ລັດຖະບານປະດັບຫລຽນໄຊ ຫລຽນກາແຮງງານ ໃຫ້ນັກກີລາທີມຊາດລາວ

ຂປລ. ວັນທີ 28 ທັນວາ 2018 ຜ່ານມາ ກະຊວງ ສຶກສາທິການ ແລະ ກີລາ ໄດ້ຈັດພິທີປະດັບຫລຽນໄຊ, ຫລຽນກາແຮງງານ ​ແລະ ມອບໃບຍ້ອງຍໍ ໃຫ້ຄະນະນຳ, ຄູເຝິກ ​ແລະ ນັກກີລາທີມຊາດລາວ ເພື່ອຍ້ອງຍໍຜົນສຳເລັດ ໃນການເຂົ້າຮ່ວມງານມະຫາກຳກີລາເອຊຽນເກມຄັ້ງທີ 18, ເອຊຽນພາຣາເກມ ຄັ້ງທີ 12 ທີ່ປະເທດອິນໂດເນເຊຍ ແລະ ການເຂົ້າຮ່ວມແຂ່ງຂັນລະດັບສາກົນ ​ໃນປີ 2018 ໃຫ້ກຽດມອບໃບຍ້ອງຍໍ ແລະ ປະດັບຫລຽນໄຊແຮງງານ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ, ປະທານຄະນະກໍາມະການໂອແລມປິກແຫ່ງຊາດລາວ, ປະທານຄະນະກໍາມະການພາຣາແລມປິກແຫ່ງຊາດລາວ.

 

ໂອ​ກາດ​ດັ່ງກ່າວ, ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງສຶກສາທິການ ແລະ ກີລາ ທັງເປັນຮອງປະທານ ເລຂາທິການຄະນະກຳມະການໂອແລມປິກແຫ່ງຊາດລາວ ໄດ້ລາຍງານໂດຍຫຍໍ້ຄວາມເປັນມາ ຂອງແຕ່ລະສະຫະພັນ ໃນການເຂົ້າຮ່ວມແຂ່ງຂັນລາຍການຕ່າງໆ ທີ່ສາມາດຍາດໄດ້ຫລຽນລາງວັນ ມາໃຫ້ປະເທດຊາດ ເປັນຕົ້ນແມ່ນສຳເລັດການເຂົ້າຮ່ວມແຂ່ງຂັນງານກີລາເອຊຽນເກມ ຄັ້ງທີ 18 ທີ່ປະເທດອິນໂດເນເຊຍ, ສາມາດຍາດໄດ້ 2 ຫລຽນເງິນ ແລະ 3 ຫລຽນທອງ, ເອຊຽນພາລາເກມ ຄັ້ງທີ 12 ປີ 2018 ທີ່ປະເທດອິນໂດເນເຊຍ ສາມາດຍາດໄດ້ 1 ຫລຽນຄຳ ຈາກປະເພດກີລາຍົກນໍ້າໜັກດ່ຽວຊາຍ, ເຂົ້າຮ່ວມແຂ່ງຂັນກີລາໂວວີນາມ ຊີງແຊ້ມອາຊຽນ ຄັ້ງທີ 5 ທີ່ນະຄອນເນປີດໍ ປະເທດມຽນມາ ສາມາດຍາດໄດ້ 1 ຫລຽນຄຳ, 3 ຫລຽນເງິນ ແລະ 1 ຫລຽນທອງ, ເຂົ້າຮ່ວມແຂ່ງຂັນກີລາກະຕໍ້ຊີງແຊັມໂລກ ຄັ້ງທີ 33 ທີ່ປະເທດໄທ ສາມາດຍາດໄດ້ 2 ຫລຽນຄຳ, 1 ຫລຽນເງິນ ແລະ 1 ຫລຽນທອງ. ຕໍ່ກັບຜົນງານດັ່ງກ່າວ, ລັດຖະບານ ແຫ່ງ ສປປ ລາວ ໄດ້ປະດັບຫລຽນໄຊແຮງງານ ຊັ້ນ I ໃຫ້ 14 ທ່ານ ແລະ 2 ກົມກອງ ທີ່ໄດ້ຈາກການເຂົ້າຮ່ວມແຂ່ງຂັນກີລາກະຕໍ້ຊີງແຊ້ມໂລກ ຄັ້ງທີ 33 ແລະ ກີລາເອຊຽນພາຣາເກມ ຄັ້ງທີ 12; ປະດັບຫລຽນໄຊແຮງງານຊັ້ນ II ໃຫ້ 26 ທ່ານ ແລະ 4 ກົມກອງ ທີ່ໄດ້ຈາກການເຂົ້າຮ່ວມແຂ່ງຂັນກີລາເອຊຽນເກມ ຄັ້ງທີ 18, ປະດັບຫລຽນໄຊແຮງງານຊັ້ນ III ໃຫ້ 26 ທ່ານ ແລະ 1 ກົມກອງ, ປະດັບຫລຽນກາແຮງງານ ໃຫ້ 26 ທ່ານ ແລະ ມອບໃບຍ້ອງຍໍລັດຖະບານໃຫ້ 2 ທ່ານ ແລະ 21 ກົມກອງ.

ໃນ​​ໂອກາດ​ດຽວ​ກັນ, ທ່ານ ທອງລຸນ ສີສຸລິດ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດອັນໃຫຍ່ຫລວງ ຂອງຄະນະນຳຄູເຝິກ ແລະ ນັກກີລາ ທຸກຄົນ ທີ່ໄດ້ສຸມສະຕິປັນຍາ ແລະ ເຫື່ອແຮງຂອງຕົນຈົນສາມາດສ້າງຊື່ສຽງມາໃຫ້ປະເທດຊາດ. ພ້ອມ​​ເນັ້ນ​ໃຫ້ຄະນະພັກ, ຄະນະນຳ ກະຊວງສຶກສາທິການ ແລະ ກີລາ ເອົາໃຈໃສ່ຊີ້ນຳວຽກງານແນວຄິດການເມືອງ ໃຫ້ບັນດາສະຫະພັນກີລາແຫ່ງຊາດລາວ, ຄູເຝິກ ແລະ ນັກກີລາ ໃຫ້ໄປຕາມທິດຫັນປ່ຽນໃໝ່ຂອງພັກ-ລັດ, ໃຫ້ສືບຕໍ່ມູນເຊື້ອທີ່ດີງາມໃນການສ້າງ ແລະ ພັດທະນາວຽກງານກີລາ ທີ່ມີແລ້ວນັ້ນໃຫ້ດີຂຶ້ນກວ່າເກົ່າ; ສ້າງນັກກີລາ ໃນລະດັບເຍົາວະຊົນໄວ້ເປັນພື້ນຖານ; ສ້າງທຸກເງື່ອນໄຂໃຫ້ມີການ ພັດທະນາກີລາ ແບບຕໍ່ເນື່ອງ ເພື່ອເຮັດໃຫ້ນັກກີລາຂອງລາວເຮົາ ເປັນທີ່ຍອມຮັບຂອງນາໆຊາດ.

Be the first to comment

Leave a Reply

Your email address will not be published.


*