“ຊາອຸ” ກຽມຫຼຸດກໍາລັງຜະລິດນ້ຳມັນລົງ 5 ແສນບາຣເຣລ/ວັນ ເລີ່ມເດືອນທັນວານີ້

ສຳນັກຂ່າວ ອາຫລັບນິວສ ລາຍງານ ໃນວັນທີ 13 ພະຈິກ 2018 ວ່າ ທ່ານ ຄາລິດ ອັລ-ຟາລີ ລັດຖະມົນຕີກະຊວງພະລັງງານຂອງຊາອຸດິອາຣະເບຍເປີດເຜີຍຫຼັງການປະຊຸມຮ່ວມກັບປະເທດຜູ້ສົ່ງອອກນໍ້າມັນອື່ນໆ ທັງທີ່ເປັນສະມາຊິກໂອເປກ ແລະ ນອກໂອເປກ ໃນເມືອງອາບູດາບີ ປະເທດສະຫະລັດອາຫລັບເອມິເຣດສ

(AP Photo/Kamran Jebreili)

ໂດຍກ່າວວ່າ “ຊາອຸໃນຖານະເປັນປະເທດຜູ້ຜະລິດ ແລະ ສົ່ງອອກນໍ້າມັນລາຍໃຫຍ່ຂອງໂລກຕ້ອງການປັບສົມດຸນໃຫ້ກັບຕະຫຼາດນໍ້າມັນໂລກພາຍໃຕ້ກອບທີ່ເໝາະສົມເຊິ່ງຈະເປັນປະເທດທໍາອິດທີ່ນຳໜ້າກ່ອນ” ທັງນີ້ລັດຖະບານຈຶ່ງຕັດສິນໃຈກຽມຫຼຸດກໍາລັງການຜະລິດນໍ້າມັນລົງ ຄາດວ່າຢ່າງໜ້ອຍ 500,000 ບາຣເຣລ/ວັນ ເລີ່ມເດືອນທັນວານີ້ເພື່ອຮັບມືກັບສະຖານະການລາຄານໍ້າມັນທີ່ຕົກລົງຢ່າງໜັກ ສົ່ງຜົນກະທົບຕໍ່ສະຖານະທາງການເງິນຂອງປະເທດສະມາຊິກໂອເປກ


ຂະນະດຽວກັນໃນຝັ່ງຂອງ “ຣັດເຊຍ” ຜູ້ແທນໄດ້ຢືນຢັນຕາມຂໍ້ຕົກລົງຂອງບ່ອນປະຊຸມວ່າຈະຮ່ວມກັນຫຼຸດກໍາລັງຜະລິດ ພຽງແຕ່ບໍ່ໄດ້ຕັດສິນໃຈຈະຫຼຸດລົງຈໍານວນເທົ່າໃດ
ນັກວິເຄາະກ່າວວ່າ ລາຄານໍ້າມັນດິບໄດ້ຮັບຜົນກະທົບຈາກການທີ່ຄວາມຕ້ອງການຂອງຜູ້ນໍາເຂົ້າຂະໜາດໃຫຍ່ຂອງໂລກ ຊະລໍການນໍາເຂົ້ານໍ້າມັນລົງ ອັນໄດ້ແກ່ຈີນ ອິນເດຍ ແລະ ອິນໂດເນເຊຍ


ຢ່າງໃດກໍ່ຕາມ ກ່ອນໜ້ານີ້ນັກວິເຄາະຈໍານວນຫຼາຍທີ່ປະເມີນວ່າ ສະພາວະນໍາເຂົ້ານໍ້າມັນທີ່ຊະລໍຕົວ ກຸ່ມຜູ້ຜະລິດ ແລະ ສົ່ງອອກນໍ້າມັນດິບຈໍາເປັນຕ້ອງຫຼຸດການຜະລິດລົງ ຢ່າງໜ້ອຍ 1 ລ້ານບາຣເຣລ/ວັນ ພາຍໃນປີ 2019 ໂດຍຄາດວ່າການປະຊຸມຂອງກຸ່ມໂອເປກ ທີ່ຈະກໍານົດນະໂຍບາຍການຜະລິດນໍ້າມັນອີກຄັ້ງ ໃນວັນທີ່ 6 ທັນວາ ທີ່ນະຄອນວຽນນາ ປະເທດອອສເຕຣຍ ອາດມີຄວາມຊັດເຈນຫຼາຍກວ່ານີ້

Be the first to comment

Leave a Reply

Your email address will not be published.


*