ປກສ ແຂວງອຸດົມໄຊ ກວດກາພົບເຫັນຄົນຕ່າງປະເທດລັກລອບດໍາເນີນທຸລະກິດ (ຊື້-ຂາຍຫຸ້ນອອນລາຍ) ບໍ່ຖືກຕ້ອງ.

ຫຼາຍເຫດການ ຫຼາຍເລື່ອງລາວທີ່ເກີດຂື້ນ ແລະ ການນຳສະເໜີຜ່ານສື່ຕ່າງໆໃຫ້ສັງຄົມໄດ້ຮັບຮູ້,ເຫັນກັນຫຼາຍເຫດການທີ່ເປັນບັນຫາປະກົດການຫຍໍ້ທໍ້ ເພື່ອພ້ອມກັນມີສະຕິປ້ອງກັນສະກັດກັ້ນ,ຕ້ານ ແລະ ແກ້ໄຂຢ່າງເປັນປົກກະຕິ ແລະ ຕໍ່ເນື່ອງ; ເຫດການຕ່າງໆຈົນກາຍເປັນການເຕືອນສະຕິ ການຍົກສູງຄວາມຮັບຜິດຊອບຂອງໝົດທຸກຄົນ,ແຕ່ບັນຫາດັ່ງກ່າວກໍ່ບໍ່ໄດ້ໄດ້ຫຼຸດລົງ ແລະ ໝົດໄປ ຍ້ອນຄວາມພະຍາຍາມດ້ວຍຫຼາຍຮູບການ,ວິທີການ ແລະ ການວາງແຜນຢ່າງລະອຽດຂອງກຸ່ມຄົນບໍ່ດີ ເພື່ອຫວັງຜົນປະໂຫຍດຂອງເຂົາ,ແຕ່ເຖິງຢ່າງໃດກໍ່ຕາມ ພັກ-ລັດລັດຖະບານ,ອົງການຈັດຕັ້ງແຕ່ລະຂັ້ນ ເວົ້າລວມ ແລະ ເວົ້າສະເພາະແມ່ນເຈົ້າໜ້າທີ່ວິຊາສະເພາະກຳລັງປ້ອງກັນຄວາມສະຫງົບພວກເຮົາ ຍາມໃດກໍຖືວຽກງານຮັບປະກັນສະຖຽນລະພາບດ້ານການເມືອງ,ຄວາມເປັນລະບຽບຮຽບຮ້ອຍ ແລະ ປອດໄພຂອງສັງຄົມຄືໜ້າທີ່ການເມືອງລະດັບແຖວໜ້າຂອງພັກ

ຖືເອົາວຽກງານການຄົ້ນຫາ,ຄົ້ນພົບ,ການກວດກາ ແລະ ແກ້ໄຂຕາມລະບຽບກົດໝາຍບ້ານເມືອງຕໍ່ຜູ້ທີ່ກໍ່ການກະທຳຜິດ ເຄື່ອນໄຫວບໍ່ຖືກຕ້ອງຕາມທີ່ໄດ້ກຳນົດໄວ້ໃນລະບຽບກົດໝາຍ ດັ່ງລາຍຄະດີທີ່ເຈົ້າໜ້າທີ່ກອງບັນຊາການ ປກສ ແຂວງອຸດົມໄຊ ໄດ້ສະແດງຕົວເຂົ້າກວດກາ ແລະ ກວດຄົ້ນເຄຫາສະຖານ(ບ່ອນພັກເຊົ່າ)ຂອງເຂົາເຈົ້າ ໃນວັນທີ 3 ສິງຫາ 2018 ,ຢູ່ທີເຮືອນໃຫ້ເຊົ່າ ຕັ້ງຢູ່ບ້ານນາຫວານນ້ອຍ ເທດສະບານແຂວງອຸດົມໄຊ ໂດຍປະຕິບັດຕາມກົດໝາຍວ່າດ້ວຍກຳລັງປ້ອງກັນຄວາມສະຫງົບ ປະຊາຊົນສະບັບປັບປຸງປີ 2017,ກົດໝາຍວ່າດ້ວຍການເຂົ້າ-ອອກ ແລະ ການຄຸ້ມຄອງຄົນຕ່າງປະເທດຢູ່ ສປປ ລາວ ປີ 2014 ຜ່ານການກວດກາ,ກວດຄົ້ນ,ສອບປາກຄຳ ພ້ອມເຄື່ອງຂອງກາງຂອງເຈົ້າໜ້າທີ່ທີ່ກຽ່ວຂ້ອງໃນເບື້ອງຕົ້ນເຫັນວ່າຂໍ້ມູນຫຼັກຖານ ບວກກັບຄຳໃຫ້ການຍັງບໍ່ທັນລະອຽດຈະແຈ້ງ ແລະ ໜ້າສົງໄສ ທາງເຈົ້າໜ້າທີ່ວິຊາສະເພາະຈຶງໄດ້ກັກຕົວ ພ້ອມທັງຍຶດອຸປະກອນ ແລະ ພາຫະນະຫຼາຍລາຍການທີ່ພົວພັນເຖິງການເຄື່ອນໄຫວດຳເນີນກິດຈະການຄັ້ງນີ້ໄວ້ ເພື່ອດຳເນີນການສືບສວນ-ສອບສວນຢ່າງລະອຽດຈະແຈ້ງ ແລະ ເຂັ້ມງວດຕື່ມອີກ.


