ປ່ອຍສັດປ່າຫວງຫ້າມ ຄືນສູ່ທຳມະຊາດ

ພິ­ທີ​ປ່ອຍ​ສັດ­ປ່າ​ຫວງ​ຫ້າມ​ບັນ­ຊີ​ໜຶ່ງ ຄືນ​ສູ່​ທຳ​ມະ​ຊາດ ຈັດ​ຂຶ້ນ​ວັນ​ທີ 6 ພະ­ຈິກ 2018 ຢູ່​ເຂດ​ປ່າ​ສະ­ຫງວນ​ແຫ່ງ​ຊາດ ພູ­ເຂົາ​ຄວາຍ ເມືອງ​ທ່າ​ພະ​ບາດ ແຂວງ​ບໍ​ລິ​ຄຳ​ໄຊ ໂດຍ​ມີ​ທ່ານ ແສງ​ອາ​ລຸນ ສຸ­ລິ­ຍະ​ວົງ ຮອງ​ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ຜູ້​ຊີ້​ນຳ​ວຽກ​ງານ​ກວດ­ກາ​ປ່າ­ໄມ້ ພ້ອມ​ດ້ວຍ​ບັນ­ດາ​ຄະ­ນະ​ນຳ ກົມ ກອງ ຫ້ອງ­ການ ແລະ ໜ່ວຍ​ງານ​ກ່ຽວ­ຂ້ອງ​ເຂົ້າ​ຮ່ວມ.

 

ທ່ານ ຖາ­ວອນ ວົງ​ຄຳ​ອຸດ ຮອງ​ຫົວ­ໜ້າ​ກອງ​ກວດ­ກາ​ປ່າ­ໄມ້ ນະ­ຄອນ­ຫຼວງ​ວຽງ​ຈັນ ກ່າວ​ວ່າ: ຂອງ​ກາງ​ທີ່​ກອງ​ກວດ­ກາ​ປ່າ­ໄມ້​ນະ­ຄອນ­ຫຼວງ​ວຽງ​ຈັນ ໄດ້​ຮັບ​ຈາກ​ກົມ​ຕຳ­ຫຼວດ​ສິ່ງ­ແວ­ດລ້ອມ ຕາມ​ບົດ​ບັນ­ທຶກ​ມອບ-ຮັບ​ສັດ­ປ່າ​ຫວງ​ຫ້າມ​ບັນ­ຊີ​ໜຶ່ງ ຄັ້ງ​ວັນ​ທີ 2 ພະ­ຈິກ 2018 ໂດຍ​ສັດ­ປ່າ​ດັ່ງ­ກ່າວ ກົມ​ຕຳ­ຫຼວດ​ສິ່ງ­ແວ­ດລ້ອມ ຢຶດ​ໄດ້​ໃນ​ວັນ​ທີ 2 ພະ­ຈິກ 2018 ຢູ່​ເຮືອນ​ຂອງ​ທ້າວ ຕຸ້ຍ ເຮືອນ​ເລກ​ທີ 249 ໜ່ວຍ 19 ບ້ານ​ຊຳ​ເກດ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ເຊິ່ງ​ມີ​ສັດ­ປ່າ​ປະ­ເພດ​ເຮ້ຍ​ເປັນ 225 ໂຕ ນ້ຳ­ໜັກ 923,9 ກິ​ໂລ ເຮ້ຍ​ຕາຍ 10 ໂຕ ນ້ຳ­ໜັກ 33 ກິ​ໂລ ລິ່ນ​ຕາຍ 4 ໂຕ ນ້ຳ­ໜັກ 3,5 ກິ​ໂລ ກັບ­ແກ້​ຕາຍ 2 ຖົງ ນ້ຳ­ໜັກ 2,8 ກິ​ໂລ ກັບ­ແກ້​ແຫ້ງ 127 ໂຕ ນ້ຳ­ໜັກ 9,7 ກິ​ໂລ ງູ­ເຫຼືອມ 1 ໂຕ ນ້ຳ­ໜັກ 75 ກິ​ໂລ.

 

ສຳ­ລັບ​ສັດ​ທີ່​ນຳ​ມາ​ປ່ອຍ​ຄືນ​ສູ່​ທຳ​ມະ​ຊາດ​ຄັ້ງ​ນີ້ ປະ­ກອບ​ມີ​ໂຕ​ເຮ້ຍ 225 ໂຕ ນ້ຳ­ໜັກ 923,9 ກິ​ໂລ ແລະ ງູ­ເຫຼືອມ 1 ໂຕ ນ້ຳ­ໜັກ 75 ກິ​ໂລ ສ່ວນ​ສັດ​ຕາຍ​ປັດ­ຈຸ­ບັນ​ແມ່ນ​ເກັບ​ຮັກ­ສາ​ໄວ້​ຢູ່​ຕູ້​ແຊ່​ຂອງ​ກອງ​ກວດ­ກາ​ປ່າ­ໄມ້ ນະ­ຄອນ­ຫຼວງ​ວຽງ​ຈັນ ເພື່ອ​ຈະ​ນຳ­ໄປ​ທຳ­ລາຍ​ຖິ້ມ ສ່ວນ​ຜູ້​ກະ­ທຳ​ຜິດ​ແມ່ນ​ຈະ​ດຳ­ເນີນ​ຄະ­ດີ​ຕາມ​ລະ­ບຽບ​ກົດ­ໝາຍ ແລະ ລະ­ບຽບ​ການ.

ຂໍ້ມູນຈາກ: ນສພ ວຽງຈັນໃຫ່ມ

Be the first to comment

Leave a Reply

Your email address will not be published.


*