ຣັດເຊຍ-ຕຸລະກີຕົກລົງຕັ້ງ “ພື້ນທີ່ກັນຊົນ” ໃນອິດລິບ

ສໍານັກງານຕ່າງປະເທດລາຍງານຈາກເມືອງໂຊຊິ ປະເທດຣັດເຊຍ ເມື່ອວັນທີ່ 18 ກັນຍາວ່າ ປະທານາທິບໍດີວາລາດີເມຍ ປູຕິນ ກ່າວເມື່ອວັນຈັນ ຫຼັງພົບຫາລືກັບປະທານາທິບໍດີເຣເຊປ ເທຢິປ ເອີຣໂດກັນ ທີ່ເມືອງໂຊຊິ ວ່າຣັດເຊຍ ແລະ ຕູລະກີເຫັນເປັນເອກະພາບຈັດຕັ້ງ “ແນວກັນຊົນ” ເປັນໄລຍະທາງຍາວປະມານ 15-20 ກິໂລແມັດ ໃນແຂວງອິດລິບ ທີ່ຢູ່ທາງຕາເວັນຕົກສຽງເໜືອຂອງຊີເຣຍໂດຍກອງທັບຣັດເຊຍເຊິ່ງສະໜັບສະໜູນລັດຖະບານດາມັສກັສ ຈະລາດຕະເວນໃນບໍລິເວນດັ່ງກ່າວຕະຫຼອດ 24 ຊົ່ວໂມງ ຮ່ວມກັບກອງທັບຕຸລະກີເຊິ່ງເປັນໜຶ່ງໃນສະມາຊິກຂອງອົງການສົນທິສັນຍາແອດແລນຕິກເໜືອ (ນາໂຕ) ແລະສະໜັບສະໜູນກອງກໍາລັງຝ່າຍຕໍ່ຕ້ານລັດຖະບານຊີເຣຍ


ຢ່າງໃດກໍ່ຕາມ ທ່ານປູຕິນ ຍື່ນຄໍາຂາດວ່າ “ກຸ່ມນັກຮົບຫົວຮຸນແຮງ” ເຊິ່ງລວມກຸ່ມຮາຢັດ ຕາຫຣີ-ອັລ-ຊາມ ຫຼື ອາດີດກຸ່ມ ອັລ-ນຸສຣາ ຕ້ອງຖອນກໍາລັງຈາກເຂດກັນຊົນພາຍໃນວັນທີ່ 15 ຕຸລານີ້ ຂະນະທີ່ເຄື່ອນຍ້າຍອາວຸດໜັກອອກຈາກພື້ນທີ່ ບໍ່ວ່າຈະເປັນປືນໃຫຍ່ຫຼືລະບົບປ້ອງກັນຂີປະນາວຸດຕ້ອງສໍາເລັດໃນວັນທີ່ 10 ຕຸລານີ້ ພ້ອມທັງຢືນຢັນວ່າຣັດເຊຍຈະໃຊ້ມາດຕະການປ້ອງກັນບໍ່ໃຫ້ເຂດປອດຄວາມຮຸນແຮງທາງດ້ານທະຫານໃນແຂວງອິດລິບຕົກເປັນເປົ້າໝາຍຂອງການສ້າງສະຖານະການໂດຍ “ບຸກຄົນທີ່ 3”


ແມ່ນວ່າຍັງບໍ່ມີການເປີດເຜີຍລາຍລະອຽດຢ່າງຊັດເຈນ ວ່າຂໍ້ຕົກລົງດັ່ງກ່າວຈະສາມາດແບ່ງແຍກແຕ່ລະຝ່າຍອອກຈາກກັນໄດ້ແບບໃດ ແຕ່ຜູ້ນໍາຝ່າຍຕຸລະກີກ່າວວ່າ ການດໍາເນີນການເຊັ່ນນີ້ຈະຊ່ວຍປ້ອງກັນ “ຫາຍະນະດ້ານມະນຸດຊະຍະຊົນ” ໃນແຂວງອິດລິບ ດ້ານພົນເອກ ເຊີຣເກ ຊອຍກູ ລັດຖະມົນຕີກະຊວງປ້ອງກັນປະເທດຣັດເຊຍ ກ່າວວ່າປະທານາທິບໍດີບາຊາຣ ອັລ-ອັສຊາດ ຮັບຮູ້ ແລະ ເຫັນດີເລື່ອງນີ້ແລ້ວ ສ່ວນ ທ່ານ ອາມູ ໂອມາຣ ໂຄສົກກຸ່ມເຟລັກ ອັລ-ຊາມ ໜຶ່ງໃນກອງກໍາລັງຝ່າຍຕໍ່ຕ້ານລັດຖະບານຊີເຣຍທີ່ໄດ້ຮັບຄວາມສະໜັບສະໜູນຈາກຕຸລະກີ ກ່າວຂອບໃຈທ່ານເອີຣໂດກັນ ເຊິ່ງຊ່ວຍປ້ອງກັນບໍ່ໃຫ້ສະຖານະການຮຸນແຮງໄປກວ່ານີ້ ເພາະ “ຊາວອິດລິບນັບສິບລ້ານຄົນຕ້ອງການຢູ່ຢ່າງສັນຕິ”


ທັງນີ້ແຂວງອິດລິບເປັນຖານທີ່ໝັ້ນຂະໜາດໃຫຍ່ແຫ່ງສຸດທ້າຍຂອງກອງກໍາລັງຝ່າຍຕໍ່ຕ້ານລັດຖະບານ ໂດຍຕົກຢູ່ໃນທ່າມກາງວົງລ້ອມຂອງກອງທັບຊີເຣຍຕັ້ງແຕ່ທ້າຍເດືອນທີ່ຜ່ານມາ ເພື່ອກຽມຄວາມພ້ອມສໍາລັບປະຕິບັດການຍຶດພື້ນທີ່ເຊິ່ງຢູ່ພາຍໃຕ້ການປົກຄອງຂອງຝ່າຍກະບົດມາດົນກວ່າ 3 ປີ

Be the first to comment

Leave a Reply

Your email address will not be published.


*