ເກົາຫຼີເຫນືອໂວຍເລຂາ UN ເຊຍຂວ້ຳບາດ “ເອົາໃຈ” ອາເມລິກາ

ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດອາເມລິກາ ເມື່ອວັນທີ່ 10 ສິງຫາວ່າ ສຳນັກງານຄະນະຜູ້ແທນຖາວອນຂອງເກົາຫຼີເຫນືອປະຈຳສະຫະປະຊາຊາດ (ຢູເອັນ) ອອກຖະແຫຼງການເມື່ອວັນສຸກ ວ່າທ່ານອັນໂຕນິໂອ ກູເຕີເຣສ ເລຂາທິການຢູເອັນ ຄວນເປັນຜູ້ນຳໃນການຂັບເຄື່ອນນະໂຍບາຍ “ທີ່ເປັນປະໂຫຍດ” ເພື່ອການຮັກສາສັນຕິພາບແລະຄວາມຫມັ້ນຄົງເທີງຄາບສະຫມຸດເກົາຫຼີ ຫຼາຍກວ່າການກ່າວຊ້ຳແລ້ວຊ້ຳເລົ່າເລື່ອງການຮັກສາມາດຕະການຂວ້ຳບາດ “ເພື່ອເອົາໃຈບາງປະເທດ”

ຂະນະດຽວກັນ ຖະແຫຼງການຂອງລັດຖະບານປຽງຢາງຍັງວິຈານຖ້ອຍຖະແຫຼງຂອງດູເຕີເຣສວ່າ “ຂາດວິຈາລະຍານ” ດ້ວຍການກ່າວວ່າເກົາຫຼີເຫນືອສາມາດເປັນ “ສະມາຊິກປົກກະຕິ” ຂອງປະຊາຄົມໂລກໄດ້ ເມື່ອຂະບວນການປົດອາວຸດນິວເຄຼຍເປັນໄປຢ່າງສົມບູນ ພິສູດໄດ້ ແລະບໍ່ສາມາດຍ້ອນກັບໄປສູ່ຈຸດເດີມໄດ້ ທັງນີ້ ນັບຕັ້ງແຕ່ຜ່ານພົ້ນການພົບຫາລືຄັ້ງປະຫວັດສາດລະຫວ່າງປະທານາທິບໍດີໂດນັລ ທຣັມ ຜູ້ນຳອາເມລິກາ ກັບທ່ານຄິມ ຈອງ-ອຶນ ຜູ້ນຳສູງສຸດຂອງເກົາຫຼີເຫນືອທີ່ສິງກະໂປ ເມື່ອວັນທີ່ 12 ມິງຖຸນາທີ່ຜ່ານມາ ລັດຖະບານວໍຊິງຕັນເດີນຫນ້າກົດດັນຢ່າງຕໍ່ເນື່ອງ ໃຫ້ລັດຖະບານປຽງຢາງມີຄວາມຊັດເຈນໃນການຢຸດໂຄງການນິວເຄຼຍເປັນການຖາວອນ


ຢ່າງໃດກໍ່ຕາມ ເປັນທີ່ຫນ້າສັງເກດເຊັ່ນກັນວ່າ ເກົາຫຼີເຫນືອຍັງບໍ່ສະແດງປະຕິກິລິຍາຕໍ່ລາຍງານໂດຍຄະນະເຮັດວຽກກວດສອບພາຍນອກຂອງຢູເອັນ ຊື່ງເປີດເຜີຍເມື່ອອາທິດທີ່ຜ່ານມາ ວ່າລັດຖະບານປຽງຢາງຍັງຄົງດຳເນີນການພັດທະນາໂຄງການດ້ານອາວຸດຂອງໂຕເອງ

ໃນອີກດ້ານຫນື່ງ ຫນັງສືພິມອາຊາຮີຂອງຍີ່ປຸ່ນລາຍງານໂດຍອ້າງແຫຼ່ງຂ່າວໃນລັດຖະບານວ່າ ເກົາຫຼີເຫນືອຄວບຄຸມພົນລະເມືອງຍີ່ປຸ່ນຄົນຫນື່ງເອົາໄວ້ເມື່ອບໍ່ດົນມານີ້ ຖານຕ້ອງສົງໃສເປັນສາຍລັບ ທັງນີ້ ລັດຖະບານໂຕກຽວບໍ່ເຄີຍປະກາດຢ່າງຊັດເຈນໃນການຫ້າມພົນລະເມືອງຢ້ຽມຢາມເກົາຫຼີເຫນືອ ແຕ່ອອກ ຄຳເຕືອນ ໃຫ້ປະຊາຊົນຫຼີກລ້ຽງການຢ້ຽມຢາມເກົາຫຼີເຫນືອໃນຊ່ວງທີ່ປະເທດດັ່ງກ່າວຍັງຄົງຖືກຂວ້ຳບາດຈາກປະຊາຄົມໂລກ

Be the first to comment

Leave a Reply

Your email address will not be published.


*