ສະຫລົດໃຈ!! ລົດຕໍາໃສ່ຝູງຊົນ ເສຍຊີວິດແລ້ວ 50 ຄົນ ບາດເຈັບກວ່າ 200 ຄົນ

ສໍານັກຂ່າວຕ່າງປະເທດລາຍງານຈາກເມືອງອຳຣິດສາ ລັດປັນຈາບ ປະເທດອິນເດຍ (Amritsar, Punjab, INDIA) ເມື່ອວັນທີ່ 19 ຕຸລາ 2018 ວ່າ ເຈົ້າໜ້າທີ່ຕໍາລວດ ແລະ ຜູ້ພິຍານທີ່ຢູ່ໃນເຫດການເປີດເຜີຍວ່າ ຂະບວນລົດໄຟສາຍໜຶ່ງໄດ້ແລ່ນເຂົ້າໄປໃນກຸ່ມປະຊາຊົນທີ່ຢືນເບິ່ງການຈູດບັ້ງພຸ ແລະ ດອກໄມ້ໄຟ ໃນເທສະການຂອງຊາວຮິນດູໃນພື້ນທີ່ຂອງລາງລົດໄຟ ໃນເມືອງອຳຣິດສາ ທາງພາກເໜືອຂອງປະເທດອິນເດຍເຊິ່ງກໍາລັງສະຫຼອງດຸເຊຣ່າ ສົ່ງຜົນໃຫ້ມີຜູ້ເສຍຊີວິດ 50 ຄົນ ແລະ ບາດເຈັບອີກ 200 ຄົນ.

ທາງເຈົ້າໜ້າທີ່ຕໍາຫຼວດເປີດເຜີຍວ່າ ຂະນະເກີດເຫດມີສຽງດັງຫຼາຍຈາກການຈູດບັ້ງພຸ ແລະ ດອກໄມ້ໄຟທີ່ຈູດສະຫຼອງເຮັດໃຫ້ຫຼາຍຄົນບໍ່ໄດ້ຍິນສຽງລົດໄຟທີ່ກໍາລັງແລ່ນເຂົ້າມາຈອດໃນສະຖານີຫຼາຍຄົນທີ່ຢືນຢູ່ພື້ນທີ່ຂອງລາງລົດໄຟຈຶ່ງຖືກຕຳຈົນເສຍຊີວິດ ແລະ ບາດເຈັບ ສ່ວນຜູ້ທີ່ເຫັນເຫດການບອກວ່າ ຂະນະເກີດ ເຫດມີສຽງດັງວຸ້ນວາຍໄປທົ່ວພື້ນທີ່ກວ່າຈະຮູ້ສຶກຕົວລົດໄຟທີ່ແລ່ນມາດ້ວຍຄວາມໄວຕຳເອົາປະຊາຊົນ ຈໍານວນຫຼາຍ.


ອິນເດຍເປັນປະເທດທີ່ມີເຄືອຂ່າຍເສັ້ນທາງລົດໄຟຂະໜາດໃຫຍ່ ເສັ້ນທາງທີ່ຂ້າມຜ່ານລາງລົດໄຟອີກຫຼາຍຮ້ອຍຈຸດສ່ວນຫຼາຍຈະບໍ່ມີຄົນຄວບຄຸມຈຶ່ງເຮັດໃຫ້ເກີດອຸບັດເຫດໄດ້ງ່າຍປະກອບກັບຜູ້ຂັບຂີ່ລົດໃຫຍ່ມັກຈະບໍ່ສົນໃຈຄໍາເຕືອນວ່າມີຂະບວນລົດໄຟກຳລັງແລ່ນມາ, ຕາມລາຍງານຂອງລັດຖະບານອິນເດຍ ເມື່ອປີ 2012 ລະບຸວ່າ ໃນແຕ່ລະປີຈະມີຜູ້ເສຍຊີວິດເພາະອຸບັດເຫດທາງລົດໄຟເກືອບ 15,000 ຄົນ.

ດ້ານທ່ານ ອະມະຣິນດາ ຊິງ ມົນຕີແຫ່ງລັດປັນຈາບໄດ້ສັ່ງການໃຫ້ສອບສວນໃນຄະດີນີ້ແລ້ວ ສ່ວນທ່ານນາຍົກລັດມົນຕີເຣນທຣາ ໂມດີ ຂອງອິນເດຍກ່າວວ່າ ອຸບັດເຫດຄັ້ງນີ້ເປັນໂສກນາຕະກໍາທີ່ສະເທືອນໃຈ ແລະ ຂໍສະແດງຄວາມເສຍໃຈໄປຍັງຄອບຄົວ ຂອງຜູ້ເສຍຊີວິດ ແລະ ອວຍພອນໃຫ້ຜູ້ໄດ້ຮັບບາດເຈັບເຊົາເປັນປົກກະຕິໂດຍໄວ.

Be the first to comment

Leave a Reply

Your email address will not be published.


*