ຕັດສິນປະຫານຊີວິດ ຜູ້ຄ້າຢາເສບຕິດ

ທ້າວ ໄມອ່ອນ ອາຍຸ 58 ປີ ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ຈໍາເລີຍຄ້າ-ຂາຍຢາເສບຕິດ ເຮໂຣອິນ 21 ແທ່ງ ແລະ ທຳມິດສະຈານຖືກຄະນະ ສານອາຍາສານປະຊາຊົນຂັ້ນຕົ້ນນະຄອນຫຼວງວຽງຈັນ ຕັດສິນລົງໂທດປະຫານຊິວິດ ໃນວັນທີ 16 ສິງຫາ 2018 ພ້ອມນີ້ກໍຕັດສິນ ຈໍາເລີຍ 2 ຊື່ ນາງ ຈັນໄດ ຫຼື ຫຼ້າ ອາຍຸ 33 ປີ ຢູ່ ບ້ານຫຼັກ 12 ເມືອງໂພນທອງ ແຂວງຈໍາປາສັກ ຈໍາຄຸກ 1 ປີ ສະຖານທໍາມິດສະຈານ.

ໃນຫ້ອງປະຊຸມສານ ທ້າວ ໄມອ່ອນ ຮັບສາລະພາບຕາມການຖະແຫຼ່ງຂ່າວຂອງໄອຍະການປະຊາຊົນ ນະຄອຫຼວງ ວຽງຈັນ ວ່າ: ໃນວັນທີ 13 ມີນາ 2016, ຈໍາເລີຍ ໄດ້ຕິດຕໍ່ພົວພັນຊື້່ຢາເຮໂຣອິນນໍາ ທ້າວ ອາເກີ້ ຢູ່ແຂວງທ່າຂີ້ເຫຼັກ ປະເທດພະມ້າ ຈໍານວນ 21 ແທ່ງ. ຈາກນັ້ນ, ຈໍາເລີຍໄດ້ນໍາເອົາເຮໂຣອິນດັ່ງກ່າວໄປຂາຍໃຫ້ກັບທ້າວ ອາເຢັ້ງ ສັນຊາດຈີນ ເມື່ອຕົກລົງກັນແລ້ວ ຈໍາເລີຍກໍຂັບຂີ່ລົດຈິບເລັກຊັດສີດໍາ ໝາຍເລກທະບຽນ ຄວ 7979 ກໍາແພງນະຄອນ ມາແຕ່ແຂວງຈຳປາສັກ ແລ້ວມາພັກເຊົາຢູ່ບ້ານໜອງບົວທອງ ເມືອງສີໂຄດຕະບອງ ນະຄອນຫຼວງວຽງຈັນ. ມາວັນ ທີ 14 ມີນາ 2017 ຈຳເລີຍໄດ້ໂທລະສັບຫາ ທ້າວ ອາເຢັ້ງ ເພື່ອນັດເບິ່ງເງິນທີ່ຈະຊື້ເຮໂຣອິນ ຢູ່ຄິວລົດໂດຍສານສາຍໃຕ້. ພາຍຫຼັງເຫັນເງິນແລ້ວຈຳເລີຍ ໄດ້ໂທລະສັບຫາທ້າວ ອາເກີ້ ເພື່ອເອົາເຮໂຣອິນ ຈຳນວນ 21 ແທ່ງ ມາສົ່ງໃຫ້ຢູ່ທາງ 450 ປີ ພາຍຫຼັງໄດ້ເຮໂຣອິນ ກໍນຳເອົາໄປຊຸກເຊື່ອງຢູ່ບ່ອນພັກເຊົາ. ມາວັນທີ 16 ມີນາ 2017 ຈຳເລີຍ ພ້ອມກັບ ນາງ ຈັນໄດ ໄດ້ຂີ່ລົດເລັກຊັດໄດ້ນຳເອົາເຮໂຣອິນຈຳນວນດັ່ງກ່າວໄປ ສົ່ງໃຫ້ ທ້າວ ອາເຢັ້ງ ຢູ່ບ້ານນາສ້າງໄພ ເມືອງໄຊເສດຖາ ນະຄອນຫຼວງວຽງຈັນ ແຕ່ຖືກເຈົ້າໜ້າທີ່ ປກສ ຈັບຕົວພ້ອມຂອງກາງເຮໂຣອິນ ຈຳນວນ 21 ແທ່ງ, ຄາລົດເລັກຊັດດັ່ງກ່າວ.

