ຢູໂຣບ ປະຕິບັດການກວາດລ້າງແກ໊ງມາເຟຍຄັ້ງໃຫຍ່

ສໍານັກຂ່າວຕ່າງປະເທດລາຍງານຈາກນະຄອນໂຣມ ປະເທດອີຕາລີ ເມື່ອວັນທີ່ 6 ທັນວາ 2018 ວ່າສໍານັກງານຕໍາຫຼວດແຫ່ງຊາດຂອງອີຕາລີອອກຖະແຫຼງການເມື່ອວັນພະຫັດ ກ່ຽວກັບການປະຕິບັດດ້ານຄວາມໝັ້ນຄົງເຊິ່ງເປັນຄວາມຮ່ວມມືລະຫວ່າງລັດຖະບານອີຕາລີກັບຫຼາຍປະເທດໃນຢູໂຣບ ແລະ ລາຕິນອາເມຣິການໍາໄປສູ່ການກວາດລ້າງເຄືອຂ່າຍມາເຟຍ “ເອັນດຣັງເກຕາ” ທີ່ເປັນພາສາກຣີກໝາຍຄວາມວ່າ “ວິລະບູລຸດ” ແລະ ສ້າງອິດທິພົນຈາກການຄ້າຢາເສບຕິດ


ປັດຈຸບັນເອັນດຣັງເກຕາຖືວ່າຊົງອິດທິພົນ ສູສີກັບເຄືອຂ່າຍອົງກອນອາດຊະຍາກໍາ “ຄໍຊາ ນອສຕຣາ” ມາເຟຍແຫ່ງຊີຊີລີເຊິ່ງເຄີຍຍິ່ງໃຫຍ່ ທີ່ສຸດໃນອີຕາລີ ເນື່ອງຈາກເຈົ້າໜ້າທີ່ຫາກໍ່ຈັບກຸມ ທ້າວ ເຊດຕິມິ ມິເນໂອ ໄວ 80 ປີ ເຈົ້າຂອງສາຍາ “ລາຊາແຫ່ງມາເຟຍ” ຜູ້ນໍາສູງສຸດຄົນໃໝ່ຂອງຄໍຊາ ນອສຕຣາ ໄດ້ເມື່ອວັນອັງຄານທີ່ຜ່ານມາ ພ້ອມຜູ້ຕ້ອງສົງໄສຮ່ວມຂະບວນການອີກ 45 ຄົນ ສ່ວນເອັນດຣັງເກຕາຖືເປັນໜຶ່ງໃນອົງກອນອາດຊະຍາກໍາເກົ່າແກ່ທີ່ສຸດຂອງອີຕາລີ ໂດຍດໍາເນີນກິດຈະການມາຕັ້ງແຕ່ປີ 1890


ຂະນະທີ່ປະຕິບັດການຂອງເຈົ້າໜ້າທີ່ຕໍ່ເຄືອຂ່າຍເອັນດຣັງເກຕານໍາໄປສູ່ການຈັບກຸມຜູ້ຕ້ອງສົງໄສລວມກັນຢ່າງໜ້ອຍ 90 ຄົນ ທັງໃນອີຕາລີ ເຢຍລະມັນ ແລະ ເນເທີແລນ ພ້ອມກັບຂອງກາງເປັນໂຄເຄນນໍ້າໜັກກວ່າ 3 ໂຕນ ແລະ ຢາອີນໍ້າໜັກລວມ 140 ກິໂລກຼາມ ນອກຈາກນີ້ ເຈົ້າໜ້າທີ່ຂອງອີຕາລີຍັງຍົກກໍາລັງກວດຄົ້ນຮ້ານອາຫານຫຼາຍແຫ່ງທີ່ເປີດ “ກິດຈະການບັງໜ້າ” ດ້ວຍການຂາຍກະແລ້ມ ເພື່ອການກວດສອບຂະຫຍາຍຜົນຕໍ່ໄປ


ດ້ານຄະນະກໍາມາທິການຄວາມຮ່ວມມືລະບົບຍຸດຕິທໍາຢູໂຣບ (ຢູໂຣຈັສ) ລາຍງານວ່າໜ່ວຍງານທີ່ກ່ຽວຂ້ອງຮ່ວມກັນວາງແຜນປະຕິບັດການຄັ້ງນີ້ທີ່ໃຊ້ລະຫັດວ່າ “ໂປລລິໂນ” ມາຕັ້ງແຕ່ປີ 2016

Be the first to comment

Leave a Reply

Your email address will not be published.


*