ຊາອຸດິອາຣະເບຍ ຢືນຢັນບໍ່ມີ “ວິກິດນໍ້າມັນ” ຊໍ້າຮອຍ ປີ 1973

ສໍານັກຂ່າວຕ່າງປະເທດລາຍງານຈາກນະຄອນຣິຢາດ ປະເທດຊາອຸດິອາຣະເບຍ ເມື່ອວັນທີ່ 22 ຕຸລາ 2018 ກ່ຽວກັບປະເດັນວ່າແຮງກົດດັນຂອງກຸ່ມປະເທດຕາວັນຕົກຫຼາຍແຫ່ງຕໍ່ລັດຖະບານຣິຢາດ ຈາກການເສຍຊີວິດຂອງທ່ານ ຈາມາລ ຄາຊ໊ອກກີ ຜູ້ສື່ຂ່າວຊາວຊາອຸດິອາຣະເບຍ ເຊິ່ງຫາຍໂຕໄປເຂົ້າໄປໃນສະຖານກົງສູນໃຫຍ່ທີ່ເມືອງອິສຕັນບູລ ເມື່ອວັນທີ່ 2 ຕຸລາ ທີ່ຜ່ານມາ ຈະກາຍເປັນແຮງພັກດັນໃຫ້ລັດຖະບານຣິຢາດໃຊ້ມາດຕະການຕອບໂຕ້ດ້ວຍການສ້າງ “ວິກິດນໍ້າມັນ” ແບບດຽວກັບທີ່ເຄີຍເກີດຂື້ນປີ 1973 ຫຼືບໍ່ນັ້ນ


ທ່ານ ຄາລິດ ອັລ-ຟາລີ ລັດຖະມົນຕີວ່າກະຊວງພະລັງງານຂອງຊາອຸດິອາຣະເບຍ ກ່າວເມື່ອວັນຈັນວ່າລັດຖະບານຣິຢາດບໍ່ມີນະໂຍບາຍແບບນັ້ນ ວິກິດການດັ່ງກ່າວເກີດຂື້ນຕັ້ງແຕ່ເມື່ອ 45 ປີ ກ່ອນ ແລະ ໄດ້ຢຸດຕິໄປດົນຫຼາຍແລ້ວ ຊາອຸດິອາຣະເບຍເປັນປະເທດທີ່ໃຊ້ນະໂຍບາຍນໍ້າມັນດິບໃຫ້ສອດຄ່ອງກັບກົບໄກເສດຖະກິດໂລກ ໂດຍບໍ່ມີທາງນໍາເລື່ອງນີ້ໄປໃຊ້ເປັນເຄື່ອງຕໍ່ລອງທາງການເມືອງ

ທັງນີ້ ຍິ່ງລາຄານໍ້າມັນແພງຂື້ນເທົ່າໃດ ເສດຖະກິດໂລກຈະຊະລໍໂຕຫຼາຍຂື້ນເທົ່ານັ້ນຈົນອາດເຖິງຂັ້ນຖອຍ ຢ່າງໃດກໍ່ຕາມ ທ່ານຟາລີ ເຊິ່ງເປັນປະທານຂອງຊາອຸດິອາຣັມໂກອີກນຳ ກ່າວອີກວ່າຍັງບໍ່ມີສິ່ງໃດຢັ້ງຢືນໄດ້ວ່າ ສະຖານະການລາຄານໍ້າມັນດິບໃນຕະຫຼາດໂລກນັບຕັ້ງແຕ່ເດືອນໜ້າເປັນຕົ້ນໄປ “ຈະບໍ່ຜັນຜວນ” ຈາກການທີ່ມາດຕະການຂວໍ້າບາດການສົ່ງອອກນໍ້າມັນດິບຝ່າຍດຽວຂອງສະຫະລັດຕໍ່ອີຣ່ານຈະມີຜົນບັງຄັບໃຊ້ ນອກຈາກນີ້ ສະຖານະການພາຍໃນກຸ່ມປະເທດຜູ້ຜະລິດນໍ້າມັນດິບລາຍໃຫຍ່ຂອງໂລກອີກຫຼາຍແຫ່ງ ບໍ່ວ່າເປັນເວເນຊຸເອລາ ລິເບຍ ໄນຈີເລຍ ແລະ ເມັກຊິໂກ ຍັງຄົງຕ້ອງຈັບຕາຢ່າງໃກ້ຊິດ ແຕ່ທ່ານຟາລີ ເບິ່ງວ່າຜົນຜະລິດຈາກບຣາຊິວ ຄາຊັກສະຖານ ແລະ ສະຫະລັດ ໜ້າຈະຊ່ວຍຮັກສາສົມດຸນໃຫ້ກັບອຸປະທານໃນຕະຫຼາດໂລກ


ຍ້ອນໄປເມື່ອປີ 1973 ປະຊາຄົມຜູ້ສົ່ງອອກນໍ້າມັນອາຫລັບ (ໂອເອເປກ) ທີ່ມີຊາອຸດິອາຣະເບຍເປັນແກນນຳ ລະງັບຂາຍນໍ້າມັນດິບໃຫ້ສະຫະລັດ ເພື່ອຕອບໂຕ້ທີ່ອີກຝ່າຍສະໜັບສະໜູນອິສຣາເອລໃນສົງຄາມຍົມຄິປປູຣ ຫຼື ສົງຄາມຣອມມະດອນ ທີ່ສະມໍລະພູມ ສ່ວນໃຫຍ່ຢູ່ບໍລິເວນຄາບສະໝຸດໄຊນາຍ ແລະ ທີ່ຮາບສູງໂກລັນ ດ້ວຍຊະນວນເຫດຈາກການທີ່ອີຢິບຕ້ອງການເປີດຄອງສຸເອຊອີກຄັ້ງ ໂດຍພັນທະມິດອາຫລັບເປີດສາກໂຈມຕີອິສຣາເອລໃນວັນຍົມຄິປປູຣເຊິ່ງເປັນວັນສໍາຄັນຂອງສາສາໜາຢູດາ ແລະ ຊ່ວງກົງກັບເດືອນສິນອົດພໍດີ ແມ່ນວ່າອິສຣາເອລເປັນຝ່າຍຊະນະທາງທະຫານ ແຕ່ອີຢິບໄດ້ພື້ນທີ່ຝັ່ງຕາເວັນອອກຂອງຄອງສຸເອຊ ແລະ ລາຄານໍ້າມັນໃນສະຫະລັດພຸ່ງທະຍານພວດພາດຈົນເກີດພາວະຊ໊ອກ.

Be the first to comment

Leave a Reply

Your email address will not be published.


*