ສຳເລັດກອງປະຊຸມຄົບຄະນະບໍລິຫານງານພັກແຂວງ ໄຊຍະບູລີ ຄັ້ງທີ 10 ( ສະໄໝທີ VI )

ພາຍຫຼັງທີ່ໄດ້ດຳເນີນກອງປະຊຸມຄົບຄະນະບໍລິຫານງານພັກແຂວງໄຊຍະບູລີ ຄັ້ງທີ 10 ( ສະໄໝທີ VI ) ມາເປັນເວລາ 3 ວັນເຕັມ ຈິ່ງໄດ້ສຳເລັດລົງໃນຕອນບ່າຍຂອງວັນທີ 25 ພຶດສະພາ 2018 ນີ້, ທີ່ສະໂມສອນຫ້ອງວ່າການແຂວງໄຊຍະບູລີ, ໂດຍພາຍໃຕ້ການເປັນປະທານຂອງສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊຍະບູລີ, ເຂົ້າຮ່ວມເປັນກຽດໂດຍ ສະຫາຍ ດ໋ອກເຕີ ພັນຄຳ ວິພາວັນ ກຳມະການກົມການເມືອງ ສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ມີບັນດາສະຫາຍຮອງເລຂາພັກແຂວງ, ກຳມະການປະຈຳພັກແຂວງ, ມີປະທານ, ຮອງປະທານສະພາປະຊາຊົນ ແຂວງ, ມີກໍາມະການພັກແຂວງ, ເລຂາພັກເມືອງ, ມີເລຂາຄະນະພັກກອງບັນຊາການທະຫານ-ຕໍາຫຼວດ, ເລຂາຄະນະພັກຮາກຖານກອງພົນທະຫານຮາບທີII, ມີເລຂາຄະນະພັກຮາກຖານ, ເລຂາໜ່ວຍພັກພະແນກການ, ກົມກອງ, ອົງການອ້ອມຂ້າງແຂວງ ແລະ ຫົວໜ້າດ່ານສາກົນເຂົ້າຮ່ວມ 100 ກວ່າສະຫາຍ.


ກອງປະຊຸມໄດ້ຮັບຟັງການລາຍງານບົດສັງເກດຕີລາຄາຜົນຂອງການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 9 (ສະໄໝທີ VI) ແລະ ທິດທາງແຜນການໃນຕໍ່ໜ້າ, ພ້ອມທັງຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ,ມະຕິກອງປະຊຸມໃຫຍ່ ຄັ້ງທີ X ຂອງພັກແຕ່ເດືອນເມສາປີ 2015 ຫາເດືອນ ເມສາ ປີ 2018 ແລະ ທິດທາງແຜນການຈຸດດສຸມແຕ່ປີ 2018 ເຖິງປີ 2020, ຮັບຟັງບົດສະຫຼຸບລາຍງານການປູກພືດລະດູແລ້ງ, ການກະກຽມປູກພືດລະດູຝົນປະຈຳປີ 2018, ກອງປະຊຸມໄດ້ຄົ້ນຄວ້າ, ປຶກສາຫາລືແລະຕົກລົງເປັນເອກະພາບຕໍ່ກັບການຕີລາຄາຜັນຂະຫຍາຍມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 9 (ສະໄໝທີ VI)ໂດຍລວມແລ້ວ ແຂວງຂອງພວກເຮົາ ຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ລະບົບການເມືອງໄດ້ຮັບການປັບປຸງແຕ່ຂັ້ນແຂວງລົງຮອດຮາກຖານບ້ານໃຫ້ມີຄວາມເຂັ້ມແຂງ, ບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມໄດ້ແກ້ໄຂທັນສະພາບການ ເຮັດໃຫ້ທົ່ວສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂອງແຂວງໄດ້ມີການຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ ຕາມທິດສີຂຽວ-ຍືນຍົງ ສະເລ່ຍ 8,5%ຕໍ່ປີ, ລວມຍອດຜະລິດຕະພັນພາຍໃນບັນລຸໄດ້ 2.596 ໂດລາສະຫະລັດຕໍ່ຄົນ,ໂຄງປະກອບເສດຖະກິດໄດ້ມີການຫັນປ່ຽນຕາມທິດທີ່ຕັ້ງໜ້າ, ດ້ານການລົງທຶນຂອງພາກລັດ, ພາກເອກະຊົນພາຍໃນ ແລະ ຕ່າງປະເທດເຂົ້າໃນບັນດາໂຄງການກໍ່ສ້າງຕ່າງໆກໍໄດ້ຮັບການຈັດຕັ້ງປະຕິບັດສຳເລັດຕາມແຜນການ, ຖືກຕ້ອງຕາມກົດໝາຍ ແລະ ມີຄວາມໂປ່ງໃສ, ການຄຸ້ມຄ້ອງລາຄາສິນຄ້າອຸປະໂພກ-ບໍລິໂພກຢູ່ໃນເກນປົກກະຕິ, ມູນຄ່າການສົ່ງອອກສິນຄ້າມີມູນຄ່າເພີ່ມຂຶ້ນເມື່ອທຽບກັບການນຳເຂົ້າ, ການຜະລິດກະສິກຳເປັນສິນຄ້າສົ່ງອອກຕິດພັນກັບການປຸງແຕ່ງຂັ້ນຕົ້ນໄດ້ເພີ່ມຂຶ້ນທາງດ້ານປະລິມານ ແລະ ຄຸນນະພາບ, ການປູກເຂົ້າ, ພືດເປັນສິນຄ້າ, ພືດສະບຽງອາຫານກໍມີຂະບວນການຢ່າງກວ້າງຂວາງ, ການລ້ຽງສັດໄດ້ຫັນຈາກການລ້ຽງແບບທຳມະຊາດມາລ້ຽງແບບເປັນກຸ່ມເປັນຟາມ ແລະ ນຳໃຊ້ເຕັກນິກວິທະຍາສາດ,ແນວພັນໃໝ່, ສັດຕະວະແພດໄດ້ເຂົ້າຊ່ວຍຕິດພັນກັບການປູກຫຍ້າເປັນອາຫານສັດໄດ້ເພີ່ມຂຶ້ນ, ດ້ານພື້ນຖານໂຄງລ່າງກໍໄດ້ຮັບການປັບປຸງ ແລະ ຍົກລະດັບດີຂຶ້ນ, ຖະໜົນຫົນທາງແຕ່ແຂວງຫາເມືອງ, ເມືອງຫາບ້ານ, ບ້ານຕໍ່ບ້ານໄດ້ຮັບການກໍ່ສ້າງເຮັດໃຫ້ການຄົມມະນາຄົມ-ຂົນສົ່ງມີຄວາມສະດວກກ່ວາແຕ່ກ່ອນ, ປະຊາຊົນໄດ້ຊົມໃຊ້ໄຟຟ້າ, ນໍ້າປະປາ, ນໍ້າລິນ ແລະ ເຂົ້າເຖິງລະບົບໂທລະຄົມເປັນສ່ວນຫຼາຍ ແລະ ວຽກງານອື່ນກໍ່ໄດ້ຮັບການພັດທະນາເປັນກ້າວໆ.


