ອາເມຣິກາ ຮຽກຮ້ອງກໍາປູເຈຍຟື້ນຟູເສລີພາບສື່ມວນຊົນ

ສໍານັກຂ່າວຕ່າງປະເທດລາຍງານຈາກນະຄອນພະນົມເປນ ປະເທດກໍາປູເຈຍ ເມື່ອວັນທີ່ 7 ທັນວາ 2018 ວ່າສະຖານະການເອກອັກຄະລັດຖະທູດປະຈໍານະຄອນພະນົມເປນ ອອກຖະແຫຼງການເມື່ອວັນພະຫັດ ຮຽກຮ້ອງໃຫ້ລັດຖະບານຂອງສົມເດັດຮຸນ ເຊັນ ຟື້ນຟູເສລີພາບສື່ມວນຊົນດ້ວຍການຜ່ອນຄາຍຄວາມເຂັ້ມງວດໃນການເຮັດວຽກຂອງນັກຂ່າວ ການຖອນຟ້ອງ ທ່ານ ເກິມ ສຸຂາ ຜູ້ນໍາຝ່າຍຄ້ານເຊິ່ງເປັນອາດີດພັກກູ້ຊາດກໍາປູເຈຍ (ຊີເອັນອາຣພີ) ທີ່ສານດີກາສັ່ງຢຸບໄປເມື່ອເດືອນພະຈິກປີຜ່ານມາ ຕະຫຼອດຈົນການເພີ່ມການປ່ອຍໂຕນັກໂທດການເມືອງ ແລະ ການຍົກເລີກການຫ້າມຈັດກິດຈະກໍາການເມືອງຂອງຝ່າຍກົງກັນຂ້າມລັດຖະບານ ທີ່ປັດຈຸບັນຢູ່ພາຍໃຕ້ການປົກຄອງໂດຍ “ລັດຖະບານພັກດຽວ” ຂອງພັກປະຊາຊົນກໍາປູເຈຍ (ຊີພີພີ)

ຖະແຫຼງການດັ່ງກ່າວຂອງເອກອັກຄະລັດຖະທູດສະຫະລັດເກີດຂື້ນພຽງບໍ່ເທົ່າໃດວັນ ຫຼັງກະຊວງປ້ອງກັນປະເທດກໍາປູເຈຍປະກາດຄືນໃບອະນຸດຍາດໃຫ້ກັບສະຖານີວິທະຍຸເອເຊຍເສລີ (ອາຣເອຟເອ) ແລະ ວອຍອອຟອາເມຣິກາ (ວີໂອເອ) ພາກພາສາຂະເໝນ ຢ່າງໃດກໍ່ຕາມ ທ່ານ ເຟີຍ ສີຟັນ ໂຄສົກຄະນະລັດຖະບານກໍາປູເຈຍ ກ່າວເຖິງຖະແຫຼງການດັ່ງກ່າວຂອງສະຖານເອກອັກຄະລັດຖະທູດສະຫະລັດ ວ່າມີເຈດຕະນາແອບແຝງຂອງການ “ຄອບງໍາ” ສະຖານະການການເມືອງໃນກໍາປູເຈຍ

ສະນັ້ນສະພາແຫ່ງຊາດໃນນະຄອນພະນົມເປນຢູ່ລະຫວ່າງການອະພິປາຍ ທີ່ອາດນໍາໄປສູ່ການຍົກເລີກການຕັດສິນທາງການເມືອງດົນເຖິງ 5 ປີ ສໍາລັບອາດີດສະມາຊິກພັກຊີເອັນອາຣພີຫຼາຍກວ່າ 100 ຄົນ ເພື່ອເປີດໂອກາດໃຫ້ນັກການເມືອງກຸ່ມນີ້ກັບຄືນສູ່ສະໜາມການເມືອງໄດ້ອີກຄັ້ງ ຫຼັງຄະນະກໍາມາທິການຢູໂຣບ (ອີຊີ) ກຽມຖອນສິດທິປະໂຫຍດທາງການຄ້າຂອງກໍາປູເຈຍໃນການເຂົ້າເຖິງລະບົບຕະຫຼາດດຽວຂອງສະພາບຢູໂຣບ ທີ່ເປັນໂຄຕ້າສົ່ງອອກສິນຄ້າເປັນກໍລະນີພິເສດໃຫ້ແກ່ “ກຸ່ມປະເທດພັດທະນານ້ອຍທີ່ສຸດ” ( Least Developed Countries : LLDGs ) ເພື່ອຊ່ວຍກະຕຸ້ນເສດຖະກິດຂອງກຸ່ມປະເທດເຫຼົ່ານີ້ ແຕ່ໂຄຕານັ້ນໃຫ້ຍົກເວັ້ນສິນຄ້າຈໍາພວກອາວຸດຍຸດໂທປະກອນ ( Everything but Arms : EBA ) ແລະ ສົມເດັດຮຸນ ເຊັນ ບໍ່ປະສົບຄວາມສໍາເລັດໃນການເຈລະຈາເລື່ອງນີ້ກັບເຈົ້າໜ້າທີ່ລະດັບສູງຂອງສະຫະພາບຢູໂຣບ (ອີຢູ) ລະຫວ່າງການປະຊຸມສຸດຍອດຜູ້ນໍາເອເຊຍ-ຢູໂຣບ (ອາເຊມ) ທີ່ນະຄອນບຣັສເຊລສ ເມືອງຫຼວງຂອງເບລຢ້ຽມ ເມື່ອເດືອນຕຸລາ ທີ່ຜ່ານມາ.

Be the first to comment

Leave a Reply

Your email address will not be published.


*