ສຸກອາພອນ ກອງໜ້າຫລາຍປະສົບການທີມຊາດລາວ ປະກາດລາອອກ ພ້ອມຂໍໂທດກັບການແຂ່ງຂັນມື້ວານນີ້ທີ່ບໍ່ສາມາດຊ່ວຍທີມຊາດລາວໄດ້

ໃນການແຂ່ງຂັນເຕະບານຊາຍຊິງແຊ້ມອາຊຽນ ຫລື AFF Suzuki Cup 2018 ຮອບແບ່ງກຸ່ມ ນັດທີ 1 ຂອງກຸ່ມ A ທິມຊາດລາວ ເປີດສະໜາມກີລາແຫ່ງຊາດ ຫລັກ 16 ໃນຄ່ຳວັນທີ 8ພະຈິກ 2018 ຕ້ອນຮັບຕົວເຕັງແຊ້ມ ທິມຊາດຫວຽດນາມ ແຊ້ມ 1 ສະໄຫມ ປີ 2008.


ປະກົດວ່າເກມຈົບລົງຕາມຄາດໝາຍ ທິມຊາດລາວເສຍໃຫ້ທິມຊາດຫວຽດນາມ 0-3 ຈາກ 3 ນັກເຕະຊື່ດັງຂອງຫວຽດນາມ ຫງຽວນ ກົງເຟືອງ ນາທີ 11′ ຫວງຽນ ແອັງດຶກ ນາທີ 45+2′ ແລະ ຫວງຽນ ກວາງ ຮ໊າຍ ນາທີ 68′

ຫລ້າສຸດໃນຕອນເຊົ້າວັນທີ 9/11/2018 ສຸກອາພອນ ວົງຈຽງຄຳ ກອງໜ້າຫລາຍປະສົບການ ໄດ້ໂພສໃນເຟສບຸກສ່ວນຕວນວ່າ: ຂ້ອຍເປັນຄົນລາວ ເລືອດຂ້ອຍກະເປັນລາວ ຂ້ອຍຂໍໂທດກັບການແຂ່ງຂັນມື້ວານນີ້ທີ່ບໍ່ສາມາດຊ່ວຍທີມຊາດລາວໄດ້ ຂ້ອຍກັບມານອນດ້ວຍຄວາມເສຍໃຈນອນບໍ່ຫລັບຫມົດຄືນ ບໍ່ໄດ້ເສຍໃຈທີ່ບໍ່ໄດ້ລົງຫລີ້ນດອກແຕ່ເສຍໃຈທີ່ເຮົາຄົນລາວປ່ອຍໃຫ້ຕ່າງຊາດມາຢຽບຢໍ້າເທີງແຜ່ນດີນລາວ ຂ້ອຍຢາກໄປຕໍ່ຢາກຊ່ວຍເພາະສີ່ງທີ່ເຮົາຮັກແລະປະສົບການທັງຫມົດໃນການແຂ່ງຂັນຊູຊູກີຄັບທັງຫມົດທີ່ຜ່ານ 4 ຄັ້ງແລ້ວພ້ອມກັບການແຂ່ງຂັນທຸກໆລາຍການແລະລາງວັນສ່ວນຕົວທີ່ຂ້າພະເຈົ້າໄດ້ມາທັງຫມົດ ແຕ່ເພີ່ນບໍ່ໃຫ້ໂອກາດ ຂ້າພະເຈົ້າກະເລີຍຢາກບອກທຸກຄົນຂໍໂທດຄວາມຂ້າພະເຈົ້າບໍ່ມີຄວາມສາມາດພໍຫລີ້ນທີມຊາດລາວຊຸດນີ້ໄດ້ ຈື່ງຂໍພັກເພື່ອຮັກສາຫົວໃຈໂຕເອງ ຍອມຮັບວ່າເຈັບໃຈຫລາຍ ເພາະເຄີຍມີປະສົບການຊະນະບຸລິລຳຢູ່ບ້ານເຮົາໄດ້ ຄີດວ່າຄົນລາວກະສູ້ທຸກຊາດໄດ້ບໍ່ນ້ອຍຫນ້າໃຜ ແຕ່ສີ່ງສຸດທ້າຍຢາກບອກຄົນລາວທີ່ຕີດຕາມເຕະບານທັງປະເທດວ່າ ຂ້ອຍພ້ອມແນ່ນອນເມື່ອຊາດຕ້ອງການທີ່ຈະໃຊ້ຂ້ອຍ ຂ້ອຍຮັກປະເທດນີ້ ຂ້ອຍໄປເຕະຢູ່ຕ່າງປະເທດເພື່ອຫຍັງ ເພື່ອຢາກຊ່ວຍປະເທດຂອງຂ້ອຍ ຢາກໃຫ້ທຸກຄົນເຂົ້າໃຈການຕັດສີນໃຈຂອງຂ້ອຍ ຂອບໃຈທຸກຄົນທີ່ຕີດຕາມຜົນງານ ຂອບໃຈນ້ອງໆທີມຊາດແລະທີມງານສະຕາບ ສູ້ຕໍ່ໄປເດີ !!! ຂໍຖອນໂຕສຳລັບທີມຊາດລາວຊຸດນີ້ຫວັງວ່າທຸກຝ່າຍຄົງເຂົ້າໃຈ ຂອບໃຈຫລາຍໆ!! ຂ້ອຍອາດຈະເກີດມາໂຕນ້ອຍເພາະຂ້ອຍເປັນຄົນລາວແຕ່ຂ້ອຍກະຊະນະອຸປະສັກທຸກຢ່າງຜ່ານມາແລ້ວ ຫວັງວ່າພວກເຮົາສີໄດ້ເຈີກັນໄວໆນີ້ກັບສະໂມສອນອາຊີບ!!

Be the first to comment

Leave a Reply

Your email address will not be published.


*