ປະຊາຊົນເມືອງຊຳໃຕ້ ພົບເຫັນພະພຸດທະຮູບບູຮານທີ່ເກົ່າແກ່ 12 ອົງ ແລະຄ້ອງບູຮານ

ຂ່າວແຂວງຫົວພັນ ລາຍງານໃນວັນທີ 18 ກັນຍານີ້ວ່າ: ເນື່ອງຈາກວ່າປີນີ້ເປັນປີທີ່ເມືອງຊຳໃຕ້ໄດ້ຮັບຜົນກະທົບຈາກໄພນໍ້າຖ້ວມໜັກເຮັດໃຫ້ດິນມີການເຊາະເຈື່ອນເປັນຈຳນວນຫຼວງຫຼາຍເຮັດໃຫ້ມີຫຼາຍສິ່ງຫຼາຍຢ່າງໄຫຼເສາະໄປຕາມກະແສ ນໍ້າ, ດັ່ງນັ້ນມາໃນຕົ້ນເດືອນ ກັນຍາ 2018 ນີ້, ຫຼັງຈາກນໍ້າຊຳຕອນໃຕ້ບົກແຫ້ງ ທ້າວ ບຸນຍອດ ທອງວິຄຳ ອາຍຸ 34 ປີ ປະຊາຊົນບ້ານພຽງຖິ່ນກຸ່ມບ້ານພັນຊຳເມືອງຊຳໃຕ້ໄດ້ພົບເຫັນຄ້ອງບັ້ງທີ່ເຮັດດ້ວຍທອງທີ່ເປັນເຄື່ອງບູຮານເກົ່າແກ່ຢູ່ດອນຊາຍນໍ້າຊຳກົງກັນຂ້າມກັບບ້ານພຽງຖິ່ນ, ຄ້ອງບັ້ງທອງໜ່ວຍນີ້ມີນໍ້າໜັກ ທັງໝົດ 42 ກິໂລ, ກວ້າງ 68 ຊັງຕີແມັດ, ສູງ 46 ຊັງຕີແມັດ, ລວງຮອບກວ້າງສຸດ 208 ຊັງຕີແມັດ, ແຄບສຸດ 180 ຊັງຕີແມັດ, ໜາປະມານ 0,5 ຊັງຕີແມັດ, ໜ້າຂອງຄ້ອງມີຮູບສັດ, ນອກຈາກນີ້ຍັງມີການຄວັດລວດລາຍເຕັມໜ່ວຍຄ້ອງດັ່ງກ່າວນີ້ເປັນການສະແດງໃຫ້ເຫັນເຖິງສີໄມ້ລາຍມືອັນປານີດຂອງຄົນບູຮານໃນສະໄໝກ່ອນ, ຜ່ານການເລົ່າລືຂອງຜູ້ເຖົ້າຜູ້ແກ່ຕາມຄວາມເຊື່ອຖືໃຫ້ຮູ້ວ່າ: ຄ້ອງບັ້ງໜ່ວຍນີ້ອາດຈະໄຫຼມາຈາກບ້ານພຽງເມືອງຊື່ງເປັນບ້ານເກົ່າແກ່ຂອງເມືອງຊຳໃຕ້ທີ່ມີວັດວາອາຣາມແຕ່ມາປີນີ້ຖືກນໍ້າເສາະເຈື່ອນເຮັດໃຫ້ມີວັດຖຸຫຼາຍຢ່າງທີ່ຖົມຢູ່ພື້ນດິນໄຫຼອອກມາໃຫ້ຄົນຣຸ່ນຫຼັງໄດ້ເຫັນບ້ານພຽງເມືອງໃນສະໄໝກ່ອນປະຈຸບັນນີ້ແມ່ນບ້ານເມືອງຂັນ.

ນອກຈາກນີ້ປະຊາຊົນເມືອງຊຳໃຕ້ຍັງໄດ້ພົບເຫັນພະພຸດທະຮູບຢູ່ດອນຫາດຊາຍທາງທິດໃຕ້ຂອງບ້ານຈຳນວນ 12 ອົງ, ໃນນີ້ພະພຸດທະຮູບເງິນ 2 ອົງ ແລະ ພະຊືນ 10 ອົງ. ສະນັ້ນມາໃນກາງເດືອນ ກັນຍາ 2018 ນີ້ ທ່ານ ຄອນສີ ວິໄລຍາ ຫົວໜ້າຫ້ອງການ ຖະແຫລງຂ່າວ, ວັດທະນະທຳ ແລະ ທ່ອງທ່ຽວເມືອງຊຳໃຕ້ພ້ອມດ້ວຍພາກສ່ວນທີ່ກ່ຽວຂ້ອງຂອງເມືອງໄດ້ສົມທົບກັບອຳນາດການປົກຄອງກຸ່ມບ້ານ, ບ້ານ ແລະ ເຖົ້າແກ່ແນວໂຮມບ້ານພ້ອມກັນຄົ້ນຄວ້າປຶກສາຫາລືເພື່ອເປັນເອກະພາບໃນການຄຸ້ມຄອງປົກປັກຮັກສາ ແລະ ປະຕິບັດຕາມກົດໝາຍມໍລະດົກບໍ່ໃຫ້ຄົນອື່ນມາຕວະຊື້ ຫຼື ມາທົດລອງວິໄຈ ແລະ ອື່ນໆໂດຍບໍ່ໄດ້ຮັບການອະນຸຍາດມອບໃຫ້ວິຊາການເກັບກຳຂໍ້ມູນເພື່ອສະເໜີລາຍງານຂັ້ນເທິງຮັບຊາບ. ສ່ວນພະພຸດ


ທະຮູບພະສົງສຳມະເນນ, ເຖົ້າແກ່ແນວໂຮມ ແລະ ປະຊາຊົນໄດ້ທຳພິທີທາງສາສະໜາ ແລະ ອັງເຊີນໄປປະດິດສະຖານຢູ່ວັດບ້ານຊຳໃຕ້ເປັນທີ່ຮຽບຮ້ອຍແລ້ວ.

Be the first to comment

Leave a Reply

Your email address will not be published.


*