ຈອບຍິງສັດປ່າ ແຕ່ຫຼົງຍິງກັນເສຍຊີວິດ

ປະຊາຊົນບ້ານດອນຊາຍ ເມືອງນາແລ ແຂວງຫຼວງນໍ້າທາ ລັກລອບຍິງສັດປ່າຢູ່ປ່າເຂດຫ້ວຍນໍ້າໝຸງ ຈົນເກີດເຫດການຫຼົງຍິງ ທ້າວ ເໝົາ ອາຍຸ 56 ປີ ປະຊາຊົນຢູ່ບ້ານດອນໄຊ ເສຍຊີວິດຢູ່ກາງປ່າ.


ຮອ ສົມສະນິດ ກຸນຕິລາດ ຫົວໜ້າພະແນກຕຳຫຼວດ ປກສ ເມືອງ ນາແລ ໃຫ້ຮູ້ວ່າ: ພາຍຫຼັງໄດ້ຮັບລາຍງານຈາກກຸ່ມບ້ານວັງມີໄຊ ເມືອງນາແລ ວ່າ: ມີປະຊາຊົນຢູ່ເຂດບ້ານດອນຊາຍ ຫຼົງຍິງ ກັນຕາຍຢູ່ປ່າເຂດຫ້ວຍນໍ້າໝຸງ ເມືອງນາແລ . ຈາກນັ້ນ, ໄດ້ສົ່ງເຈົ້າໜ້າທີ່ພະແນກຕໍາຫຼວດ ໄປສົມທົບກັບກຸ່ມ ລົງກວດກາສະຖານທີ່ເກີດເຫດ ພົບເຫັນຜູ້ເສຍຊິວິດ ຊື່ ທ້າວ ເໝົາ ອາຍຸ 56 ປີ ຢູ່ບ້ານດອນໄຊ ເມືອງນາແລ ແຂວງຫຼວງນໍ້າທາ. ຈາກການຊັນນະສູດພາຍນອກຂອງສົບ, ພົບເຫັນຮ່ອງຮອຍລູກປືນແກັບ ເຊິ່ງເປັນລູກຫວ່ານຖືກຕາມຕົນຕົວຫຼາຍຈຸດ ແລະ ລູກໂດດ 1 ຈຸດ. ຜ່ານການສືບສວນ-ສອບສວນຈຶ່ງຮູ້ວ່າ: ຜູ້ທີ່ກໍ່ເຫດຫຼົງຍິງແມ່ນ ທ້າວ ຄຳສຸກ ອາຍຸ 28 ປີ ປະຊາຊົນບ້ານດອນໄຊ ເມືອງນາແລ ແຂວງຫຼວງນໍ້າທາ.
ຜ່ານການສອບສວນ, ທ້າວ ຄໍາສຸກ ສາລະພາບວ່າ: ເປັນຜູ້ຫຼົງຍິງ ທ້າວ ເໝົາ ເຊິ່ງອາວຸດທີ່ກໍ່ເຫດແມ່ນປືນແກັບ (ຜະລິດນໍາໃຊ້ເອງ), ກ່ອນເກີດເຫດ ໃນຕອນເຊົ້າຂອງວັນທີ 26 ທັນວາ 2018 ຕົນເອງໄດ້ຂັບລົດຈັກກັບພໍ່ເຖົ້າ ຈະໄປນາຢູ່ເຂດຫ້ວຍນໍ້າໝຸງ, ພໍຮອດທາງແຍກໄປນາ ຕົນເອງໄດ້ຈອດລົດຈັກໄວ້ແຄມທາງ ແລ້ວໃຫ້ພໍ່ເຖົ້າຍ່າງໄປນາກ່ອນ, ສ່ວນຕົນເອງແມ່ນເອົາປືນແກັບ ຊອກຍິງນົກໄປຕາມທາງ ເຊິ່ງໄດ້ນົກ ຈໍານວນ 9 ໂຕ ພໍຮອດຖຽງນາເວລາປະມານ 14:00 ໂມງ, ໄດ້ບອກພໍ່ເຖົ້າຖ້າຢູ່ຖຽງນາ ເພາະຕົນຈະໄປຈອບຍິງໂຕກະຮອກກິນໝາກປີຢູ່ປ່າກ້ວຍແຄມນາ, ພໍໄປຮອດຕົ້ນໄມ້ໃຫຍ່ແຄມນາ ໄດ້ນັ່ງຖ້າຍິງໂຕກະຮອກ ປະມານ 30 ນາທີ ແຕ່ບໍ່ມີໂຕກະຮອກມາຈັກໂຕ.


