ໂປຣຕຸເກດ ເຂົ້າຮ່ວມເປັນຫຸ້ນສ່ວນ “ໜຶ່ງແລວໜຶ່ງເສັ້ນທາງ” ຂອງຈີນ

ສໍານັກຂ່າວຕ່າງປະເທດລາຍງານຈາກນະຄອນລິສບອນ ປະເທດໂປຣຕຸເກດ ເມື່ອວັນທີ່ 6 ທັນວາ 2018 ວ່າ ປະທານາທິບໍດີສີ ຈິ້ນຜິງ ແລະ ນາຍົກລັດຖະມົນຕີອັນນິໂອ ຄອສຕາ ຮ່ວມກັນເປັນສັກຂີພະຍານໃນພິທີລົງນາມຂໍ້ຕົກລົງຄວາມຮ່ວມມືລະດັບທະວີພາຄີ 17 ສະບັບ ໃນພິທີເຊິ່ງມີຂື້ນທີ່ ທໍານຽບລັດຖະບານຊານນະຄອນລິສບອນ ເມື່ອວັນພຸດທີ່ຜ່ານມາ ໂດຍເນື້ອໃນສໍາຄັນຂອງຂໍ້ຕົກລົງສ່ວນໃຫຍ່ກ່ຽວຂ້ອງກັບການຂະຫຍາຍໂອກາດການລົງທຶນຂອງຈີນໃນໂປຣຕຸເກດໂດຍສະເພາະໃນດ້ານທີ່ກ່ຽວຂ້ອງກັບພະລັງງານ ແລະ ການພັດທະນາລະບົບໂຄງສ້າງພື້ນຖານ ທີ່ລວມເຖິງການຍົກລະດັບຄວາມຮ່ວມມືດ້ານໂຄງການຄົມມະນາຄົມ ແລະ ເທັກໂນໂລຢີການສື່ສານ


ທັງນີ້ ທ່ານຄອສຕາ ກ່າວວ່າໂປຣຕຸເກດ “ຍິນດີເປີດໂອກາດ” ໃຫ້ກັບໂຄງການຂອງຫົວເວີ່ຍ ແມ່ນວ່າສະຫະລັດ ແລະ ພັນທະມິດຫຼາຍປະເທດທະຍອຍອອກມາດຕາການ “ກີດກັນ” ການດໍາເນີນງານຂອງຍັກໃຫຍ່ດ້ານໂທລະຄົມຈາກຈີນແຫ່ງນີ້ແລ້ວກໍ່ຕາມ ໂດຍໃນການນີ້ບໍລິສັດເອັມອີໂອ ຜູ້ໃຫ້ບໍລິການເຄືອຂ່າຍໂທລະສັບເຄື່ອນທີ່ ແລະ ອິນເຕີເນັດຂອງໂປຣຕຸເກດລົງນາມໃນຂໍ້ຕົກລົງກັບຫົວເວີ່ຍ ເພື່ອໃຫ້ບໍລິສັດຈາກຈີນເປັນຜູ້ວາງລະບົບໂຄງຂ່າຍ “5ຈີ” ໃນໂປຣຕຸເກດ ນອກຈາກນີ້ ທ່ານຄອສຕາຍັງກ່າວເຖິງການບັນລຸຂໍ້ຕົກລົງກັບລັດຖະບານຈີນ ໃນການດໍາເນີນງານໂຄງການ “ປະຕິຮູບ” ພື້ນທີ່ໃນເມືອງໄຊສທີ່ຢູ່ແຄມຝັ່ງທາງຕາເວັນຕົກສຽງໃຕ້ຂອງປະເທດໃຫ້ເປັນທ່າເຮືອນໍ້າເລິກເພື່ອເປັນເສັ້ນທາງເຊື່ອມຕໍ່ກັບແຜນຍຸດທະສາດ “ເສັ້ນທາງສາຍໄຫມແຫ່ງສັດຕະວັດທີ່ 21” ຫຼື “ໜຶ່ງແລວໜຶ່ງເສັ້ນທາງ” ຂອງຈີນອີກດ້ວຍ


ນັບຕັ້ງແຕ່ຜ່ານພົ້ນວິກິດການເງິນໂລກລະຫວ່າງປີ 2008-2009 ໂປຣຕຸເກດໄດ້ຮັບເງິນຊ່ວຍເຫຼືອຈາກຈີນໄປແລ້ວຫຼາຍກວ່າ 8.000 ລ້ານໂດລາສະຫະລັດ ຂະນະທີ່ສໍາລັບການຢ້ຽມຢາມໂປຣຕຸເກດຂອງທ່ານ ສີ ຈິ້ນຜິງ ແລະ ຄະນະເກີດຂື້ນຫຼັງການຢ້ຽມຢາມນະຄອນມາດຣິດ ແລະ ນາຍົກລັດຖະມົນຕີເປໂດ ຊານເຊຊ ຜູ້ນໍາສະເປນເຊິ່ງເປັນປະເທດເພື່ອນບ້ານຂອງໂປຣຕຸເກດ ສະແດງຄວາມສົນໃຈເຂົ້າຮ່ວມເປັນຫຸ້ນສ່ວນຍຸດທະສາດຕໍ່ໂຄງການໜຶ່ງແລວໜຶ່ງເສັ້ນທາງຫຼາຍລາຍການເຊັ່ນກັນ.

 

Be the first to comment

Leave a Reply

Your email address will not be published.


*