ສະຫາຍ ພັຕ ແສງອຸດົມ ຢຸດໜົງຄຸນ ຫົວໜ້າພະແນກຄຸ້ມຄອງຄົນຕ່າງປະເທດ(ຄຕທ) ປກສ ແຂວງອຸດົມໄຊ ໄດ້ໃຫ້ຮູ້ວ່າ: ຕໍ່ຄົນສັນຊາດຈີນທີ່ມາພັກເຊົ່າ ແລະ ມີການຕິດຕັ້ງເຄື່ອງລະບົບຄອມພິວເຕີ ທີ່ເຈົ້າໜ້າທີ່ທີ່ກຽ່ວຂ້ອງໄດ້ມາກວດກາ-ກວດຄົ້ນໃນຄັ້ງນີ້ ເນື່ອງຈາກວ່າພວກກຽ່ວບໍ່ໃຫ້ການຮ່ວມມືກັບອຳນາດການປົກຄອງອົງການຈັດຕັ້ງບ້ານ ແລະ ພາກສ່ວນອື່ນໆ(ບໍ່ອະນຸຍາດໃຫ້ເຂົ້າໄປໃນເຮືອນ)ເວລາມາພົວພັນເຮັດວຽກນຳຫຼາຍຄັ້ງ ນອກນັ້ນຍັງມີພຶດຕິກຳທີ່ຕ້ອງສົງໄສຄື: ມີການຕິດຕັ້ງກ້ອງວົງຈອນປິດອອ້ມເຮືອນ(ຈຸດພັກເຊົ່າ),ນຳເຂົ້າສົ່ງອອກ,ປຽ່ນຖ່າຍ ລະບົບເຄື່ອງເອເລັກໂທຣນິກ-ການສື່ສານເປັນຕົ້ນ ແມ່ນລະບົບເຄື່ອງຄອມພິວເຕີ,ໂທລະສັບ,ສາຍໄຟຟ້າ ແລະ ອື່ນໆ ທີ່ມີລັກສະນະປິດໆບັງໆ ມາຕະຫຼອດ ດັ່ງນັ້ນຈຶ່ງໄດ້ປະສານສົມທົບກັບກັບທຸກພາກສ່ວນເຂົ້າກວດຄົ້ນຈຸດດັ່ງກ່າວສາມາດກັກຕົວໄດ້ທັງໝົດຈຳນວນ 11 ຄົນ,ຍິງ 02 ຄົນ (ເປັນຄົນສັນຊາດຈີນ) ໃນນັ້ນນຳພາຄະນະທີມງານໂດຍແມ່ນ ທ. ເຊິນມາຍ ອາຍຸ 26 ປີ ສັນຊາດຈີນ ເຜົ່າຫ້ານ ອາຊີບນັກທຸລະກິດ ຢູ່ບ້ານ ແລະ ເມືອງເປິງປູ ແຂວງອານຮຸຍ ປະເທດ ສປຈີນ,ເຄື່ອງຂອງກາງມີຄອມພິວເຕີຕັ້ງໂຕະ ຈຳນວນ 14 ຊຸດ,ຈໍຄອມພິວເຕີ ຈຳນວນ 06 ເຄື່ອງ,ຮາດດິດ 06 ອັນ, ບັດATM ຈຳນວນ 37 ບັດ,ບັດປະຈຳຕົວ 13 ບັດ,ໂທລະສັບມືຖື ຈຳນວນ 110 ໜ່ວຍ,ພັດສະປອດ 10 ຫົວ,ປື້ມຜ່ານແດນ 03 ຫົວ,ໃບຂັບຂີ່ 03 ໃບ,ຄີບອດຄອມພິວເຕີ 04 ອັນ,USB 02 ອັນ,ກ້ອງບັນທຶກຂະໜາດນ້ອຍ 03 ເຄື່ອງ,ເງິນກີບຈຳນວນ 6.905.000 ກີບ, ເງິນຢວນ 1.980 ຢວນ,ເງິນດອນລາ 52 ດອນລາ ແລະ ເງິນມາເລເຊຍ 53 ຣິງກິດ.

