ອາເມຣິກາ ຂາດດຸນການຄ້າສູງສຸດໃນຮອບ 10 ປີ

ສຳນັກຂ່າວຕ່າງປະເທດລາຍງານໃນວັນທີ 7 ທັນວາ 2018 ວ່າ ຍອດຂາດດຸນການຄ້າຂອງສະຫະລັດໃນເດືອນຕຸລາ ເພີ່ມຂື້ນເຖິງລະດັບສູງສຸດໃນຮອບ 10 ປີ ໂດຍເພີ່ມຂື້ນ 1,7% ເປັນ 55.500 ລ້ານໂດລາ ຜົນພວງຈາກປະລິມານການນໍາເຂົ້າສິນຄ້າເພີ່ມຂື້ນສູງສຸດເຮັດສະຖິຕິໃໝ່

REUTERS/Peter Nicholls/File Photo

ກະຊວງການຄ້າສະຫະລັດ ເປີດເຜີຍເມື່ອວັນພະຫັດ 6 ທັນວາ ວ່າ ນະໂຍບາຍກໍາແພງພາສີທີ່ລັດຖະບານພາຍໃຕ້ການນໍາຂອງປະທານາທິບໍດີໂດນັລ ທຣັມ ນໍາມາໃຊ້ກັບສິນຄ້ານໍາເຂົ້າຈາກຕ່າງປະເທດ ໂດຍສະເພາະສິນຄ້າຈີນບໍ່ໄດ້ຊ່ວຍໃຫ້ລັດຖະບານສະຫະລັດຂາດດຸນຫຼຸດລົງ

ທັງນີ້ ສະຫະລັດຂາດດຸນການຄ້າກັບຈີນໃນເດືອນຕຸລາ ເພີ່ມຂື້ນ 2% ຢູ່ທີ່ລະດັບ 38.000 ລ້ານໂດລາ ສ່ວນໜຶ່ງເປັນເພາະສະຫະລັດສົ່ງອອກສິນຄ້າກະສິກຳໄປຍັງຕະຫຼາດຈີນໜ້ອຍລົງ ເພາະມາດຕາການຕອບໂຕ້ທາງການຄ້າຈາກລັດຖະບານຈີນ ຂະນະທີ່ຕົວເລກການນໍາເຂົ້າສິນຄ້າຂອງສະຫະລັດເພີ່ມຂື້ນ 1,5% ເປັນ 266.000 ລ້ານໂດລາສະຫະລັດ


ປັດໃຈສໍາຄັັນອີກປະການໜຶ່ງທີ່ເຮັດໃຫ້ສະຫະລັດຂາດດຸນການຄ້າເພີ່ມຂື້ນ ຄືຄ່າເງິນໂດລາທີ່ແຂງຂື້ນ ເຮັດໃຫ້ສະຫະລັດສົ່ງອອກໄດ້ໜ້ອຍລົງ ແລະ ຊາວອາເມຣິກາເດີນທາງໄປທ່ອງທ່ຽວປະເທດອື່ນຫຼາຍຂື້ນ ໂດຍມູນຄ່າການໃຊ້ຈ່າຍດ້ານການທ່ອງທ່ຽວຂອງຊາວອາເມຣິກາໃນຕ່າງປະເທດເພີ່ມຂື້ນ 200 ລ້ານໂດລາ ເຮັດໃຫ້ການນໍາເຂົ້າພາກບໍລິການຂອງສະຫະລັດ ເພີ່ມຂື້ນເກືອບ 47.000 ລ້ານໂດລາ


ນັກວິເຄາະໃຫ້ຄວາມເຫັນວ່າ ຕົວເລກຂາດດຸນການຄ້າທີ່ເພີ່ມຂື້ນນີ້ຈະເຮັດໃຫ້ອັດຕາການຂະຫຍາຍຕົວຂອງເສດຖະກິດໃນໄຕມາດສຸດທ້າຍຂອງປີນີ້ຊະລໍໂຕລົງ.

Be the first to comment

Leave a Reply

Your email address will not be published.


*