ປກສ ເມືອງບຸນເໜືອ ກັກຕົວຜູ້ຕ້ອງຫາ ພ້ອມຂອງກາງຝິ່ນ ນ້ຳໜັກ 9 ກິໂລກຼາມ

ເຈົ້າໜ້າທີ່ ປກສ ເມືອງບຸນເໜືອ ແຂວງຜົ້ງສາລີ ກວດຄົ້ນລົດເປົ້າໝາຍຂົນຢາເສບຕິດ ພົບຂອງກາງຢາເສບຕິດ ປະເພດຢາຝິ່ນ ນ້ຳໜັກ 9 ກິໂລກຼາມ ພ້ອມກັກຕົວຜູ້ຖືກຫາ ອາຍຸ 41 ປີ ໄປສອບສວນໃນທ້າຍເດືອນທີ່ຜ່ານມາ.

ຜ່ານການສອບສວນຜູ້ຖືກຫາ ຊື່ທ້າວ ກຸ່ມແສງນ້ອຍ ອາຍຸ 41 ປີ ຢູ່ບ້ານບໍ່ຊາວ ເມືອງຍອດອູ ແຂວງຜົ້ງສາລີ, ໃນເບື້ອງຕົ້ນການສະກັດຈັບຜູ້ຂົນຝິ່ນຄັ້ງນີ້ ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ເມືອງບຸນເໜືອ ແຂວງຜົ້ງສາລີ ໄດ້ຮັບລາຍງາຍ ໃນວັນທີ 27 ພະຈິກ 2018 ວ່າ: ມີຊາຍອາຍຸປະມານ 40 ປີ ຂົນສົ່ງຢາເສບຕິດ ປະເພດຢາຝິ່ນຫຼາຍກິໂລກຼາມ ຜ່ານເມືອງບຸນເໜືອ

 

ຈຶ່ງນໍາກໍາລັງລົງຕັ້ງຈຸດສະກັດຢູ່ເສັ້ນທາງລະຫວ່າງເມືອງບຸນເໜືອ ຫາ ເມືອງຍອດອູ ແຂວງຜົ້ງສາລີ. ຈາກນັ້ນ, ເຫັນລົດວີໂກ ສີປອນຂາວ ປ້າຍທະບຽນ ກມ 5259 ກໍາແພງນະຄອນ ແລ່ນຜ່ນມາເສັ້ນທາງດັ່ງກ່າວ ເຈົ້າໜ້າທີ່ຕຳຫຼວດ ຈຶ່ງລັດເຂົ້າກວດຄົ້ນ ພົບຝິ່ນ ນ້ຳໜັກ 9 ກິໂລກຼາມ ຊຸກເຊື່ອງໄວ້ຢູ່ກ້ອງເບາະນັ່ງດ້ານຫຼັງຄົນຂັບ ພ້ອມເງິນ 260.000 ກີບ.

ທ້າວ ກຸ່ມແສງນ້ອຍ ສາລະພາບໃນເບື້ອງຕົ້ນວ່າ: ຝິ່ນຈຳນວນ 9 ກິໂລກຼາມ ຈະເອົາໄປສົ່ງໃຫ້ຜູ້ສັ່ງຊື້ຢູ່ພາຍໃນເທດສະບານແຂວງຜົ້ງສາລີ, ສ່ວນຢາຝິ່ນແມ່ນຊື້ນຳປະຊາຊົນຜູ້ທີ່ລັກລອບປູກ, ຄະດີນີ້ ເຈົ້າໜ້າທີ່ຍັງສືບຕໍ່ສອບສວນຫາທີ່ມາຂອງຝິ່ນ ເພື່ອປະສານພາກສ່ວນ ທີ່ກ່ຽວຂ້ອງລົງແກ້ໄຂທຳລາຍສວນຝິ່ນທີ່ຍັງລັກລອບປູກໃຫ້ໝົດໄປ.

ທີ່ມາ: ໜັງສືພີມຄວາມສະຫງົບ

Be the first to comment

Leave a Reply

Your email address will not be published.


*