ຖະແຫລງຂ່າວເປີດຕົວ ຄູຝຶກ ທີມຊາດລາວ ຊຸດໃຫຍ່ ຄົນໃຫມ່

ຕອນບ່າຍ ວັນສຸກ 12 ຕຸລາ 2018 ຢູ່ທີ່ຫ້ອງປະຊຸມ ສະຫະພັນບານເຕະແຫ່ງຊາດລາວ ໄດ້ມີພິຖະແຫລ່ງຂ່າວ ໄດ້ມີພິທະຖະແຫລງຂ່າວເປີດຕົວ ຄູຝຶກ ທີມຊາດລາວ ຊຸດໃຫຍ່ ຄົນໃຫມ່ ທ່ານ ວາຣາດາຣາຈູ ຊູນດຣາມ ມູຣທີ (Varadaraju Sundram moorthy) ຊາວສິງກະໂປ ໄວ 52 ປີ ອະດີດ ກອງກາງ ແລະ ກອງຫນ້າ ທີມຊາດສິງກະໂປ ແລະ ອະດີດ ຄູຝຶກ ທີມຊາດ ສິງກະໂປ ເຂົ້າມາຄຸມທີມຊາດລາວ ແທນ ຄູຝຶກ ທ່ານ ໄມວ໋ອງ ( Mike Wong Mun Heng ) ທີ່່ເຂົ້າມາຄຸມທີມຊາດລາວ ນັບຕັ້ງແຕ່ປີ 2017 ທີ່ຜ່ານມາ, ໂດຍ ທ່ານ ວາຣາດາຣາຈູ ຊູນດຣາມ ມູຣທີ ໄດ້ເຊັນສັນຍາຄຸມທີມຊາດລາວ ຊຸດໃຫຍ່ ເປັນເວລາ 3 ປີ ໂດຍຄູຝຶກດັ່ງກ່າວໄດ້ເດີນທາງມາເຖິງ ປະເທດ ລາວ ວັນຈັນ 08 ຕຸລາ 2018 ທີຜ່ານມາ ເຊິ່ງໄດ້ນຳພານັກກິລາຝຶກຊ້ອມນັບຕັ້ງແຕ່ວັນອັງຄານ 09 ຕຸລາ 2018 ເປັນຕົ້ນມາ, ຈະເລີ່ມຄຸມທີມໃນນັດອຸ່ນເຄື່ອງ FIFA DAY ພົບກັບ ທີມຊາດມົງໂກລີ ໃນວັນອັງຄານ 16 ຕຸລາ 2018 ເວລາ 18:30 ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ເຂົ້າຊົມຟຣີ ຖ່າຍທອດສົດ ທາງ ໂທລະພາບ ທີວີລາວ ແລະ Mycujoo.tv.


ເຂົ້າຮ່ວມພິທີຖະແຫລງຂ່າວດັ່ງກ່າວໂດຍມີ ທ່ານ ວີເພັດ ສີຫາຈັກຣ, ທ່ານ ນາງ ກັນຍາ ແກ້ວມະນີ ພ້ອມດ້ວຍພາກສ່ວນທີ່ກຽວຂ້ອງ ແລະ ສື່ມວນຊົນເຂົ້າຮ່ວມ.
ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ກ່າວວ່າ: ສຳລັບການເລືອກຄູຝຶກຊາວ ສິງກະໂປ ມາຄຸມທີມຊາດລາວ ຊຸດໃຫຍ່ ໃນຄັ້ງນີ້ ເນື່ອງຈາກວ່າເຄີຍຮູ້ຈັກກັນມາກ່ອນໃນຕອນຄຸມ ຊີເກມ 2009 ເຊິ່ງທ່ານນີ້ ຄຸມທີມຊາດ ສິງກະໂປ ໃນຊຸດນັ້ນ ເຫັນວ່າ ທ່ານເປັນຜູ້ຊ່ຽວຊານ ໃນການພັດທະນານັກເຕະເຍົາວະຊົນ ຫລື ການສ້າງນັກເຕະເຄິ່ງອາຊີບ ຢູ່ ສິງກະໂປ ດັ່ງນັ້ນຈຶ່ງໄດ້ເລືອກຄູຝຶກ ຊາວສິງກະໂປ ມາຄຸມທີມ.


ສ່ວນ ທ່ານ ວາຣາດາຣາຈູ ຊູນດຣາມ ມູຣທີ ໄດ້ສະແດງຄວາມຮູ້ສຶກ ເປັນກຽດຢ່າງສູງທີ່ໄດ້ເຂົ້າມາຮັບຫນ້າເປັນຫົວຫນ້າ ຄູຝຶກ ທີມຊາດລາວ ຊຸດໃຫຍ່ ຕະຫລອດໄລຍະເວລາ ທີ່ໄດ້ນຳພານັກເຕະ ທີມຊາດລາວ ມາຝຶກຊ້ອມ 3 ມື້ທີ່ຜ່ານມາເຫັນວ່ານັກເຕະລາວ ສ່ວນຫລາຍແມ່ນຍັງຫນຸ່ມນ້ອຍເຊິ່ງເປັນຜົນດີຕໍ່ກັບການພັດທະນາວົງການບານເຕະລາວໃນອະນາຄົດ, ຢ່າງໃດກໍຕາມຕໍ່ກັບການກຽມທີມເຂົ້າຮ່ວມ ການແຂ່ງຂັນບານເຕະ ຊີງແຊ້ມອາຊຽນ AFF Suzuki Cup 2018 ປັດຈຸບັນ ກຳລັງປະເມີນນັກເຕະວ່າມີຈຸດດີ, ຈຸດອ່ອນ ຄືແນວໃດເພື່ອກຽມພ້ອມເຂົ້າຮ່ວມການແຂ່ງຂັນລາຍການດັ່ງກ່າວ.


