ທ່ານທອງລຸນ ສີສຸລິດ ພົບປະກັບ ທ່ານສີ ຈິ້ນຜີງ ຢູ່ນະຄອນຊຽງໄຮ້

ໂດຍຕອບສະໜອງຕາມການເຊື້ອເຊີນຂອງທ່ານ ສີ ຈິ້ນຜິງ, ປະທານປະເທດ ແຫ່ງ ສາທາລະນະລັດປະຊາຊົນຈີນ, ທ່ານທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 1 ( China International Import – Expo) ຊຶ່ງຈັດຂຶ້ນໃນລະຫວ່າງວັນທີ 5-10 ພະຈິກ 2018, ທີ່ ນະຄອນຊຽງໄຮ້, ສປ ຈີນ.


ໃນວັນທີ 4 ພະຈິກ 2018 ທ່ານທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະກັບ ທ່ານ ສີ ຈິ້ນຜິງ, ປະທານປະເທດ ແຫ່ງ ສປ ຈີນ, ເຊິ່ງທ່ານນາຍົກລັດຖະມົນຕີລາວ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ຮູ້ສຶກເປັນກຽດຢ່າງສູງຕໍ່ການເຊື້ອເຊີນຄະນະຜູແທນ ສປປ ລາວ ມາຮ່ວມງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 1 ໃນຄັ້ງນີ້.

ພ້ອມກັນນັ້ນ, ທ່ານ ນາຍົກລັດຖະມົນຕີ ຍັງໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນຂອງທ່ານເລຂາທິການໃຫຍ່ພັກປະຊາຊົນປະຕິວັດລາວແລະ ປະທານປະເທດ ບຸນຍັງ ວໍລະຈິດ, ເຖິງທ່ານ ສີ ຈິ້ນຜິງ, ເລຂາທິການໃຫຍ່ພັກຄອມມູນິດຈີນ ແລະ ປະທານປະເທດ ແຫ່ງ ສປ ຈີນ ແລະ ໄດ້ຝາກສະແດງຄວາມຂອບໃຈຢ່າງສູງຕໍ່ການຕ້ອນຮັບຢ່າງອົບອຸ່ນ ມາຍັງທ່ານ ສີ ຈິ້ນຜິງ, ໃນໂອກາດທີ່ ທ່ານ ບຸນຍັງ ວໍລະຈິດ, ປະທານປະເທດແຫ່ງ ສປປ ລາວ ໄດ້ເດີນທາງມາຢ້ຽມຢາມເຮັດວຽກ ຢູ່ ສປ ຈີນ ໃນເດືອນ ພຶດສະພາ 2018 ທີ່ຜ່ານມາ.
ໃນການພົບປະຄັ້ງນີ້, ທັງສອງຝ່າຍໄດ້ຕີລາຄາຄືນ ການຈັດຕັ້ງປະຕິບັດຂອບການຮ່ວມມືຂອງສອງຝ່າຍ, ໂດຍສະເພາະ ການຈັດຕັ້ງຜັນຂະຫຍາຍ ຜົນຂອງການຢ້ຽມຢາມທາງລັດຖະກິດ ຢູ່ ສປປ ລາວ ຂອງ ທ່ານ ສີ ຈິ້ນຜິງ ໃນຕົ້ນເດືອນ ພະຈິກ 2017 ທີ່ຜ່ານມານັ້ນ, ເຊິ່ງໄດ້ກາຍເປັນເຫດການທີ່ສໍາຄັນຍິ່ງຕໍ່ການເສີມຂະຫຍາຍສາຍພົວພັນຮ່ວມມືຮອບດ້ານ, ໝັ້ນຄົງ ແລະ ຍາວນານ ລະຫວ່າງສອງປະເທດ ຕາມທິດ 4 ດີ, ແລະ ການເປັນຄູ່ຮ່ວມຊາຕາກໍາສັງຄົມນິຍົມຂອງສອງພັກ, ສອງລັດ ກໍ່ຄື ປະຊາຊົນສອງຊາດລາວ-ຈີນ.
ພ້ອມດຽວກັນນີ້, ສປປ ລາວ ກໍ່ໄດ້ແຈ້ງຄວາມຄືບໜ້າໃນການປະຕິບັດບັນດາໂຄງການຊ່ວຍເຫລືອຕ່າງໆຂອງລັດຖະບານ ສປ ຈີນ ຢູ່ ສປປ ລາວ ເຊິ່ງເຫັນວ່າມີຄວາມຄືບໜ້າດີ, ເປັນຕົ້ນ ແມ່ນໂຄງການກໍ່ສ້າງເສັ້ນທາງລົດໄຟຄວາມໄວສູງ ລາວ-ຈີນ ທີ່ດຳເນີນການກໍ່ສ້າງມາໄດ້ກ່ວາ 41% ແລ້ວ, ໂຄງການກໍ່ສ້າງໂຮງຮຽນເຕັກນິກທາງລົດໄຟ ເພື່ອສະໜອງບຸກຄະລາກອນຮັບໃຊ້ທາງລົດໄຟຢູ່ ສປປ ລາວ, ໂຄງການກໍ່ສ້າງໂຮງໝໍມະໂຫສົດຫຼັງໃໝ່ ແລະ ໂຄງການອື່ນໆ.


