການເກັບກ່ຽວຜົນລະປູກທີ່ຍາດມາໄດ້ໃນ 1 ປີຜ່ານມາ ທັງເປັນການເຜີຍແຜ່ ແລະ ປົກປັກຮັກສາ ຮີດຄອງປະເພນີ ແລະ ວັດທະນະທໍາອັນດີງາມຂອງເຜົ່າມົ້ງ, ເປັນການສົມມາຄາລະວະຕໍ່ຜູ້ອາວຸໂສ, ຜູ້ນໍາພາ, ສ້າງໂອກາດເຕົ້າໂຮມບັນດາພໍ່ແມ່, ຍາດພີ່ນ້ອງ ແຂກຄົນທີ່ຢູ່ໃກ້ຢູ່ໄກໄດ້ມາພົບພໍ້ສະແດງຄວາມສາມັກຄີ, ຄວາມຂອບອົກຂອບໃຈຮູ້ບຸນຄຸນເຊິ່ງກັນ ແລະ ກັນ ທັງເປັນການສ້າງໂອກາດໃຫ້ຜູ້ເປັນພໍ່ແມ່ໄດ້ເລືອກໃພ້ເລືອກເຂີຍ ແລະ ຊາຍໜຸ່ມຍິງສາວໄດ້ເລືອກຄູ່ຊີວິດຂອງຕົນ.

ພາຍໃນງານຍັງມີການສະແດງສິລະປະວັນນະຄະດີ ແລະ ກິດຈະກຳຕ່າງໆ ເປັນຕົ້ນແມ່ນການໂຍນໝາກຄອນ, ກິລາພື້ນເມືອງ, ຍິງໜ້າເກັກ, ຊົນງົວ ແລະ ອື່ນໆ ທີ່ເຕັ້ມໄປດ້ວຍບັນຍາກາດອັນເບີນບານມ່ວນຊື່ນ. ນອກຈາກ ເປັນການຮັກສາຮີດຄອງປະເພນີອັນເກົ່າແກ່ໄວ້ໃຫ້ລູກຫລານຕະຫລອດໄປແລ້ວ ຍັງເປັນການສົ່ງເສີມການທ່ອງທ່ຽວ ແລະ ການສ້າງຂະບວນການຂໍ່ານັບຮັບຕ້ອນ ວັນສ້າງ ຕັ້ງກອງທັບປະຊາຊົນປະຕິວັດລາວ ຄົບຮອບ 70 ອີກດ້ວຍ

Be the first to comment

Leave a Reply

Your email address will not be published.


*