ຊຸບເປີໄຕ້ຝຸ່ນ “ມັງຄຸດ” ຖະລົ່ມເກາະລູຊອນຂອງຟິລິປິແລ້ວ

ສໍານັກຂ່າວຕ່າງປະເທດລາຍງານຈາກນະຄອນມະນິລາ ປະເທດຟິລິປິນ ເມື່ອວັນທີ່ 15 ກັນຍາ ວ່າສໍານັກງານອຸຕຸນິຍົມວິທະຍາແຫ່ງຊາດຂອງຟິລິປິນລາຍງານວ່າໄຕ້ຝຸ່ນມັງຄຸດ ຂື້ນຝັ່ງເມືອງແບ໊ກເກົາ ໃນແຂວງຄາກາຢັນ ເທິງເກາະລູຊອນທີ່ຢູ່ທາງເໜືອຂອງຟິລິປິນ ເມື່ອເວລາ 1:40 ໂມງ ຕາມເວລາທ້ອງຖິ່ນຂອງວັນເສົາ (00:40 ຕາມເວລາປະເທດເຮົາ) ດ້ວຍຄວາມໄວລົມສູງສຸດໃກ້ສູນກາງ 255 ກິໂລແມັດຕໍ່ຊົ່ວໂມງ ຄວາມໄວລົມສູງສຸດ 330 ກິໂລແມັດຕໍ່ຊົ່ວໂມງ ແລະ ມີຂະໜາດເສັ້ນຜ່າສູນກາງ 900 ກິໂລແມັດ ຈັດຢູ່ໃນລະດັບ 5 ເຊິ່ງເປັນຂັ້ນສູງສຸດຕາມມາດຕາວັດພາຍຸຊັຟເຟີຣ-ຊິມສັນ


ຊຸບເປີໄຕ້ຝຸ່ນມັງຄຸດຖືເປັນພາຍຸໝຸນກໍ່ໂຕໃນມະຫາສະໝຸດປາຊິຟິກທີ່ມີຄວາມໄວລົມສູງສຸດໃນປີນີ້ ມີກໍາລັງລົມຮຸນແຮງ ແລະ ຂະໜາດທີ່ໃຫຍ່ກວ່າເຮີລິເຄນ “ຟໍເຣນຊ” ທີ່ກໍ່ໂຕໃນມະຫາສະໝຸດແອດແລນຕິກ ແລະ ກໍາລັງສ້າງຄວາມເສຍຫາຍໃຫ້ກັບເຂດແຄມຝັ່ງທາງຕາເວັນອອກຂອງສະຫະລັດ ທັງນີ້ ລັດຖະບານຟິລິບປິນອອກປະກາດເຕືອນໄພສະພາບອາກາດໂຫດຮ້າຍຄວບຄຸມເກືອບທຸກແຂວງເທິງເກາະລູຊອນ ລວມເຖິງນະຄອນມະນິລາ ເຊິ່ງມີການປະເມີນປະຊາຊົນປະມານ 10 ລ້ານຄົນຈະໄດ້ຮັບຜົນກະທົບໂດຍກົງຈາກອິກທິພົນຂອງພາຍຸໜ່ວຍນີ້ ໂດຍເກືອບເຄິ່ງໜຶ່ງຈະໄດ້ຮັບຜົນກະທົບໂດຍກົງ ແລະ ສ່ວນໃຫຍ່ເປັນປະຊາຊົນເຊິ່ງອາໄສຢູ່ເຂດຊົນນະບົດ


ດ້ານທາງການແຂວງຄາກາຢັນຈັດກຽມສູນພັກພິງຊົ່ວຄາວໄວ້ປະມານ 500 ແຫ່ງ ແລະ ໄດ້ມີການອົບພະຍົບປະຊາຊົນແລ້ວບໍ່ຕໍ່າກວ່າ 36,000 ຄົນຢ່າງໃດກໍ່ຕາມ ທ່ານມານູແອລ ມັມບາ ເຈົ້າແຂວງ ແຂວງຄາກາຢັນ ຍອມຮັບວ່າມີປະຊາຊົນບາງສ່ວນປະຕິເສດອົບພະຍົບ ເນື່ອງຈາກເປັນຫ່ວງພື້ນທີ່ກະສິກຳຂອງຕົນ ແລະສັດທີ່ລ້ຽງໄວ້ ເຊິ່ງເຈົ້າໜ້າທີ່ມີຄວາມເຂົ້າໃຈແຕ່ຂໍຄວາມຮ່ວມມືໃຫ້ຜູ້ສະມັກໃຈບໍ່ຍອມອົບພະຍົບອາໄສຢູາໃນພາຍໃນອາຄານໃຫ້ຫຼາຍທີ່ສຸດເທົ່າທີ່ຈະເປັນໄປໄດ້ ຂະນະທີ່ທໍານຽບປະທານາທິບໍດີຢູ່ນະຄອນມະນິລາຢືນຢັນຄວາມພ້ອມຮັບມືພາຍຸໜ່ວຍນີ້ຢ່າງເຕັມທີ່ ເນື່ອງຈາກມີການ “ຖອດຖອນບົດຮຽນ” ຈາກຊຸບເປີໄຕ້ຝຸ່ນ “ໄຫ່ຍ່ຽນ” ທີ່ພັດຜ່ານພາກກາງຂອງປະເທດເມື່ອເດືອນພະຈິກ 2013 ແລະ ຂ້າຊີວິດຫຼາຍກວ່າ 7,000 ຄົນ


ຊຸບເປີໄຕ້ຝຸ່ນມັງຄຸດເຊິ່ງຖືເປັນພາຍຸທີ່ພັດຜ່ານຟິລິປິນໜ່ວຍທີ່ 15 ໃນປີນີ້ ຈະເດີນທາງມຸ່ງໜ້າຕໍ່ໄປຍັງເກາະຮ່ອງກົງ ໂດຍອາດຜ່ານພື້ນທີ່ບາງສ່ວນທາງຕອນໃຕ້ຂອງຈີນເຊິ່ງເປັນໜຶ່ງໃນບໍລິເວນທີ່ມີປະຊາກອນອາໄສຢູ່ໜາແຫນ້ນ ແລະ ພາກເໜືອຂອງຫວຽດນາມອີກດ້ວຍ ມີລາຍງານວ່າທາງການຮ່ອງກົງ ແລະ ມົນທົນກວາງຕຸ້ງຂອງຈີນເລີ່ມປະກາດເຕືອນໄພປະຊາຊົນເລື່ອງການພັດຜ່ານຂອງພາຍຸໜ່ວຍນີ້ແລ້ວ

Be the first to comment

Leave a Reply

Your email address will not be published.


*