ຫ້ອງວ່າການປະທານປະເທດ ເຜີຍແຜ່ເອກະສານ ກ່ຽວກັບການ ຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ

ຂປລ.ໃນວັນທີ 1 ພະຈິກ 2018, ຢູ່ຫ້ອງປະຊຸມຫ້ອງວ່າການປະທານປະເທດ ໄດ້ຈັດກອງປະຊຸມເຜີຍແຜ່ເອກະສານ ກ່ຽວກັບການຈັດຕັ້ງປະຕິບັດ 8 ມາດຕະການຍຸກຍູ້ເສດຖະກິດ, ໂດຍການເປັນປະ ທານຂອງ ທ່ານ ເພັດສະໝອນ ພັນທະວົງ ຮອງເລຂາຄະນະພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການປະທານປະເທດ, ພ້ອມດ້ວຍພະນັກງານ ຫ້ອງວ່າການປະທານປະເທດ ເຂົ້າຮ່ວມ.

ທ່ານ ເພັດສະໝອນ ພັນທະວົງ ກ່າວວ່າ: ເພື່ອເຮັດໃຫ້ 8 ມາດຕະການ ໃນການຊຸກຍູ້ເສດຖະ ກິດ ໃຫ້ໄດ້ຮັບການຜັນຂະຫຍາຍ ເຂົ້າສູ່ວຽກງານຕົວຈິງຂອງບັນດາຂະແໜງການ ແລະ ທ້ອງຖິ່ນໃນຂອບເຂດທົ່ວປະເທດ ໃຫ້ເອົາໃຈໃສ່ຈັດຕັ້ງຜັນຂະຫຍາຍ ແລະ ທັງເປັນການຊຸກຍູ້ ການພັດທະນາເສດຖະກິດ-ສັງຄົມ 6 ເດືອນທ້າຍປີ 2018 ແລະ ສືບຕໍ່ຈັດຕັ້ງປະຕິບັດໃນປີ 2019 ໃຫ້ມີປະສິດທິຜົນ, ເພື່ອໃຫ້ສາ ມາດຂັບເຄື່ອນເສດຖະກິດພາຍໃນປະເທດ ໃຫ້ມີຄວາມຄ່ອງຕົວ.


ສຳລັບ 8 ມາດຕະການຊຸກຍູ້ເສດຖະກິດ ທີ່ຕິດພັນກັບພາລະບົດບາດ, ໜ້າທີ່ຄວາມຮັບຜິດຊອບ ແລະ ຂອບເຂດສິດ ມີ 1). ການສະກັດກັ້ນໄພເງິນເຟີ້ ແລະ ປັບປຸງນະໂຍບາຍເງິນຕາ. 2). ການປັບປຸງສະພາບແວດລ້ອມ ແລະ ອຳນວຍຄວາມສະດວກ ໃນການດຳເນີນທຸລະກິດ. 3). ການສືບຕໍ່ແກ້ໄຂໜີ້ສີນພາຍໃນ. 4). ການເກັບລາຍຮັບ ແລະ ຄຸ້ມຄອງລາຍຈ່າຍ. 5). ການພັດທະນາ SMEs ແລະ ສົ່ງເສີມການຜະລິດ. 6). ການປັບປຸງໂຄງສ້າງການລົງທືນ. 7). ການຄຸ້ມຄອງທີ່ດິນ ແລະ ການເກັບລາຍຮັບຈາກທີ່ດິນ ແລະ 8). ການຕິດຕາມ-ກວດກາ ການຈັດຕັ້ງປະຕິບັດລະບຽບກົດໝາຍຢ່າງເຂັ້ມງວດ.

ຂໍ້ມູນ: ຂ່າວສານປະເທດລາວ

Be the first to comment

Leave a Reply

Your email address will not be published.


*