ລະເບີດຂ້າໂຕຕາຍໃນປາກີສຖານດັບ 85 ສົບ ເຈັບອີກກວ່າ 100 ຄົນ

ສຳນັກຂ່າວຕ່າງປະເທດລາຍງານຈາກເມືອງເຄວຕຕາ ແຂວງບາລູຈິສະຖານປະເທດປາກີສຖານເມື່ອວັນທີ່ 13 ກໍລະກົດວ່າ ທ່ານຟາອິຊ ຄາຄາຣ ເຈົ້າຫນ້າທີ່ລະດັບສູງດ້ານສາທາລະນະສຸກຂອງແຂວງບາລູຈິສຖານແຂວງທາງຕາເວັນຕົກສຽງໃຕ້ຂອງປາກີສຖານ ເປີດເຜີຍວ່າ ໂຕເລກຜູ້ເສຍຊີວິດຈາກເຫດໂຈມຕີດ້ວຍລະເບີດຂ້າໂຕຕາຍໃນເມືອງມັສຕຸງ ໃກ້ກັບເມືອງເຄວຕຕາເມືອງເອກຂອງແຂວງບາລູຈິສຖານ ເພີ່ມຂື້ນເປັນ 85 ສົບ ແລະບາດເຈັບອີກກວ່າ 100 ຄົນເມື່ອວັນສຸກທີ່ 13 ກໍລະກົດ ຊື່ງບໍ່ເທົ່າໃດຊົ່ວໂມງກ່ອນຫນ້ານີ້ກໍ່ມີເຫດໂຈມຕີດ້ວຍລະເບີດໃນລະຫວ່າງການຫາສຽງເລືອກຕັ້ງທີ່ເມືອງບັນນູທາງຕາເວັນຕົກສຽງເຫນືອຂອງປາກີສຖານມີຜູ້ເສຍຊີວິດ 4 ສົບ ແລະບາດເຈັບ 39 ຄົນ ໂດຍເປົ້າຫມາຍຄືຂະບວນຫາສຽງຂອງພັກມຸທທາຮິດາ ມາຈລິສ-ອີ-ອາມັສ (ເອັມເອັມເອ) ມີຜູ້ສະຫມັກຄືທ່ານອັຄຣາມ ຂ່ານ ດູຣຣານີ ແຕ່ລອດຊີວິດມາໄດ້ ຍັງບໍ່ມີກຸ່ມໃດອອກມາອ້າງຄວາມຮັບຜິດຊອບ


ເຫດໂຈມຕີທີ່ເກີດຂື້ນສະທ້ອນໃຫ້ເຫັນເຖີງຄວາມອ່ອນແອຂອງການຍົກລະດັບດ້ານຄວາມຫມັ້ນຄົງປອດໄພຂອງປະເທດ ກ່ອນທີ່ຈະເຖີງການເລືອກຕັ້ງທົ່ວປະເທດຂອງປາກີສຖານ ຊື່ງກຳນົດມີຂື້ນໃນວັນທີ່ 25 ກໍລະກົດນີ້  ຈາກການເປີດເຜີຍຂອງທ່ານຊາອີດ ຈາມາລີ ເຈົ້າຫນ້າທີ່ອາວຸໂສຂອງແຂວງບາລູຈິສຖານ ລະບຸວ່າ ຄົນຮ້າຍຈຸດສະນວນລະເບີດໂຈມຕີພາຍໃນບໍລິເວນຊື່ງເປັນສະຖານທີ່ຊຸມນຸມທາງການເມືອງຂອງພັກທີ່ຕັ້ງຂື້ນໃໝ່ຄືພັກຄາລູຈິສຖານ ອວາມີ(ບີເອພີ) ແລະຜູ້ສະຫມັກຊິງຕຳແຫນ່ງ ສ.ສ ຂອງແຂວງບາລູຈິສຖານຄືທ່ານຊິຣາຈ ໄຣຊານີ ໄດ້ຮັບບາດເຈັບສາຫັດ ແລະເສຍຊີວິດລະຫວ່າງນຳສົ່ງໄປໂຮງຫມໍ


ກອງທັບປາກີສຖານໄດ້ແຈ້ງເຕືອນໃຫ້ລະວັງເລື່ອງຄວາມປອດໄພກ່ອນເຖີງວັນເລືອກຕັ້ງໃນວັນທີ່ 25 ກໍລະກົດນີ້ ແລະຮັບປາກວ່າຈະເສີມກຳລັງທະຫານ 370,000 ຄົນເຮັດຫນ້າທີ່ຮັກສາຄວາມສະຫງົບຮຽບຮ້ອຍໃນວັນເລືອກຕັ້ງດ້ວຍ ຢ່າງໃດກໍ່ຕາມ ນັກວິເຄາະໄດ້ເຕືອນວ່າ ປາກີສຖານຍັງບໍ່ອາດທີ່ຈະແກ້ບັນຫາຄະຕິນິຍົມສຸດຂີດທີ່ຫຍັ່ງຮາກເລິກຕາບເທົ່າທີ່ຍັງມີກຸ່ມຕິດອາວຸດສາມາດກໍ່ເຫດຮຸນແຮງໄດ້

Be the first to comment

Leave a Reply

Your email address will not be published.


*