ຄັດເລືອກເອົານັກຮຽນເກ່ງ ເຂົ້າຮ່ວມແຂ່ງຂັນລະດັບອາຊຽນ

ການ​ແຂ່ງ­ຂັນ​ຖາມ-ຕອບ​ຄວາມ​ຮູ້​ກ່ຽວ​ກັບ​ອາ​ຊຽນ ລະ­ດັບ​ຊາດ (ASEAN Quiz) ຈັດ​ຂຶ້ນ​ວັນ​ທີ 9 ພະ­ຈິກ 2018 ຢູ່​ໂຮງ­ຮຽນ​ມັດ­ທະ­ຍົມ​ສຶກ​ສາ​ສົມ­ບູນ​ວຽງ​ຈັນ ໂດຍ​ມີ​ທ່ານ ບຸນ​ເລື່ອນ ບຸບ­ຜາ ຫົວ­ໜ້າ​ກົມ​ຮ່ວມ​ມື​ສາ­ກົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ພະ­ນັກ­ງານ ຄູ-ອາ­ຈານ ແລະ ນັກ­ຮຽນ​ເຂົ້າ​ຮ່ວມ.

 

ທ່ານ ວໍ­ລະ​ສັກ ປຣະ​ວົງ​ວຽງ​ຄຳ ຮອງ​ຜູ້­ອຳ­ນວຍ­ການ​ສະ­ຖາ­ນີ​ວິ­ທະ­ຍຸ​ແຫ່ງ​ຊາດ​ລາວ ຫົວ­ໜ້າ​ຄະ­ນະ​ຮັບ­ຜິດ­ຊອບ​ໂຄງ­ການ ASEAN Quiz ຂອງ ສປປ ລາວ ກ່າວ​ວ່າ: ໂຄງ­ການ​ດັ່ງ­ກ່າວ ໄດ້​ເລີ່ມ​ຄັດ​ເລືອກ​ລະ­ດັບ​ແຂວງ​ແຕ່​ເດືອນ​ຕຸ­ລາ 2018 ເປັນ­ຕົ້ນ​ມາ ຄັ້ງ​ນີ້​ຖື​ວ່າ​ເປັນ​ການ​ຄັດ​ເລືອກ​ຮອບ​ສຸດ​ທ້າຍ ເພື່ອ​ຄົ້ນ​ຫາ​ນັກ­ຮຽນ​ເຂົ້າ​ຮ່ວມ​ແຂ່ງ­ຂັນ​ລະ­ດັບ​ອາ​ຊຽນ ໃນ​ທ້າຍ​ປີ 2018 ຢູ່​ປະ­ເທດ​ອິນ​ໂດ​ເນ​ເຊຍ ໂຄງ­ການ​ນີ້​ມີ​ເປົ້າ​ໝາຍ​ສຳ­ຄັນ​ເພື່ອ​ໂຄ­ສະ­ນາ​ເຜີຍ­ແຜ່ ແລະ ສົ່ງ­ເສີມ​ນ້ຳ­ໃຈ​ອັນ​ດີ­ງາມ​ຂອງ​ການ​ແຂ່ງ­ຂັນ ເພື່ອ​ມິດ­ຕະ­ພາບ ແລະ ຄວາມ​ສາ­ມັກ­ຄີ ລະ­ຫວ່າງ​ຊາວ​ໜຸ່ມ​ປະ­ເທດ​ສະ­ມາ­ຊິກ​ອາ​ຊຽນ ໂດຍ​ຜ່ານ​ການ​ຖາມ-ຕອບ​ໃນ​ຄວາມ​ຮູ້​ວັດ­ທະ­ນະ­ທຳ ສັງ­ຄົມ ການ­ເມືອງ ແລະ ເສດ­ຖະ­ກິດ ໂດຍ​ການ​ແຂ່ງ­ຂັນ​ເລັ່ງ​ໃສ່​ນັກ­ຮຽນ​ມັດ­ທະ­ຍົມ​ຕອນ​ປາຍ.

ສຳ­ລັບ​ການ​ແຂ່ງ​ຂັ້ນ​ຢູ່​ປະ­ເທດ​ອິນ​ໂດ​ເນ​ເຊຍ​ຄັ້ງ​ນີ້ ຖື​ວ່າ​ເປັນ​ຄັ້ງ​ທີ 8 ໂດຍ​ໃນ 7 ຄັ້ງ​ຜ່ານ​ມາ ສປປ ລາວ ໄດ້​ຮັບ​ກຽດ​ເປັນ​ເຈົ້າ­ພາບ ແລະ ສາ­ມາດ​ຄອງ​ຕຳ­ແໜ່ງ​ຊະ­ນະ​ເລີດ ເຊິ່ງ​ໄດ້​ສ້າງ​ຄວາມ​ພາກ­ພູມ​ໃຈ​ແກ່​ປະ­ຊາ­ຊົນ​ບັນ­ດາ­ເຜົ່າ ກໍ່​ຄື​ການ​ສົ່ງ­ເສີມ​ວຽກ​ງານ​ການ​ສຶກ​ສາ​ຂອງ​ລາວ​ເຮົາ ໃຫ້​ມີ​ທ່ວງ​ທ່າ​ກ້າວ​ຂະ­ຫຍາຍ­ຕົວ​ຍິ່ງໆ​ຂຶ້ນ ໂດຍ​ການ​ແຂ່ງ­ຂັນ​ຖາມ-ຕອບ​ຄວາມ​ຮູ້​ກ່ຽວ​ກັບ​ອາ​ຊຽນ​ຮອບ​ສຸດ​ທ້າຍ ມີ​ນັກ­ຮຽນ​ຈາກ​ໂຮງ­ຮຽນ​ທົ່ວ​ປະ­ເທດ​ເຂົ້າ​ຮ່ວມ 15 ຄົນ ຈະ​ຄັດ​ເອົາ 3 ຄົນ.

ພາບ-ຂ່າວ: ນສພ ວຽງຈັນໃຫ່ມ

Be the first to comment

Leave a Reply

Your email address will not be published.


*