ຜ່ານການສອບສວນຂອງເຈົ້າໜ້າທີ່ ທ.ເຊິນມາຍ ໄດ້ໃຫ້ການຮັບສາລະພາບວ່າ ໃນເດືອນ ທັນວາ 2017 ໄດ້ມີ ທ. ຫວ່າງ ຍີຄຸນ(ບໍ່ຊາບທີຢູ່ລະອຽດ)ໄດ້ຕິດຕໍ່ຫາພວກກຽ່ວທາງໂທລະສັບ(VZ)ແລ້ວກໍ່ນັດພົບກັນຢູ່ທີເມືອງຊຽງໄຮ ນະຄອນຊຽງໄຮ ສປ ຈີນ ໃນນັ້ນໄດ້ປຶກສາກັນເລື່ອງການລົງທຶນເຮັດທຸລະກິດການບໍລິການ ຊື້-ຂາຍ ຫຸ້ນຢູ່ຕ່າງປະເທດ( ສ ປປ ລາວ ) ເພາະວ່າຢູ່ລາວແມ່ນຈະໃຊ້ສິນເປື່ອງນ້ອຍບໍ່ຄືຢູ່ ສປ ຈີນ ແລະ ຈະໄດ້ເງິນເດືອນລະ 13.000 ຢວນ ຈາກນັ້ນກໍ່ໄດ້ຊອກຫາໝູ່ຄູ່ອີກ 02 ຄົນຊື່ ທ. ລິວຄຸນ ແລະ ເຄືອ ວັນຈື ,ຮອດວັນທີ 30 ພຶດສະພາ 2018 ພວກຕົນໄດ້ເຂົ້າມາລາວ ນຳໃຊ້ໜັງສືຜ່ານແດນ ເຂົ້າດ່ານບໍ່ເຕນ ແຂວງຫຼວງນໍ້າທາ ຈາກນັ້ນໄດ້ນັດພົບກັບ ທ. ຫວ່າງ ຍີຄຸນ ຢູ່ຈຸດນັດໝາຍຢູ່ທີສາມຫຼຽມທອງຄຳ ແຂວງບໍ່ແກ້ວ ແລະ ຢູ່ໄດ້ 07 ວັນແຕ່ຊອກຈຸດພັກເຊົ່າບໍ່ໄດ້ ,ທ. ຫວ່າງ ຍີຄຸນ ກໍ່ໄດ້ສືບຕໍ່ພົວພັນຫາຄົນຮູ້ຈັກ ຊື່: ທ. ເຕີເກົ່າ ລາວຈາງ(ຄຳແພງ) ເປັນຄົນລາວຢູ່ແຂວງອຸດົມໄຊ ພາຍຫຼັງ ທ.ເຕີເກົ່າ ລາວຈາງ(ຄຳແພງ) ແລະ ທ. ຫວ່າງ ຍີຄຸນ ຊອກເຊົ່າສະຖານທີ່ ເຮືອນຂອງ ປະຊາຊົນຢູ່ບ້ານນາຫວານນ້ອຍ ເມືອງໄຊ ແຂວງອຸດົມໄຊ ກຳນົດເຊົ່າ 01 ປີ ລາຄ່າຕາມບົດບັນທຶກສັນຍາແມ່ນ 30.000 ຢວນ ສະກຸນເງິນຈີນ ແລະ ຕົກລົງສຳລະເປັນສອງໄລຍະ(6ເດືອນຕໍ່ເທື່ອ) ໂດຍແມ່ນ ທ. ເຊິນມາຍເປັນຜູ້ເຊັນບົດບັນທຶກ, ການປະກອນເອກະສານໃນການດຳເນີນທຸລະກິດແມ່ນ ທ. ເຕີເກົ່າ(ຄຳແພງ)ເປັນຜູ້ຮັບຜິດຊອບແລ່ນ,ສ່ວນການລົງທຶນທັງໝົດແມ່ນ ທ. ຫວ່າງ ຍີຄຸນ ເປັນຜູ້ລົງທຶນ,ສ່ວນພວກກ່ຽວແມ່ນເປັນພຽງວິຊາການ ຈຸດປະສົງຂອງການດຳເນີນທຸລະກິດດັ່ງກ່າວແມ່ນເພື່ອ ຊື້-ຂາຍ ຫຸ້ນ ຜ່ານລະບົບອອນລ່າຍ,ນອກຈາກນັ້ນພວກກຽ່ວແມ່ນບໍ່ຮັບຮູ້ຫຍັງເລີຍ ຕົກມາຮອດວັນທີ 15 ມີຖຸນາ 2018 ທ. ເຊິນມາຍ ແລະ ທ. ເຕີເກົ່າ ລາວຈາງ(ຄຳແພງ)ໄດ້ໄປຮັບເອົາໝູ່ຄູ່ມາອີກ 9 ຄົນ,ຍິງ 02 ຄົນ ຢູ່ທີ່ດ່ານສາກົນບໍ່ເຕນ ແຂວງຫຼວງນໍ້າທາ ເພື່ອມາບັນຈຸຮັບຜິດຊອບແຕ່ລະໜ້າວຽກຕື່ມອີກ ມາຮອດວັນທີ 3 ສິງຫາ 2018 ກໍ່ຖືກເຈົ້າໜ້າທີ່ວິຊາສະເພາະກວດກາພົບເຫັນ ພ້ອມນຳຕົວໄປດຳເນີນການສືບສວນ-ສອບສວນ ຕາມຂັ້ນຕອນຂອງລະບຽບກົດໝາຍ; ເຈົ້າໜ້າທີ່ກຽ່ວຂ້ອງຍັງໃຫ້ຮູວ່າ: ສຳລັບຜູ້ອື່ນໆໃນຂະບວນການນີ້ຜ່ານການສືບສວນ-ສອບສວນ ແລະ ຄຳຮັບສາລະພາບແມ່ນກົງກັນກັບຄຳຮັບສາລະພາບຂອງ ທ. ເຊິນ ມາຍ, ສ່ວນ ທ. ຫວ່າງ ຍີຄຸນ ແມ່ນໄດ້ເອົາຕົວຫຼົບໜີ .