ຈາກນັ້ນ, ໄດ້ຍ້າຍໄປບ່ອນທີ່ມີສຽງສັດປ່າແລ່ນຢູ່ບໍລິເວນຕົ້ນກ້ວຍ ສັງເກດເຫັນໃບໄມ້ເໜັງຕີງໄປ-ມາ ຈຶ່ງຄອ່ຍໆຈອບໄປເບິ່ງ ປະມານ 5-10 ນາທີ ປະກົດເຫັນສັດປ່າຄ້າຍຄືໂຕຟານ 2 ໂຕ ແລ່ນໄລ່ກັນ ຕົນເອງຈຶ່ງເອົາລູກໂດດ (ລູກປືນ) ຍັດໃສ່ຕື່ມໜຶ່ງລູກ ຍ້ອນຢ້ານສັດບໍ່ຕາຍ. ຈາກນັ້ນ, ໄດ້ຍົກປືນຂຶ້ນແລ້ວຍິງໃສ່ຈຸດດັ່ງກ່າວ ໄລຍະຫ່າງປະມານ 5-6 ແມັດ ແລ້ວວາງປືນລົງໄວ້ຈຸດຍິງ ຍ່າງເຂົ້າໄປເບິ່ງຈຸດທີ່ຕົນເອງຍິງ ຈຶ່ງເຫັນຄົນນອນສະແຄງຢູ່, ຕົນເອງບໍ່ຮູ້ວ່າແມ່ນໃຜ ຈຶ່ງ ເຂົ້າໄປພິກໃຫ້ນອນງາຍ ຈຶ່ງຮູ້ວ່າແມ່ນ ທ້າວ ເໝົາ ແລ້ວອຸ້ມເອົາຜູ້ກ່ຽວຂຶ້ນມາ ແລະ ສັງເກດເຫັນຜູ້ກ່ຽວເລືອດໄຫຼອອກມາຈາກຄໍເບື້ອງຊ້າຍ, ຕົນເອງຈຶ່ງຖອດເອົາເສື້ອຊັ້ນນອກຂອງຜູ້ກ່ຽວມາພັນຄໍເອົາໄວ້ ແຕ່ເລືອດໄຫຼອອກບໍ່ຢຸດ ແລະ ສັງເກດເຫັນວ່າ: ທ້າວ ເໝົາ ຫາຍໃຈຄ່ອຍໆລົງໄປເລື້ອຍໆ ໄດ້ປະມານ 2-3 ນາທີ ກໍເສຍຊີວິດ ກົງກັບເວລາປະມານ 17:00 ໂມງ. ຕົນເອງໄດ້ປະຜູ້ກ່ຽວໄວ້ຈຸດດັ່ງກ່າວ ແລ້ວໄປບອກພໍ່ເຖົ້າຢູ່ຖຽງນາ ແລະ ແຈ້ງໃຫ້ຍາດພີ່ນ້ອງຂອງຜູ້ເສຍ ຊິວີດຮັບຮູ້.

ຢ່າງໃດກໍຕາມ, ຕໍ່ບັນຫາດັ່ງກ່າວ, ບັນດາພາກສ່ວນທີ່ກ່ຽວຂ້ອງ ໂດຍສະເພາະອໍານາດການປົກຄອງທ້ອງຖິ່ນ ຄວນເອົາໃຈໃສ່ແກ້ໄຂຢ່າງຈິງຈັງ, ຕ້ອງຕິດຕາມກວດກາປຸກລະດົມປະຊາຊົນຫ້າມບໍ່ໃຫ້ຜະລິດອາວຸດລ່າເນື້້ອທຸກສະນິດ ພ້ອມທັງເກັບກູ້ອາວຸດປືນນໍາປະຊາຊົນ. ສ່ວນປະຊາຊົນ ກໍຄວນໃຫ້ການຮ່ວມມືກັບເຈົ້າໜ້າທີ່ເພື່ອຊ່ວຍກັນສະກັດກັ້ນປະກົດການຫຍໍ້ທໍ້ຕ່າງໆທີ່ອາດຈະເກີດຂຶ້ນຄືດັ່ງກໍລະນີດັ່ງກ່າວນີ້.

ຂອບໃຈຂໍ້ມູນຈາກ: ນສພ ຄວາມສະຫງົບ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *