ສັງເວີຍແລ້ວຢ່າງໜ້ອຍ 5 ສົບ ! ຈາກລິດເຮີລິເຄນ “ຟໍເຣນຊ”

ສໍານັກຂ່າວຕ່າງປະເທດລາຍງານຈາກເມືອງວິລມິງຕັນ ລັດນອຣທແຄໂຣໄລນາ ປະເທດສະຫະລັດອາເມລິກາ ເມື່ອວັນທີ່ 14 ວ່າສູນເຮີລິເຄນແຫ່ງຊາດຂອງສະຫະລັດ (ເອັນເອຊຊີ) ລາຍງານວ່າສູນກາງຂອງເຮີລິເຄນຟໍເຣນຊເຂົ້າທີ່ເມືອງໄຣສວິລລ ບີຊ ໃນລັດນອຣທແຄໂຣໄລນາ ເມື່ອຊ່ວງເຊົ້າຂອງວັນສຸກ ຕາມເວລາທ້ອງຖິ່ນ ດ້ວຍຄວາມໄວລົມສູງສຸດໃກ້ສູນກາງ 150 ກິໂລແມັດຕໍ່ຊົ່ວໂມງ ຈັດຢູ່ໃນລະດັບ 1 ຕາມາດຕາວັດແທກຊັຟເຟີຣ-ຊິມສັນ


ຢ່າງໃດກໍ່ຕາມ ເອັນເອຊຊີຢໍ້າວ່າອິດທິພົນຂອງພາຍຸໜ່ວຍນີ້ຫຼັງຈາກນັ້ນຈະອ່ອນກໍາລັງລົງເປັນພາຍຸໂຊນຮ້ອນ “ຍັງຄົງຮຸນແຮງ” ເຊິ່ງອາດຈະສົ່ງຜົນໃຫ້ເກີດຝົນຕົກໜັກ ແລະ ນໍ້າຖ້ວມກະທັນຫັນເປັນວົງກ້ວາງຕາມແນວແຄມຝັ່ງແຄໂຣໄລນາ ທີ່ເປັນສະຖານທີ່ຕັ້ງຂອງລັດນອຣທ ແລະ ເຊົາແຄໂຣໄລນາ ເນື່ອງຈາກພາຍຸມີລັດສະໝີການທໍາລາຍກວ້າງ 645 ກິໂລແມັດຕໍ່ຊົ່ວໂມງ ແລະ ເຄີຍສະສົມກໍາລັງລົມຮຸນແຮງເກືອບເປັນເຮີລິເຄນລະດັບ 5 ມາແລ້ວ


ທັງນີ້ 5 ລັດຕາມແນວຝັ່ງຕາເວັນອອກຂອງສະຫະລັດ ໄດ້ແກ່ ນອຣທແຄໂຣໄລນາ ເຊົາແຄໂຣໄລນາ ຈໍເຈຍ ແມຣິແລນ ແລະ ເວີຈິເນຍ ຍັງຄົງຢູ່ພາຍໃຕ້ຄໍາສັ່ງສະຖານະການສຸກເສີນທັງໃນລະດັບລັດ ແລະ ລະດັບປະເທດ ໂດຍປະຊາຊົນຫຼາຍກວ່າ 1.7 ລ້ານຄົນຈາກລັດກຸ່ມນີ້ໄດ້ຮັບຄໍາສັ່ງ ແລະ ຂໍຄວາມຮ່ວມມືໃຫ້ອົບພະຍົບອອກຈາກພື້ນທີ່ ດ້ານສາຍການບິນໃນສະຫະລັດຍົກເລີກຖ້ຽວບິນໃນເສັ້ນທາງພາກຕາເວັນອອກຂອງປະເທດລວມກັນຫຼາຍກວ່າ 2,400 ຖ້ຽວບິນແລ້ວ ດ້ວຍທັດສະນະວິໄສທີ່ບໍ່ດີ ແລະ ປະລິມານນໍ້າຝົນສະສົມສູງເຖິງ 50 ຊັງຕີແມັດໃນບາງພື້ນທີ່


ດ້ານສໍານັກງານຈັດການພາວະສຸກເສີນສ່ວນກາງ (ຟີມາ) ລາຍງານຈາກການພົບຜູ້ເສຍຊີວິດຈາກອິດທິພົນຂອງເຮີລິເຄນໜ່ວຍນີ້ແລ້ວ 5 ສົບ ໜຶ່ງໃນນັ່ນເປັນເດັກນ້ອຍເສຍຊີວິດພ້ອມກັບແມ່ ຫຼັງເກີດເຫດຕົ້ນໄມ້ຫັກລົ້ມໃສ່ເຮືອນ ໃນເຂດເມືອງວິລມິງຕັນ ຂະນະທີ່ລະບົບຈ່າຍກະແສໄຟຟ້າໃນພື້ນທີ່ບາງສ່ວນຍັງຄົງຂັດຂ້ອງ ສົ່ງຜົນກະທົບຕໍ່ປະຊາຊົນກວ່າ 800,000 ຄົວເຮືອນຕາມແນວຊາຍຝັ່ງແຄໂຣໄລນາ ສ່ວນທໍານຽບຂາວຢືນຢັນຄວາມພ້ອມສົ່ງຄວາມຊ່ວຍເຫຼືອຢ່າງເຕັມທີ່ໄປບ່ອນທີ່ປະສົບໄພ ແລະ ປະທານາທິບໍດີໂດນັລ ທຣັມ ກຽມລົງພື້ນທີ່ດ້ວຍໂຕເອງໃນໄວໆນີ້

Be the first to comment

Leave a Reply

Your email address will not be published.


*