ສຳລັບປະຫວັດຜົນງານຂອງ ທ່ານ ຊູນດຣາມ ມູຣທີ ສະໄຫມເປັນນັກເຕະ ເຄີຍຫລິ້ນໃຫ້ ສະໂມສອນ FC Basel ໃນສະວິດເຊີແລນ ປີ 1987-1988, ພ້ອມກັນນີ້ ປີ 1989 – 1990 ຫລິ້ນກັບສະໂມສອນ KEDAH ໃນມາເລເຊຍ, ປີ 1991-1992 ຫລິ້ນໃຫ້ກັບ ສະໂມສອນ Pahang ໃນມາເລເຊຍ, ປີ 1991 – 1992 ຫລິ້ນໃຫ້ກັບ KELANTAN ໃນມາເລເຊຍ ແລະ ປີ 1995 – 1977 ຫລິ້ນໃຫ້ກັບ ສະໂມສອນ Woodlands Wellington ສິງກະໂປ, ປີ 1998 – 2003 ເປັນນັກເຕະ ແລະ ຄູຝຶກ ສະໂມສອນ Jurong FC ໂດຍສາມາດຫລິ້ນຕໍາແໜ່ງກອງກາງ ແລະ ກອງຫນ້າ ສ່ວນຜົນງານລະດັບທີມຊາດ ຫລິ້ນໃຫ້ກັບ ທີມຊາດສິງກະໂປ ປີ 1983 – 1993


ຊັນດຣາມູຣທີ ຜັນຕົວເປັນຄູຝຶກໃນປີ 1999 ເຄີຍຄຸມ 6 ສະໂມສອນທີ່ມີຊື່ສຽງໃນສິງກະໂປ ເປັນຕົ້ນ Young Lions ແລະ Tampines Rovers, ເດັ່ນສຸດຄຸມສະໂມສອນ LionsXII ຄວ້າແຊ້ມລີກສູງສຸດຂອງມາເລເຊຍ ໃນປີ 2013, ຄຸມສະໂມສອນ LionsXII ຄວ້າແຊ້ມລີກສູງສຸດຂອງມາເລເລເຊຍໃນປີ 2013 ສ່ວນຜົນງານການຄູມທີມຊາດ, ເຄີຍຄຸມທີມຊາດ ສິງກະໂປ U18 ປີ 2004-2006, ທີມຊາດສິງກະໂປ U23 ປີ 2007-2008, ທີມຊາດສິງກະໂປ U21 ປີ 2009, ຜູ້ຊ່ວຍຄູຝຶກທີມຊາດສິງກະໂປ ຊຸດໃຫຍ່ ປີ 2011, ທີມຊາດສິງກະໂປ ASIAN GAMES ປີ 2010 ແລະ ລ່າສຸດ ຄຸມທີມຊາດສິງກະໂປ ຊຸດໃຫຍ່ ປີ 2016 – 2018.


ການແຂ່ງຂັນ ທີມຊາດລາວ ໃນລາຍການແຂ່ງຂັນ AFF Suzuki Cup 2018 ຢູ່ ຮ່ວມ ກຸ່ມ ເອ ປະກອບມີ : ຫວຽດນາມ, ມາເລເຊຍ, ມຽນມາ, ກຳປູເຈຍ ແລະ ລາວ .
– ວັນທີ 08 ພະຈິກ 2018 ທີມຊາດລາວ ພົບ ທີມຊາດຫວຽດນາມ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ຖ່າຍທອດສົດ ທີວີລາວ )
– ວັນທີ 12 ພະຈິກ 2018 ທີມຊາດມາເລເຊຍ ພົບ ທີມຊາດລາວ ແຂ່ງຂັນຢູ່ທີ່ສະຫນາມ Bukit Jalil National, Kuala Lumpur.


– ວັນທີ 16 ພະຈິກ 2018 ທີມຊາດລາວ ພົບ ທີມຊາດມຽນມາ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ຖ່າຍທອດສົດ ທີວີລາວ )

– ວັນທີ 20 ພະຈິກ 2018 ທີມຊາດກຳປູເຈຍ ພົບ ທີມຊາດລາວ ແຂ່ງຂັນຢູ່ທີ່ສະຫນາມ National Olympic, Phnom Penh

ພາບ-ຂ່າວ: ສຕລ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *