ສຳມະນາວິທະຍາສາດແນວຄິດ ປະທານ ໄກສອນ ພົມວິຫານ ຕໍ່ຄົນຮຸ່ນໜຸ່ມ

ສູນກາງຊາວໜຸ່ມ ປະ ຊາຊົນ ປະຕິວັດລາວ (ຊປປລ) ໄດ້ຈັດກອງປະຊຸມສຳມະນາວິທະຍາສາດ ແນວຄິດປະທານໄກສອນ ພົມວິຫານຕໍ່ຄົນຮຸ່ນໜຸ່ມໃນຫົວຂໍ້: ຊາວໜຸ່ມຈົ່ງເປັນດັ່ງນົກອິນຊີ ທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງກາຍເປັນສິນໄຊ ຂອງຍຸກສະໄໝພວກເຮົາ ຂຶ້ນໃນວັນທີ 2 ພະຈິກນີ້ ທີ່ຖໍ້າຊ້າງລອດ ເມືອງວຽງໄຊ ແຂວງຫົວພັນໂດຍການເປັນປະທານຂອງທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ ເລຂາຄະນະບໍລິຫານງານສູນກາງ ຊປປລ, ມີຕົວແທນຊາວໜຸ່ມຈາກບັນດາກະຊວງ, ອົງການ, ນັກທຸລະກິດໜຸ່ມເຂົ້າຮ່ວມ 360 ຄົນ.

 

ກອງປະຊຸມໄດ້ຮັບຟັງການລາຍງານໂດຍຫຍໍ້ກ່ຽວກັບແນວຄິດຕໍ່ກັບຊາວໜຸ່ມຈົ່ງເປັນດັ່ງນົກອິນຊີ ທີ່ບໍ່ຫວັ່ນກົວ ຕໍ່ພາຍຸລົມແດງ ຈົ່ງກາຍເປັນສິນໄຊຂອງຍຸກສະໄໝພວກເຮົາ, ຈາກນັ້ນ ທ່ານປະທານກອງປະຊຸມຍັງໄດ້ເນັ້ນສາມບັນຫາເພື່ອເປັນພື້ນຖານຕໍ່ທີ່ປະຊຸມວ່າ: ແນວທາງຂອງພັກໃນການນຳພາປະເທດຊາດກ້າວຂຶ້ນສູ່ສັງຄົມນິຍົມ ແລະ ບົດບາດຂອງຊາວໜຸ່ມໃນໄລຍະໃໝ່ຕໍ່ການພັດທະນາປະເທດຊາດ, ຊາວໜຸ່ມໃນພາລະກິດຕໍ່ສູ້ກູ້ຊາດ ແລະ ສ້າງສາພັດທະນາປະເທດຊາດ, ປະທານໄກສອນ ພົມວິຫານ ກັບການກໍ່ສ້າງຄົນຮຸ່ນໜຸ່ມ ເພື່ອສືບທອດພາລະກິດປະຕິວັດຂອງພັກ ຂອງປະຊາຊົນ ປະຕິວັດລາວ ແລະ ສືບທອດມູນເຊື້ອ, ຈາກນັ້ນບັນດາຜູ້ແທນທີ່ເຂົ້າຮ່ວມກອງປະຊຸມໄດ້ມີການປະກອບຄຳຄິດຄຳເຫັນ, ວິເຄາະອຸດົມການຂອງຜູ້ນຳໃຫ້ກາຍເປັນທິດສະດີ ເພື່ອຍົກສູງບົດບາດການນຳພາຂອງພັກ ເພື່ອຊີ້ນຳໆພາຊາວໜຸ່ມໃນອະນາຄົດ ຊຶ່ງປະເທດຊາດໄດ້ຝາກອະນາຄົດໄວ້ກັບຄົນໜຸ່ມ.

(ຂ່າວ: ຊາວໜຸ່ມ)

Be the first to comment

Leave a Reply

Your email address will not be published.


*