ທໍານຽບຂາວ ສັ່ງແບນນັກຂ່າວ CNN ຫຼັງປະທະດຸເດືອດ “ທຣັມ”

ສໍານັກຂ່າວຕ່າງປະເທດລາຍງານຈາກນະຄອນວໍຊິງຕັນ ປະເທດສະຫະລັດອາເມຣິກາ ເມື່ອວັນທີ່ 7 ພະຈິກ 2018 ວ່າ ທໍານຽບຂາວອອກຖະແຫຼງການເມື່ອວັນພຸດ ເລືື່ອງລະງັບບັດສື່ມວນຊົນຂອງ ທ່ານ ຈິມ ອາຄອສຕາ ຫົວໜ້າທີມນັກຂ່າວປະຈໍາທໍານຽບຂາວຂອງ CNN “ຢ່າງບໍ່ມີກໍານົດ” ໃນເວລາດຽວກັນ ອາຄອສຕາທະວິດວ່າຕອນນີ້ເຂົາບໍ່ສາມາດເຂົ້າສູ່ພື້ນທີ່ພາຍໃນທໍານຽບຂາວໄດ້ອີກແລ້ວ


ທັງນີ້ທໍານຽບຂາວເຜີຍແພ່ຖະແຫຼງການອອກມາພາຍໃນເວລາພຽງບໍ່ເທົ່າໃດຊົ່ວໂມງຫຼັງປະທານາທິບໍດີໂດນັລ ທຣັມ ຖະແຫຼງກັບຜູ້ສື່ຂ່າວເປັນຄັ້ງທໍາອິດຫຼັງຜ່ານພົ້ນການເລືອກຕັ້ງກາງເທີມ ເຊິ່ງມີເມື່ອວັນອັງຄານທີ່ຜ່ານມາ ໂດຍພັກຣີພັບລິກັນຍັງຄົງຮັກສາສຽງສ່ວນຫຼາຍໃນວຸດທິສະພາ ແຕ່ພັກເດໂມແຄຣດສາມາດກັບມາຄອງສຽງສ່ວນຫຼາຍໃນສະພາຜູ້ແທນປະຊາຊົນໄດ້ເປັນຄັ້ງທໍາອິດໃນຮອບ 8 ປີ


ຢ່າງໃດກໍ່ຕາມເກີດບັນຍາກາດເຄັ່ງຕຶງຂື້ນໃນຊ່ວງສຸດທ້າຍຂອງການຖະແຫຼງທີ່ຜ່ານມາເກືອບ 90 ນາທີ ເມື່ອຜູ້ສື່ຂ່າວກຸ່ມໜຶ່ງພະຍາຍາມຊັກຖາມກົດດັນໃຫ້ທຣັມຊີ້ແຈງໃນປະເດັນຄາລາວານຜູ້ອົບພະຍົກຈາກອາເມຣິກາກາງວ່າເປັນ “ເຄື່ອງມືທາງການເມືອງ” ຂອງພັກຣີກັບລິກັນຫຼືບໍ່ ແລະ ຄວາມຄືບໜ້າຂອງຂະບວນການສືບສວນສອບສວນຂໍ້ກ່າວຫາວ່າ ຣັດເຊຍແຊກແຊງການເມືອງພາຍໃນຂອງສະຫະລັດ ທີ່ລວມເຖິງຄວາມເຊື່ອມໂຍງລະຫວ່າງ ລັດຖະບານມອສໂກ ກັບ ແຄມເປນຫາສຽງຂອງທຣັມເມື່ອ 2 ປີຜ່ານມາອີກນຳ
ແມ່ນວ່າຄໍາຖາມລັກຊະນະດັ່ງກ່າວມາຈາກຜູ້ສື່ຂ່າວຫຼາຍຄົນ ແຕ່ ທຣັມ ສະແດງຄວາມບໍ່ພໍໃຈອອກມາຢ່າງຊັດເຈນລະຫວ່າງການສົນທະນາກັບອາຄອສຕາ ໂດຍຜູ້ນໍາສະຫະລັດຢືນຢັນວ່າ ອາເມຣິກາຍັງເປັນປະເທດທີ່ຕ້ອນຮັບຜູ້ອົບພະຍົກ “ເມື່ອໃດທີ່ເປັນການຂ້າມຊາຍແດນຢ່າງຖືກຕ້ອງຕາມກົດໝາຍ” ຫຼັງຈາກນັ້ນທຣັມບອກໃຫ້ອີກຝ່າຍນັ່ງລົງ ແລະ ສົ່ງໄມໂຄຣໂຟນໃຫ້ກັບນັກຂ່າວຄົນອື່ນ ແຕ່ອາຄອສຕາປະຕິເສດ ແລະ ກ່າວຕໍ່ວ່າ ຄາລາວານຜູ້ອົບພະຍົກຍັງຢູ່ຫ່າງຈາກຊາຍແດນສະຫະລັດຫຼາຍກວ່າ 1,000 ກິໂລແມັດ ຈຶ່ງຍັງບໍ່ອາດຖືເປັນ “ການຮຸກຮານ” ຕາມທັດສະນະຂອງທຣັມໄດ້


ສໍາລັບທຣັມ ຜູ້ນໍາສະຫະລັດກ່າວວ່າການບໍລິຫານປະເທດເປັນໜ້າທີ່ຂອງທ່ານ ສ່ວນອາຄອສຕາມີໜ້າທີ່ເຮັດວຽກໃຫ້ກັບຊີເອັນເອັນ ເຊິ່ງຫາກອາຄອສຕາເຮັດວຽກດີແທ້ ເຣດຕິ້ງຂອງຊີເອັນເອັນຫນ້າຈະດີກວ່ານີ້ນຳ ແຕ່ຕອນນີ້ຊີເອັນເອັນຄວນ “ລະອາຍໃຈ” ທີ່ມີພະນັກງານຢ່າງອາຄອສຕາ ເຊິ່ງຫຍາບຄາຍ ແລະ ໄຮ້ມາລະຍາດ ຂະນະທີ່ນັກຂ່າວເຊິ່ງໄດ້ຮັບໄມໂຄໂຟນເປັນຄົນຕໍ່ມາ ຄື ທ່ານ ປີເຕີຣ ອາເລັກຊານເດີຣ ຈາກເອັນບີຊີ ບໍ່ໄດ້ຕັ້ງຄໍາຖາມທັນທີແຕ່ກ່າວປົກປ້ອງອາຄອສຕາ ທຣັມກ່າວວ່າ ເອັນບີຊີກໍ່ບໍ່ແມ່ນສໍານັກຂ່າວທີ່ດີຄືກັນ ແລະ ເມື່ອເຫັນອາຄອສຕາຍັງຄົງພະຍາຍາມລຸກຂື້ນເພື່ອຊັກຖາມອີກ ທຣັມ ກ່າວວ່າຊີເອັນເອັນເປັນສະຖານີທີ່ລາຍງານແຕ່ “ຂ່າວປອມ” ຖືເປັນສື່ທີ່ເປັນ “ສັດຕູຂອງປະຊາຊົນ”

(Photo credit should read MANDEL NGAN/AFP/Getty Images)

Be the first to comment

Leave a Reply

Your email address will not be published.


*