ແມ່ໃຈໂຫດ ຄາດຕະກຳລູກຊາຍ 5 ປີ ກົດນໍ້າຈົນຕາຍ ຕັດຫົວຢັດໃສ່ຖົງດໍາຖິ້ມຂີເຫຍື້ອ

ສຳນັກຂ່າວຕ່າງປະເທດ ແລະ ເວັບໄຊເດລີ່ເມລ ລາຍງານ ວັນທີ່ 6 ທັນວາ 2018 ວ່າ ເຈົ້າໜ້າທີ່ຕໍາຫຼວດສະຫະລັດ ຈັບກຸມ ນາງ ຫລີ່ຮຸ່ຍ ຫລິວ ຍິງໄວ 43 ປີ ທີ່ເຮືອນພັກໃນເມືອງຮິວສຕັນ ລັດເທັກຊັສ ປະເທດສະຫະລັດອາເມຣິກາ ຫຼັງກໍ່ເຫດສຸດໂທດ ຈັບລູກຊາຍໄວ 5 ປີກົດຫົວຈົມນໍ້າເສຍຊີວິດ ເມື່ອວັນສຸກ 30 ພະຈິກ ທີ່ຜ່ານມາ ຈາກນັ້ນເຂົາຍັງຕັດຫົວລູກຊາຍ ແລະ ນໍາຮ່າງ ແລະ ຫົວຢັດໃສ່ຖົງດໍາຖິ້ມລົງຖັງຂີ້ເຫຍື້ອ

ນາງ ຫລີ່ຮຸ່ຍ ຫລິວ

ຂ່າວແຈ້ງວ່າ ສາມີຂອງນາງຫລິວ ເປັນຄົນໂທລະສັບແຈ້ງຕໍາຫຼວດ ເນື່ອງມາຈາກເຂົາເລີກວຽກ ແລະ ກັບມາເຖິງບ້ານ ນາງ ຫລິວ ພັນລະຍາໄດ້ບອກກັບເຂົາວ່າ ເຂົາສົ່ງລູກຊາຍໄປທີ່ອື່ນແລ້ວ ແລະ ເມື່ອຫຼັງຈາກສາມີຂອງນາງ ຫລິວເລີ່ມຄົ້ນຫາລູກຊາຍດ້ວຍຄວາມຮ້ອນໃຈ ໃນທີ່ສຸດ ນາງ ຫລິວ ພັນລະຍາໄດ້ຍອມຮັບກັບສາມີວ່າ ສົບຂອງລູກຊາຍຢູ່ໃນຖັງຂີ້ເຫຍື້ອ ກ່ອນທີ່ເຂົາຈະໄປທີ່ຖັງຂີ້ເຫຍື້ອໃນໂຮງລົດ ຕາມຄໍາບອກຂອງພັນລະຍາ ແລະ ພົບຮ່າງ ແລະ ຫົວຂອງລູກຊາຍຢູ່ໃນຖົງດໍາ

 

ເມື່ອເຈົ້າໜ້າທີ່ຕໍາຫຼວດໃນພື້ນທີ່ມາເຖິງທີ່ເກີດເຫດ ນອກຈາກຈະພົບຮ່າງຂອງເດັກຊາຍເຄະຮ້າຍຖືກແມ່ຂ້າໂຫດແລ້ວ ຕໍາຫຼວດຍັງພົບມີດເປື້ອນເລືອດຢູ່ໃນຫ້ອງນໍ້າ ແລະ ພົບເລືອດສາດກະເດັນໃນອ່າງອາບນໍ້າອີກດ້ວຍ ຈາກນັ້ນເຈົ້າໜ້າທີ່ຕໍາຫຼວດຈຶ່ງໄດ້ຈັບກຸມ ແລະ ນໍາຕົວນາງຫລິວໄປຄວບຄຸມຕົວທີ່ສະຖານີຕໍາຫຼວດ ກ່ອນຕໍ່ມາເຂົາໄດ້ຮັບສາລະພາບວ່າລົງມືຂ້າບຸດຊາຍດ້ວຍການກົດໃຫ້ຈົມນໍ້າ ແຕ່ບໍ່ຍອມເຜີຍລາຍລະອຽດກ່ຽວກັບການຕັດຫົວລູກຊາຍ

 

ຂ່າວແຈ້ງດ້ວຍວ່າ ສາມີພັນລະຍາຄູ່ນີ້ຍັງມີບຸດສາວ ອາຍຸ 13 ປີອີກ 1 ຄົນ ແຕ່ວ່າຍັງບໍ່ເປັນທີ່ຊັດເຈນວ່າຂະນະເກີດເຫດສະຫຼົດໃນບ້ານ ບຸດສາວຢູ່ໃນບ້ານດ້ວຍຫຼືບໍ່ ໂດຍຂະນະນີ້ນາງ ຫລິວ ຖືກຕັ້ງຂໍ້ຫາຄາດຕະກຳລູກຊາຍ ແລະຈະຖືກນໍາຕົວຂື້ນສານດໍາເນີນຄະດີຕໍ່ໄປ.

Be the first to comment

Leave a Reply

Your email address will not be published.


*