ມອບ-ຮັບອາຄານຮຽນ ມສ ສີທ່ານາໄຊຫຼັງໃໝ່ ສາຍໃຈລາວ – ຫວຽດນາມ

ພິທີມອບຮັບ ແລະ ເປີດນໍາໃຊ້ອາຄານໂຮງຮຽນ ມສ ສີທ່ານາໄຊ ເມືອງປາກຊັນ ແຂວງບໍລິຄໍາໄຊ ໄດ້ຈັດຂຶ້ນໃນວັນທີ 11 ພະຈິກຜ່ານມາ ທີ່ໂຮງຮຽນດັ່ງກ່າວ ໂດຍໃຫ້ກຽດ ເຂົ້າຮ່ວມຂອງທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ທ່ານ ຮວ່າງກົງຮວ່ານ ຮອງຫົວໜ້າຫ້ອງວ່າການສູນກາງພັກກອມມູນິດຫວຽດນາມ, ທ່ານ ຄຳເກີດ ເວີນຄຳ ຮອງຫົວໜ້າຫ້ອງວ່າການສູນ ກາງພັກປະຊາຊົນ ປະຕິວັດລາວ, ມີບັນດາການນຳແຂວງບໍລິຄຳໄຊ, ການນຳຫວຽດນາມ ຕະຫຼອດຮອດຄູອາຈານ ແລະ ນັກຮຽນເຂົ້າຮ່ວມ.

 

ທ່ານ ເຈີນວັນຄາງ ຫົວໜ້າຄຸ້ມຄອງໂຄງການກິດຈະການກໍ່ສ້າງອາຄານຮຽນຫຼັງດັ່ງກ່າວ ໄດ້ລາຍງານກ່ຽວກັບສະພາບການກໍ່ສ້າງໃຫ້ຮູ້ວ່າ: ອາຄານໂຮງຮຽນ ມສ ສີທ່ານາໄຊ ແມ່ນໄດ້ເລີ່ມກໍ່ສ້າງມາແຕ່ເດືອນພະຈິກ ປີ 2017 ມາຮອດປັດຈຸບັນແມ່ນໄດ້ສຳເລັດ100% ແລະ ທັນຕາມກຳນົດເວລາພ້ອມທັງຮັບປະກັນທາງດ້ານມາດຕະ ຖານເຕັກນິກການກໍ່ສ້າງ. ອາຄານຮຽນຫຼັງດັ່ງກ່າວນີ້ເປັນອາຄານເບຕົງເສີມເຫຼັກ ມີ 4 ຊັ້ນ, ມີ 8 ຫ້ອງຮຽນ, 2 ຫ້ອງທົດລອງ,1 ຫ້ອງປະຊຸມ ແລະ ຫ້ອງຄະນະອຳນວຍການ, ຄູອາຈານ ຈຳນວນ 8 ຫ້ອງ, ປະກອບມີລະບົບໄຟຟ້າ, ນຳ້ປະປາ ແລະ ລະບົບປ້ອງກັນອັກຄີໄພ, ມີອຸປະກອນຕູ້ໃສ່ເອກະສານໃນທຸກໆຫ້ອງການ ແລະ ຫ້ອງປະຊຸມ, ໃນຫ້ອງຮຽນແມ່ນມີໂຕະຕັ່ງ ອຸປະກອນຮັບໃຊ້ການທົດລອງການຮຽນການສອນຄົບຊຸດ, ລວມມູນຄ່າການກໍ່ສ້າງທັງໝົດ 30 ຕື້ດົງ ໂດຍໄດ້ຮັບທຶນການຊ່ວຍເຫຼືອຈາກທ່ານ ຫງວຽນຝູຈ້ອງ ເລ ຂາທິການໃຫຍ່ສູນກາງພັກກອມມູນິດຫວຽດນາມ.

ໃນພິທີການນຳຂອງແຂວງບໍລິຄຳໄຊ ແລະ ການນຳຂອງ ສສ ຫວຽດນາມ ໄດ້ມີຄຳເຫັນສະແດງຄວາມຍ້ອງຍໍຊົມເຊີຍປີຕິຊົມຊື່ນຕໍ່ຜູ້ຮັບເໝົາກໍ່ສ້າງອາຄານໂຮງຮຽນຫຼັງດັ່ງກ່າວແມ່ນຖືກຕ້ອງຕາມເງື່ອນໄຂສັນຍາ ແລະ ຂອບໃຈອັນລົ້ນເຫຼືອມາຍັງທ່ານ ຫງວຽນຝູຈ້ອງ ທີ່ໄດ້ມອບເປັນຂອງຂວັນອັນລຳ້ຄ່າ ແລະ ປະ ເສີດຢ່າງຍິ່ງໃຫຍ່ໃຫ້ແກ່ປະ ຊາຊົນລາວ ເວົ້າລວມ, ເວົ້າສະ ເພາະ ກໍຄືຊາວແຂວງບໍລິຄຳໄຊ ທີ່ເປັນສັນຍາລັກສະແດງເຖິງຄວາມເປັນຫວ່ງເປັນໃຍຂອງສອງພັກສອງລັດ ທີ່ມີຕໍ່ການພັດທະນາຊັບພະຍາກອນມະນຸດ ເພື່ອສືບຕໍ່ພັດທະນາປະເທດຊາດ. ຈາກນັ້ນຜູ້ນຳທັງສອງຝ່າຍກໍໄດ້ຕັດແຖບຜ້າເພື່ອເປັນການຢັ້ງຢືນມອບຮັບ ແລະ ນຳໃຊ້ອາຄານຮຽນຫຼັງດັ່ງກ່າວຢ່າງເປັນທາງການ.

 

ໃນໂອກາດນີ້ ທ່ານ ເຈົ້າ ແຂວງບໍລິຄຳໄຊ ໄດ້ມອບໃບກຽດຕິຄຸນໃຫ້ 5 ກົມກອງ ແລະ ໃບຍ້ອງຍໍຂັ້ນແຂວງໃຫ້ບຸກຄົນ 5 ທ່ານ ເພື່ອຈາລຶກບຸນຄຸນ ແລະ ຄຸນງາມຄວາມດີຕໍ່ຜູ້ທີ່ມີຜົນງານປະກອບສ່ວນອັນໃຫຍ່ຫຼວງໃນການສ້າງສາພັດທະນາປະເທດຊາດ ກໍຄືຜົນສຳເລັດໃນການກໍ່ສ້າງອາຄານຮຽນ ມສ ສີທ່ານາໄຊໃນຄັ້ງນີ.

(ຂ່າວ: ຄຳຟອງ)

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *