ກອງທັບເຢເມນ-ກຸ່ມຮູຕິ ສູ້ຮົບດຸເດືອດ ຊິງເມືອງໂຮເດດາ ເສຍຊີວິດແລ້ວກວ່າ 200 ຄົນ

ສໍານັກຂ່າວຕ່າງປະເທດລາຍງານຈາກເມືອງເອເດນ ປະເທດເຢເມນ ເມື່ອວັນທີ່ 7 ພະຈິກ 2018 ວ່າ ການປະທະກັນມີຂື້ນຂະນະທີ່ສະຫະປະຊາຊາດກໍາລັງຍູ້ດັນເພື່ອໃຫ້ມີການເລີ່ມເຈລະຈາໃໝ່ ລະຫວ່າງຄູ່ຂັດແຍ່ງ ຫຼັງແຜນການເຈລະຈາທີ່ນະຄອນເຈນິວາ ປະເທດສະວິດເຊີແລນ ພັງທະລາຍຕັ້ງແຕ່ຍັງບໍ່ໄດ້ເລີ່ມໃນເດືອນ ກັນຍາ


ແຫຼ່ງຂ່າວທາງການແພດເຜີຍເມື່ອວັນພຸດວ່າ ໃນໄລຍະ 24 ຊົ່ວໂມງທີ່ຜ່ານມາ ການຍິງປະທະນອກເມືອງໂຮເດດາ ທາງພາກຕາເວັນຕົກຂອງເຢເມນ ເຮັດໃຫ້ນັກຮົບຮູຕິເສຍຊີວິດ 27 ຄົນ ແລະ ນັກຮົບຝ່າຍສະໜັບສະໜູນລັດຖະບານເຢເມນ 12 ຄົນ ແລະຕະຫລອດອາທິດມີນັກຮົບຈາກທັງສອງຝ່າຍເສຍຊີວິດແລ້ວກ່ວາ 200 ຄົນ ສ່ວນແຫຼ່ງຂ່າວກອງທັບເຢເມນເຜີຍວ່າ ທະຫານ ແລະ ນັກຮົບຝ່າຍລັດຖະບານ ທີ່ໄດ້ຮັບການສະໜັບສະໜູນຈາກກອງກໍາລັງພັນທະມິດອາຫລັບ ນໍາໂດຍຊາອຸດິອາຣະເບຍ ສາມາດບຸກຄືບ “ພຽງຈໍາກັດ” ເຂົ້າຫາຕົວເມືອງໂຮເດດາ” ແລະ ທ່າເຮືອແຄມຝັ່ງທະເລແດງ ທີ່ສົ່ງສິນຄ້າເຂົ້າເຢເມນກວ່າ 70% ຕ້ອງຜ່ານ


ກອງກໍາລັງພັນທະມິດອາຫລັບສະໜັບສະໜູນກອງກໍາລັງພາກພື້ນດິນຂອງລັດຖບານເຢເມນ ດ້ວຍຝູງເຮືອບິນຮົບ ແລະ ເຮລິຄອບເຕີໂຈມຕີອາປາເຊ່ ລາຍງານຂອງກຸ່ມ “ເຊຟ ເດິ ຊິລເດຣນ” ລະບຸວ່າ ຊ່ວງສຸດທ້າຍທີ່ຜ່ານມາ ເຮືອບິນກອງກໍາລັງພັນທະມິດ ໂຈມຕີເປົ້າໝາຍກະບົດຮູຕີເກືອບ 100 ຖ້ຽວ


ໂຮເດດາເປັນໜຶ່ງໃນຖານທີ່ໝັ້ນແຫ່ງສຸດທ້າຍຂອງກະບົດຮູຕີ ເທິງຊາຍຝັ່ງຕາເວັນອອກຂອງເຢເມນກະບົດຮູຕີບຸກຍຶດເມືອງ ແລະ ທ່າເຮືອໂຮເດດາ ພ້ອມກັບເມືອງຫຼວງຊານາ ເມື່ອປີ 2014


ຈາກການປະເມີນຂອງອົງການອານາໄມໂລກ ມີຜູ້ເສຍຊີວິດເກືອບ 10,000 ຄົນ ໃນສົງຄາມເຢເມນ ຕັ້ງແຕ່ປີ 2015 ແຕ່ກຸ່ມສິດທິມະນຸດຊະຍະຊົນຫຼາຍອົງກອນກ່າວວ່າ ຕົວເລກທີ່ແທ້ຈິງຫນ້າຈະສູງກວ່ານີ້ 5 ເທົ່າ.

Be the first to comment

Leave a Reply

Your email address will not be published.


*