ຈຳເລີຍ ຍັງໄດ້ຍອມຮັບວ່າ ໄດ້ມີການພົວພັນກັນແບບຊູ້ສາວກັບ ນາງ ຈັນໄດ; ເຊິ່ງໃນວັນທີ 14 ມີນາ 2017 ຈຳ ເລີຍ ໄດ້ໄປຮັບເອົານາງ ຈັນໄດ ຢູ່ແຂວງຈຳປາສັກ ແລ້ວພາກັນໄປນອນຢູ່ບ້ານພັກແຫ່ງໜຶ່ງທີ່ບ້ານໜອງບົວທອງ ເມືອງສີໂຄດຕະບອງ. ວັນຕໍ່ມາ, ໄດ້ພານາງ ຈັນໄດ ໄປສົ່ງເຮໂຣອິນນໍາ ແລະ ຖືກເຈົ້າໜ້າທີ່ຈັບຕົວພ້ອມກັນ.

ຜ່ານການຄົ້ນຄວ້າບັນດາຂໍ້ມູນຫຼັກຖານ ແລະ ເອກະສານຕ່າງໆທີ່ມີຢູ່ໃນສຳນວນຄະດີຢ່າງລະອຽດຖີ່ຖ້ວນຮອບດ້ານ ແລະ ພາວະວິໄສ ແລ້ວເຫັນວ່າມີຫຼັກຖານຮັດກຸມໜັກແໜ້ນ ແລະ ພຽງພໍຢັ້ງຢືນວ່າ ການກະທຳຂອງທ້າວ ໄມອ່ອນ (ຈຳເລີຍ 1) ເປັານການກະທຳຜິດທາງອາຍາໃນສະຖານຄ້າ-ຂາຍຢາເສບຕິດ (ເຮໂຣອິນ) ຕາມມາດຕາ 146 ຂໍ້ 2 ວັກ 4 ໄດ້ລະບຸວ່າບຸກຄົນຜູ້ໃດຫາກຜະລິດ, ປຸງແຕ່ງ, ມີໄວ້ໃນຄອບຄອງ, ຄ້າຂາຍ, ຈຳໜ່າຍ, ນຳເຂົ້າ, ສົ່ງອອກ, ຂົນສົ່ງ ຫຼື ນຳຢາອີ, ຢາບ້າ ຫຼື ວັດຖຸອອກລິດຕໍ່ຈິດປະສາດອື່ນໆ ຜ່ານ ສປປ ລາວ ເກີນກວ່າສາມກິໂລກຼາມຂຶ້ນໄປຈະ ຖືກລົງໂທດປະຫານຊີວິດ ແລະ ການກະທຳມິດສະຈານຕາມກົດໝາຍອາຍາ 126 ສະບັບປັບປຸງປີ 2005. ດ້ວຍ ເຫດນີ້, ຄະນະສານອາຍາສານປະຊາຊົນຂັ້ນຕົ້ນ ນະຄອນຫຼວງວຽງຈັນ ຈຶ່ງໄດ້ຕັດສິນປະຫານຊີວິດ ທ້າວ ໄມອ່ອນ ໃນ ສະຖານຄ້າຂາຍຢາເສບຕິດ (ເຮໂຣອິນ); ລົງໂທດສະຖານທໍາມິດສະຖານ ຈຳຄຸກ 1 ປີ ແຕ່ເຫັນວ່າ ຖືກໂທດປະຫານຊີວິດແລ້ວ ໂທດການທຳມິດສະຈານ ຈຶ່ງບໍ່ນຳຂຶ້ນມາປະຕິບັດຕື່ມອີກ.

ສ່ວນການກະທຳຂອງນາງ ຈັນໄດ (ຈຳເລີຍ 2) ເປັນການກະທຳຜິດທາງອາຍາໃນສະຖານການທຳມິດຈະສານ ທີ່ແຕະຕ້ອງເຖິງສາຍຜົວ-ເມຍ; ຄອບຄົວ, ປະເພນີ ແລະ ຄວາມເປັນລະບຽບຮຽບຮ້ອຍຂອງສັງຄົມ. ດ້ວຍເຫດນີ້, ຄະນະສານອາຍາສານປະຊາຊົນຂັ້ນຕົ້ນນະຄອນຫຼວງວຽງຈັນ ຈຶ່ງຕັດອິດສະລະພາບນາງ ຈັນໄດ 1 ປີ ພ້ອມປັບໃໝ 5.000.000 ກີບ ໃນສະຖານທຳມິດສະຈານ.

ຂໍຂອບໃຈຫນັງສືພິມຄວາມສະຫງົບ

Be the first to comment

Leave a Reply

Your email address will not be published.


*