ໂອກາດດັ່ງກ່າວ ສະຫາຍ ປອ ພັນຄຳ ວິພາວັນ ກຳມະການກົມການເມືອງ ສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ໄດ້ໃຫ້ກຽດໂອ້ລົມຕໍ່ກອງປະຊຸມ, ກ່ອນອື່ນ ສະຫາຍໄດ້ຍ້ອງຍໍຊົມເຊີຍຕໍ່ຜົນງານທີ່ແຂວງຍາດມາໄດ້ໃນໄລຍະ 2 ປີກວ່າ, ພ້ອມທັງໄດ້ເນັ້ນໃຫ້ຄະນະແຕ່ລະຂັ້ນຕ້ອງເອົາໃຈໃສ່ຮັກສາຄວາມສາມັກຄີ, ເສີມຂະຫຍາຍມູນເຊື້ອວັດທະນະທຳ, ຮັກສາດ້ານຄວາມສະຫງົບຮອບດ້ານຫຼີກລ່ຽງການປະທະທີ່ຮຸນແຮງ, ເອົາໃຈໃສ່ເນັ້ນປະຕິຮູບການສຶກສາໃຫ້ໄດ້ປະລິມານ ແລະ ຄຸນນະພາບ, ພ້ອມກັນສູ້ຊົນບຸກບືນແກ້ໄຂບັນຫາທີ່ຫຍຸ້ງຍາກດ້ານການເງິນໃນໄລຍະສັ້ນ ແລະ ໄລຍະຍາວ ເຮັດໃຫ້ການພັດທະນາໄປຕາມທິດຍືນຍົງ ແລະ ພ້ອມກັນນຳເອົາເນື້ອໃນຈິດໃຈມະຕິກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍໃຫ້ເກີດອດກອອກຜົນ, ພ້ອມກັນສ້າງແຂວງ ໄຊຍະບູລີ ໃຫ້ມີຄວາມຈະເລີນເທື່ອລະກ້າວ.

ແຫຼ່ງຂ່າວ: ໂດຍ: ອຸ່ນເຮືອນ ໂພທິລັກ, ຫ້ອງວ່າການ ແຂວງ ໄຊຍະບູລີ

Be the first to comment

Leave a Reply

Your email address will not be published.


*