ກໍາປູເຈຍ ເຈລະຈາລົ້ມເຫຼວ ຂໍໃຫ້ອີຢູ ເວັ້ນມາດຕະການກົດດັນທາງການຄ້າ

ສໍານັກຂ່າວຕ່າງປະເທດລາຍງານຈາກນະຄອນບຣັສເຊລ ປະເທດເບລຢ້ຽມ ເມື່ອວັນທີ່ 20 ຕຸລາ 2018 ວ່າ ທ່ານນາງ ເຟເດຣິກາ ໂມແກຣິນີ ຜູ້ແທນລະດັບສູງດ້ານນະໂຍບາຍຕ່າງປະເທດ ແລະ ຄວາມໝັ້ນຄົງຂອງສະຫະພາບຢູໂຣບ (ອີຢູ) ກ່າວເມື່ອວັນສຸກວ່າການຫາລືຮ່ວມກັບຄະນະເຈົ້າໜ້າທີ່ລະດັບສູງຂອງກໍາປູເຈຍນໍາໂດຍ ສົມເດັດຮຸນ ເຊນ ນາຍົກລັດຖະມົນຕີ “ຍັງບໍ່ອາດນໍາໄປສູ່ຂໍ້ສະຫຼຸບ” ເນື່ອງຈາກ “ພື້ນທີ່ປະຊາທິປະໄຕ” ໃນສັງຄົມກໍາປູເຈຍຍັງຄັບແຄບ ເຊິ່ງເປັນຜົນຈາກການເລືອກຕັ້ງທົ່ວໄປເມື່ອວັນທີ່ 29 ກໍລະກົດ ທີ່ຜ່ານມາ ເຊິ່ງພັກປະຊາຊົນກໍາປູເຈຍ (ຊີພີພີ) ຂອງສົມເດັດຮຸນ ເຊັນ ໄດ້ຮັບການເລືອກຕັ້ງໃນທັງ 125 ບ່ອນນັ່ງຂອງສະພາຜູ້ແທນປະຊາຊົນ


ດ້ານລັດຖະບານກຳປູເຈຍຍັງບໍ່ສະແດງທ່າທີຢ່າງເປັນທາງການຕໍ່ຜົນການຫາລືຮ່ວມກັບທ່ານນາງ ໂມເກຣີນີ ເຊິ່ງເປັນການພົບກັນນອກຮອບການປະຊຸມສຸດຍອດຜູ້ນໍາອາຊຽນ-ຢູໂຣບ (ອາເຊມ) ທີ່ເກີດຂື້ນປະມານ 2 ອາທິດຫຼັງຄະນະກໍາມາທິການດ້ານນະໂຍບາຍການຄ້າຂອງສະຫະພາບຢູໂຣບ (ອີຢູ) ປະກາດວ່າທີ່ປະຊຸມມີມະຕິເຫັນດີກຽມຖອນສິດທິປະໂຫຍດທາງການຄ້າຂອງກໍາປູເຈຍໃນການເຂົ້າເຖິງລະບົບຕະຫຼາດດຽວກັບສະຫະພາບ ທີ່ເປັນໂຄຕ້າສົ່ງອອກສິນຄ້າເປັນກໍລະນີພິເສດໃຫ້ແກ່ “ກຸ່ມປະເທດທີ່ພັດທະນາໜ້ອຍທີ່ສຸດ” ( Least Developed Countries : LLDGs ) ເພື່ອຊ່ວຍກະຕຸ້ນເສດຖະກິດຂອງກຸ່ມປະເທດເຫຼົ່ານີ້ ແຕ່ໂຄຕ້ານັ້ນຍົກເວັ້ນສິນຄ້າຈໍາພວກອາວຸດຍຸດໂທປະກອນ ( Everything but Arms : EBA )


ທັງນີ້ ເມື່ອໃດກໍ່ຕາມທີ່ມາດຕະການດັ່ງກ່າວມີຜົນບັງຄັບໃຊ້ ສິນຄ້າສົ່ງອອກຈາກກໍາປູເຈຍທີ່ລວມເຖິງນໍ້າຕານ ແລະ ເສື້ອຜ້າສໍາເລັດຮູບຈະຕ້ອງປະເຊີນກັບກໍາແພງພາສີໃນໄລຍະເວລາ 12 ເດືອນ ປັດຈຸບັນອີຢູຖືເປັນຕະຫຼາດເສື້ອຜ້າສໍາເລັດຮູບ ແລະແຜ່ນແພລາຍໃຫຍ່ຂອງກໍາປູເຈຍ ດ້ວຍສັດສ່ວນການຮັບຊື້ຫຼາຍເຖິງ 40% ຂອງສິນຄ້າທີ່ຜະລິດທັງໝົດໃນປີ 2016 ຂະນະທີ່ມູນຄ່າການສົ່ງອອກສິນຄ້າທັງໝົດຈາກກໍາປູເຈຍສູ່ອີຢູສະເພາະເມື່ອປີຜ່ານມາຢູ່ທີ່ 5,000 ລ້ານຢູໂຣ

Be the first to comment

Leave a Reply

Your email address will not be published.


*