ທ່ານ ປທ ຄຳພູ ມະນີວັນ ພະນັກງານວິຊາການຂະແໜ່ງICTພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງອຸດົມໄຊ ໄດ້ໃຫ້ຮູ້ອີກວ່າ: ຜ່ານການກວດກາເກັບກໍາຂໍ້ມູນໃນເບື້ອງຕົ້ນໄດ້ພົບເຫັນກຸ່ມຄົນດັ່ງກ່າວ ເຊິ່ງຕັ້ງກຸ່ມທີ່ເອີ້ນວ່າ “ກຸ່ມປັ່ນຕະຫຼາດຫຸ້ນ ຫຼື ນັກປັ່ນປ່ວນຕະຫຼາດຫຸ້ນ”; ເຊິ່ງສະແດງອອກ ກ່ອນເປີດຕະຫຼາດຫຸ້ນອອນລາຍຂອງປະເທດຈີນໃນແຕ່ລະວັນ ທີມງານຈະມີການປະຊຸມກັນເພື່ອຮັບຄຳສັ່ງຈາກບັນດານາຍທຶນໃຫ້ທຸກຄົນຈັບຕາໄປທີ່ຫຸ້ນໃດໜື່ງ ແລ້ວໃຫ້ເຈາະເຂົ້າໄປທຳການສັ່ງຊື້ຫຸ້ນ ໂດຍແຕ່ລະຄົນຈະໃຊ້ໂທລະສັບຫຼາຍເຄື່ອງ ພ້ອມກັບຊິມຄາດຫຼີ້ນອິນເຕີເນັດຫຼາຍອັນ ຕໍ່ ໜື່ງຄົນ ເພື່ອສັ່ງຊື້ຫຸ້ນຫຼາຍໆຄັ້ງ (ປອມຕົວເປັນຜູ້ສັ່ງຊື້ຫຸ້ນຫຼາຍໆຄົນ) ໂດຍການຊັກຊວນ ຫຼື ຫຼອກລວງໃຫ້ຄົນສັນຊາດດຽວກັນ(ຈີນ)ທີ່ຢູ່ໃນປະເທດລາວ ແລະ ປະເທດໃກ້ຄຽງ ລວມທັງຄົນໃນປະເທດຂອງເຂົາເຈົ້າ ມາລົງທຶນຫຼີ້ນຫຸ້ນ Application wechat( ແອບພລິເຄຊັນວິຊາດ) ແລະ QQ(ຄິວໆ)ແບບເປັນກຸ່ມ.ຈາກນັ້ນ,ກໍ່ຈະມີການແນະນຳການຫຼີ້ນຫຸ້ນ,ການ ຊື້-ຂາຍຫຸ້ນ ໂດຍອ້າງວ່າຈະໄດ້ຜົນກຳໄລສູງ ຈາກນັ້ນກຸ່ມຄົນດັ່ງກ່າວກໍ່ຈະທຳໂຕເປັນຂາເຊຍ ເພື່ອເຮັດໃຫ້ເຫຍື່ອຫຼົງເຊື່ອແລ້ວມາລົງທຶນ ເຊິ່ງເປັນຫຸ້ນລາຄ່າຖືກ ພ້ອມນັ້ນກໍ່ເອົາໃຈໃສ່ໃນຜັກດັນ(ປັ່ນຫຸ້ນ)ໃຫ້ມີລາຄ່າສູງຂື້ນເລື້ອຍໆ ເມື່ອໃດມີຜູ້ຄົນຫຼົງເຊື່ອເຂົ້າມາຊື້ຫຸ້ນຫຼາຍຂື້ນ ກຸ່ນຄົນເຫຼົ່ານີ້ກໍ່ຈະທໍາການຂາຍຫຸ້ນທັງໝົດຂອງຕົນທີ່ມີຢູ່ອອກບາດດຽວ ຈົນເຮັດໃຫ້ຕະຫຼາດຫຸ້ນ ແລະ ສ້າງຄວາມເສຍຫາຍໃນຕະຫຼາດຫຸ້ນເປັນຈຳນວນເງິນຢ່າງມະຫາສານ. ປະຈຸບັນບັນທາງເຈົ້າໜ້າທີ່ວິຊາສະເພາະ ແລະ ອົງການຈັດຕັ້ງທີ່ກຽ່ວຂ້ອງໄດ້ກັກຕົວທັງ 11 ຄົນ,ຍິງ 02 ຄົນ ພ້ອມເຄື່ອງຂອງກາງ ເພື່ອສືບຕໍ່ດຳເນີນການສືບສວນ-ສອບສວນ ຂະຫຍາຍຜົນເພີ່ມຕື່ມ ເປັນຕົ້ນແມ່ນບັນດາເປົ້າໝາຍອັນແທ້ຈິ່ງໃນການຕິດຕັ້ງລະບົບ ແລະ ການສ້າງກຸ່ມນີ້ຂື້ນມາ.