ນອກນັ້ນ, ສອງຝ່າຍ ຍັງໄດ້ເປັນເອກະພາບກັນກໍານົດເອົາປີ 2019 ເປັນປີທ່ອງທ່ຽວ ລາວ-ຈີນ.
ສປປ ລາວ ຢືນຢັນສືບຕໍ່ສະແດງການສະໜັບສະໜູນຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ເຊິ່ງມີນະໂຍບາຍເສີມຂະຫຍາຍ ແລະ ຮັດແໜ້ນການເຊື່ອມຈອດໃນພາກພື້ນ ກໍ່ຄື ສາກົນ. ສອງຝ່າຍຕົກລົງສືບຕໍ່ເອົາໃຈໃສ່ປະສານສົມທົບກັນໃຫ້ລະອຽດເລິກເຊິ່ງ ແລະ ທັນການຂຶ້ນກ່ວາເກົ່າ ເພື່ອຮັບປະກັນການຈັດຕັ້ງປະຕິບັດໂຄງການຮ່ວມມືກໍ່ສ້າງເສັ້ນທາງລົດໄຟ ລາວ-ຈີນ ໃຫ້ສຳເລັດຕາມຄາດໝາຍທີ່ວາງໄວ້; ສືບຕໍ່ຮ່ວມມືຢ່າງແໜ້ນແຟ້ນໃນການເປັນປະທານຮ່ວມ ຂອງ ສປປ ລາວ ແລະ ສປ ຈີນ ໃນຂອບແມ່ນ້ຳຂອງ-ແມ່ນ້ຳລ້ານຊ້າງ ໃຫ້ໄດ້ຮັບຜົນດີ, ຊຶ່ງ ສປປ ລາວ ຈະໄດ້ເປັນເຈົ້າພາບຈັດກອງປະຊູມລະດັບລັດຖະມົນຕີ ໃນເດືອນທັນວາ 2018 ທີ່ນະຄອນຫຼວງພະບາງ.


ໃນໂອກາດນີ້, ຝ່າຍລາວ ກໍ່ໄດ້ຂໍສະເໜີໃຫ້ ສປ ຈີນ ສືບຕໍ່ຊຸກຍູ້ນັກລົງທຶນຈີນ ໃຫ້ໄປລົງທຶນຢູ່ ສປປ ລາວ ໃຫ້ຫລາຍຂຶ້ນ ໂດຍສະເພາະ ໃນຂະແໜງຕ່າງໆທີ່ທັງສອງຝ່າຍມີທ່າແຮງ ເປັນຕົ້ນຄື: ການກໍ່ສ້າງພື້ນຖານໂຄງລ່າງ, ການຄົມມະນາຄົມຂົນສົ່ງ, ພະລັງງານ, ການທ່ອງທ່ຽວ, ອຸດສະຫະກໍາປຸງແຕ່ງ, ກະສິກໍາສະອາດ ແລະ ອື່ນໆ.
ນອກນັ້ນ, ທ່ານນາຍົກລັດຖະມົນຕີ ແລະ ຄະນະ ກໍ່ຍັງໄດ້ໄປຢ້ຽມຢາມຫົວຫນ່ວຍການຜະລິດເສດຖະກິດສຳຄັນຂອງນະຄອນຊຽງໄຮ້ ແລະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງນັກລົງທຶນຈຳນວນຫນຶ່ງຈາກ ສປ ຈີນ ທີ່ໄປລົງທຶນຢູ່ ສປປ ລາວ ຕື່ມອີກ.

ຂ່າວ;ພາບ: ກົມຂ່າວກະຊວງການຕ່າງປະເທດ

Be the first to comment

Leave a Reply

Your email address will not be published.


*