ທຣັມ ໄລ່ລັດຖະມົນຕີກະຊວງຍຸຕິທໍາອອກ

ສໍານັກຂ່າວຕ່າງປະເທດລາຍງານຈາກນະຄອນວໍຊິງຕັນ ປະເທດສະຫະລັດອາເມຣິກາ ເມື່ອວັນທີ່ 7 ພະຈິກ 2018 ວ່າ: ປະທານາທິບໍດີໂດນັລ ທຣັມ ທະວິດຂໍ້ຄວາມເມື່ອວັນພຸດ “ຂອບໃຈ” ທ່ານ ເຈຟ ເຊສຊັນ ສໍາລັບການດໍາລົງຕໍາແໜ່ງລັດຖະມົນຕີວ່າກະຊວງຍຸຕິທໍາຕະຫຼອດໄລຍະເວລາ 1 ປີທີ່ຜ່ານມາ ແລະ ທ່ານໄດ້ແຕ່ງຕັ້ງ ທ່ານ ແມທທິວ ວິດເທເກີຣ ຫົວໜ້າຄະນະເຈົ້າໜ້າທີ່ປະຈໍາກະຊວງຍຸຕິທໍາ ໃຫ້ປະຕິບັດໜ້າທີ່ຮັກສາການແທນໄປກ່ອນຈົນກວ່າທໍານຽບຂາວຈະສາມາດເລືອກຫາບຸກຄົນມາຮັບຕໍາແໜ່ງລັດຖະມົນຕີວ່າການຄົນຕໍ່ໄປໄດ້ ໃນເວລາດຽວກັນ ທ່ານເຊສຊັນ ສົ່ງໜັງສືເຖິງທຣັມເພື່ອຂໍລາອອກຈາກຕໍາແໜ່ງຢ່າງເປັນທາງການ “ຕາມຄວາມປະສົງຂອງປະທານາທິບໍດີ” ແລະ ຢືນຢັນຍຶດໝັ້ນຕາມຫຼັກນິຕິກໍາຕະຫຼອດໄລຍະເວລາຂອງການປະຕິບັດໜ້າທີ່

ຈາກການພົ້ນຕຳແໜ່ງຂອງທ່ານເຊສຊັນ ເປັນຄວາມເຄື່ອນໄຫວທີ່ຫຼາຍຝ່າຍຂ້ອນຂ້າງຄາດການເອົາໄວ້ຢູ່ແລ້ວ ເນື່ອງຈາກທຣັມເຄີຍກ່າວວ່າຈະຕັດສິນໃຈກ່ຽວກັບ “ອານາຄົດທາງການເມືອງ” ຂອງທ່ານເຊສຊັນ ຫຼັງຜ່ານພົ້ນການເລືອກຕັ້ງກາງເທີມ ຢ່າງໃດກໍ່ຕາມຫຼາຍຝ່າຍໂດຍສະເພາະພັກເດໂມແຄຣດຕັ້ງປະເດັນຂື້ນມາທັນທີ ວ່າການທີ່ທຣັມປົດເຊສຊັນແລ້ວເລືອກວິດເທເກີຣໃຫ້ເຂົ້າມາຮັກສາການ ຄືຄວາມພະຍາຍາມແອບແຝງ ເພື່ອແຊກແຊງຂະບວນການສືບສວນຂໍ້ກ່າວຫາທີ່ເຊື່ອມໂຍງຣັດເຊຍກັບການເລືອກຕັ້ງປະທານາທິບໍດີເມື່ອປີ 2016 ຫຼືບໍ່ ຈາກການທີ່ວິດເທເກີຣມີຈຸດຢືນຄັດຄ້ານການດໍາເນີນການເລື່ອງນີ້

ນອກຈາກນີ້ ຕໍ່ໃຫ້ຢູ່ໃນຖານະຮັກສາການ ແຕ່ທ່ານວິດເທເກີຣມີອໍານາດພຽງພໍທີ່ຈະເຂົ້າມາເບິ່ງແຍງເລື່ອງນີ້ ທີ່ອາດຈະເປັນການຍຸຕິການສືບສວນສອບສວນ ຫຼື ແມ່ນແຕ່ການສະເໜີໃຫ້ຜູ້ນໍາສະຫະລັດປົດ ທ່ານ ຣ໊ອດ ໂຣເຊນໄຕ ແລະ ທ່ານ ໂຣເບີດ ມຸລເລີຣ ອອກຈາກຕໍາແໜ່ງ ລັດຖະມົນຕີຊ່ວຍກິຊວງຍຸຕິທໍາ ແລະ ໄອຍາການອິດສະຫຼະເຊິ່ງຮັບຜິດຊອບຂະບວນການດັ່ງກ່າວມາຕະຫຼອດຕັ້ງແຕ່ເດືອນ ພຶດສະພາ ປີຜ່ານມາ ຕາມການແຕ່ງຕັ້ງໂດຍໂຣເຊນສໄຕ ຫຼັງເຊສຊັນສ ຖອນໂຕຈາກການເປັນຫົວໜ້າຄະນະ

ຢ່າງໃດກໍ່ຕາມ ທຣັມຍັງຄົງປະຕິເສດແນວຄິດການປົດມຸລເລີຣເຊິ່ງເປັນອາດີດອໍານວຍການສໍານັກງານສືບສວນກາງ (ເອຟບີໄອ) ແລະ ທີມງານ ແຕ່ຢືນຢັນວ່າການເຮັດວຽກຂອງມຸລເລີຣບໍ່ຕ່າງຫຍັງກັບ “ການລ່າແມ່ມົດ”

Be the first to comment

Leave a Reply

Your email address will not be published.


*