ເຫດການດັ່ງກ່າວນີ້,ເປັນປະກົດການຫຍໍ້ທໍ້ອີກຮູບແບບໜື່ງ ທີ່ເກີດຂື້ນໃນສັງຄົມ ເຊິ່ງໄດ້ສ້າງຄວາມປັ່ນປ່ວນລະບົບເສດຖະກິດ,ສ້າງຄວາມເສຍຫາຍໃຫ້ແກ່ລັດ,ລວມໝູ່ ແລະ ບຸກຄົນ ເວົ້າລວມ ເວົ້າສະເພາະຢູ່ໃນແຂວງອຸດົມໄຊ. ສະນັ້ນ,ຈຶງຮຽກຮ້ອງເຖິງພົນລະເມືອງລາວ,ຊາວຕ່າງປະເທດທີ່ດຳລົງຊີວິດຢູ່ໃນ ສປປ ລາວ ຢ່າໄດ້ລົງເຊື່ອ ແລະ ຈົ່ງພ້ອມກັນເປັນຫູ,ເປັນຕາ ຊ່ວຍກັນຕ້ານ ແລະ ສະກັດກັ້ນ ປະກົດການຫຍໍ້ດັ່ງກ່າວນີ້ ເພື່ອບໍ່ໃຫ້ເກີດຂື້ນຢູ່ໃນສັງຄົມອີກຕໍ່ໄປ

ພາບ-ຂ່າວ: ເຂີຍເມືອງໄຊ 5569 6654.

Be the first to comment

Leave a Reply

Your email address will not be published.


*