ກອງທຶນຫຼຸດຜ່ອນຄວາມທຸກຍາກປະຈຳເມືອງໂພນທອງຈັດພິທີມອບຮັບໂຄງການກໍ່ສ້າງ ໂຮງຮຽນປະຖົມສຶກສາ 3 ຫ້ອງ ບ້ານ ຫ້ວຍລານ

ໃນຕອນເຊົ້າຂອງວັນທີ່ 7 ພະຈິກ 2018ນີ້ ທີ່ອາຄານ ຮ.ຮ ປະຖົມສຶກສາ3 ຫ້ອງບ້ານຫ້ວຍລານ ກຸ່ມນາຊອນ ເມືອງໂພນທອງ ແຂວງຫຼວງພະບາງ ໄດ້ມີພິທີມອບຮັບໂຄງການກໍ່ສ້າງອາຄານ ຮ.ຮ ປະຖົມສຶກສາຂື້ນ ພາຍຫຼັງທີ່ໄດ້ມີການກໍ່ສ້າງສຳເລັດ 100% ໂດຍເປັນປະທານຂອງ ທ່ານ ຄໍາຜາຍ ແກ້ວລາວັນ ຮອງເລຂາພັກເມືອງໂພນທອງ , ທ່ານ ບຸນລອດ ຫົວໜ້າປະສານງານໂຄງການກອງທຶນຫຼຸດຜ່ອນຄວາມທຸກຍາກປະຈໍາເມືອງໂພນທອງ, ທ່ານ ບຸນຍົງ ຮອງປະເສີດ ຕ່າງໜ້າບໍລິສັດ ໂຊກແສນຄໍາ ກໍ່ສ້າງ-ເຄຫາສະຖານ ຈຳກັດ ຜູ້ຮັບເໝົາກໍ່ສ້າງ,ມີຄະນະກຳມະການຄຸ້ມຄອງການລົງທຶນຂັ້ນເມືອງ,ເລຂາຄະນະພັກຮາກຖານກຸ່ມ,ຕະຫຼອດຮອດທີມງານຜູ້ຮັບຜິດຊອບວຽກງານໂຄງການກອງທຶນຫຼຸດຜ່ອນຄວາມທຸກຍາກຂັ້ນບ້ານຫ້ວຍລານ,ອົງການປົກຄອງບ້ານ,ພໍ່ແມ່ປະຊາຊົນ, ແຂກຮັບເຊີນເຂົ້າຮ່ວມ.


ໃນພິທີຕ່າງໜ້າຜູ້ຮັບຜິດຊອບວຽກງານໂຄງການກອງທຶນຫຼຸດຜ່ອນຄວາມທຸກຍາກຂັ້ນບ້ານຫ້ວຍລານກໍ່ໄດ້ລາຍງານສະພາບການກໍ່ສ້າງອາຄານ ຮ.ຮປະຖົມສຶກສາ3ຫ້ອງບ້ານຫ້ວຍລານ ເມືອງໂພນທອງແຂວງຫຼວງພະບາງ ໂຄງການດັ່ງກ່າວ ເລີ່ມລົງມືກໍ່ສ້າງແຕ່ ວັນທີ 24 ເມສາ 2018 ມາເຖິງ ວັນທີ 30 ສິງຫາ 2018 ແມ່ນສໍາເລັດ 100% ໂດຍໄດ້ຮັບທຶນຊ່ວຍເຫຼືອຈາກໂຄງການ ກອງທືນຫຼຸດຜ່ອນຄວາມທຸກຍາກ ໃນຮອບວຽນ ທີ 15 ປະຈໍາປີ 2018 ,ໃນມູນຄ່າການກໍ່ສ້າງທັງໝົດ 365.534.600 ກີບ.

ທຶນ ປະກອບສ່ວນຂອງຊຸມຊົນບ້ານຫ້ວຍລານ 7.380.000ກີບມອບໃຫ້ບໍລິສັດ ໂຊກແສງຄໍາ ກໍ່ສ້າງ-ເຄຫາສະຖານ ຈຳກັດ ເປັນຜູ້ຮັບເໝົາກໍ່ສ້າງ ຜ່ານຊະນະການປະມູນ.ໂຄງການການກໍ່ສ້າງ ໂຮງຮຽນປະຖົມສຶກສາ 3 ຫ້ອງຢູ່ບ້ານຫ້ວຍລານ ກຸ່ມນາຊອນເປັນອາຄານຊັ້ນດຽວ ຂະໜາດກ້ວາງ 9 ແມັດ, ຍາວ 24 ແມັດ, ມີ 1 ຫ້ອງນໍ້າ 3 ຫ້ອງຮຽນ ໂຄງສ້າງເບຕົງເສີມເຫຼັກ, ພື້ນປູດ້ວຍຊີມັງ, ຫຼັງຄາມຸງດ້ວຍສັງກະສີ ສິງອາລຸນ, ຝາກໍ່ດ້ວຍດິນບ໊ອກອັດແຮງ ແລະ ອຸປະກອນເຟີນີເຈີຄົບຖ້ວນ. ໂອກາດທີ່ມີຄວາມໝາຍສຳຄັນນີ້ ທ່ານ ຄໍາຜາຍ ແກ້ວລາວັນ ໄດ້ມີຄຳເຫັນເນັ້ນໜັກໃຫ້ ຄະນະອົງການປົກຄອງບ້ານແລະຄູອາຈານຕ້ອງເອົາໃຈໃສເພີ່ມທະວີໃນການປົກປັກຮັກສາອາຄານ ໃຫ້ນຳໃຊ້ໄດ້ຢ່າງຍາວນານ,ພ້ອມທັງກ່າວມອບ ຮ.ຮ ປະຖົມສຶກສາ 3 ຫ້ອງ ໃຫ້ອົງການປົກຄອງບ້ານ ພໍ່ແມ່ປະຊາຊົນບ້ານຫ້ວຍລານ ໂດຍມີ ແຂກທີ່ເຂົ້າຮ່ວມ ເປັນສັກຂີພິຍານ.


ຕອນທ້າຍພິທີ ຄະນະປະທານພ້ອມດ້ວຍແຂກ ໄດ້ເຂົ້າຮ່ວມ ພ້ອມກັນ ເປີດປ້າຍການກໍ່ສ້າງອາຄານ ຮ.ຮ ປະຖົມສຶກສາ 3 ຫ້ອງ ບ້ານຫ້ວຍລານ ກຸ່ມນາຊອນ ເມືອງໂພນທອງ ແຂວງຫຼວງພະບາງຢ່າງເປັນທາງການ.

ຂ່າວ: ທະນູສິນ ອິດທິພົນ ນັກຂ່າວເມືອງໂພນທອງ ແຂວງ ຫຼວງພະບາງ.

Be the first to comment

Leave a Reply

Your email address will not be published.


*