ມອບເງິນຊົດເຊີຍ 77 ຕື້ກວ່າກີບ ແກ່ຜູ້ຖືກຜົນກະທົບຈາກໂຄງການກໍ່ສ້າງທາງລົດໄຟລາວ-ຈີນ

ຂປລ. ​ເມື່ອ​ບໍ່​ດົນ​ມາ​ນີ້​, ແຂວງຫຼວງນໍ້າທາ ໄດ້ຈັດພິທີມອບ-ຮັບເງິນຊົດເຊີຍ ໃຫ້ແກ່ຜູ້ທີ່ໄດ້ຮັບຜົນກະທົບຈາກໂຄງການກໍ່ສ້າງທາງລົດໄຟ ລາວ-ຈີນ ຈຳນວນ 4 ບ້ານຄື: ບ້ານເຕ່ນ, ບໍ່ປຽດ, ຕີນຕົກ ແລະ ບ້ານນາເຕີນ, ຈຳ ນວນ 138 ຄອບຄົວ ລວມມູນຄ່າ 77 ຕື້ກວ່າກີບ, ​ເຊິ່ງຕາງໜ້າ​ມອບ​ໂດຍ ທ່ານ ທອງແດງ ສິດທິສົນ ຮອງເຈົ້າເມືອງໆຫຼວງນໍ້າທາ ອີງຕາມການລາຍງານຂອງສຳນັກຂ່າວສານປະເທດລາວ.

ທ່ານ ຈັນທະຈອນ ແກ້ວລະຄອນ ຫົວໜ້າຫ້ອງການປະສານງານທາງລົດໄຟລາວ-ຈີນ ປະຈຳແຂວງຫຼວງນໍ້າທາ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ຫຼວງນໍ້າທາ ສະບັບເລກທີ 390/ຈຂ ລົງວັນທີ 28 ມິຖຸນາ 2018 ວ່າດ້ວຍການແຕ່ງຕັ້ງຄະນະຮັບຜິດຊອບເບິກຈ່າຍຄ່າຊົດເຊີຍສິ່ງກີດຂວາງ ໃຫ້ແກ່ຜູ້ທີ່ໄດ້ຮັບຜົນກະທົບຈາກໂຄງການກໍ່ສ້າງທາງລົດໄຟລາວ-ຈີນ ຊ່ວງຜ່ານແຂວງຫຼວງນໍ້າທາ ງວດທີ 1 ແລະ ງວດທີ 2 ຄະນະກຳມະການ ໄກ່ເກ່ຍ ຂັ້ນ ແຂວງ ໄດ້ສົມທົບຄະນະຄຸ້ມຄອງຂອງການກໍ່ສ້າງທາງລົດໄຟລາວ-ຈີນ ໄດ້ຮ່ວມກັນຈັດອັນດັບບູລິມະສິດທີ 1 ເພື່ອເປັນເອກະສານອ້າງອີງໃນການຈ່າຍເງິນຊົດເຊີຍ ໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຢູ່ 4 ບ້ານດັ່ງກ່າວ ​ໂດຍ​ໄດ້ມີ​ການ​ເບີກ​ຈ່າຍ​ເປັນ 2 ງວດ.


ຂໍ້ມູນຈາກ : ຂ່າວສານປະເທດລາວ

Be the first to comment

Leave a Reply

Your email address will not be published.


*