ຮາວາຍເລັ່ງປ້ອງກັນໂຮງໄຟຟ້າຈາກລາວາພູເຂົາໄຟ

ສຳນັກຂ່າວຕ່າງປະເທດລາຍງານຈາກເມືອງໂຮໂນລູລູ ປະເທດສະຫະລັດ ອາເມລິກາ ເມື່ອວັນທີ່ 22 ພຶດສະພາວ່າ ສຳນັກງານປ້ອງກັນໄພພົນລະເຮືອນເຂດຮາວາຍອອກຖະແຫຼງການເມື່ອວັນອັງຄານວ່າເຈົ້າໜ້າທີ່ຂອງໂຮງໄຟຟ້າພະລັງງານຄວາມຮ້ອນໃຕ້ພິພົບປູນາທາງຕາເວັນອອກຂອງເກາະໃຫຍ່ຮາວາຍ ໃກ້ກັບພູເຂົາໄຟຄິລາເວທີ່ປະທຸຢ່າງຮຸນແຮງຕັ້ງແຕ່ຊ່ວງຕົ້ນເດືອນນີ້ ກຳລັງເລັ່ງປິດບໍ່ນ້ຳແຫຼ່ງພະລັງງານຄວາມຮ້ອນ 3 ແຫ່ງສຸດທ້າຍ ເພື່ອຫຼຸດຄວາມສ່ຽງຂອງການເປັນແຫຼ່ງປ່ອຍກ໊າສພິດ ໃນກໍລະນີທີ່ລາວາໄຫຼເຂົ້າສູ່ພື້ນທີ່ ແລະ ເຮັດປະຕິກິລິຍາກັບແຫຼ່ງນ້ຳຮ້ອນສຳລັບໃຊ້ຜະລິດກະແສໄຟຟ້າ


ຢ່າງໃດກໍ່ຕາມ ໜຶ່ງໃນສາງຂອງໂຮງງານໄຟຟ້າໄດ້ຮັບຄວາມເສຍຫາຍຈາກລາວາ ເຊິ່ງໄຫຼເຂົ້າສູ່ພື້ນທີ່ຮອບນອກຂອງໂຮງໄຟຟ້າມີອະນາເຂດ 3,26 ກິໂລຕາແມັດ ເມື່ອຄືນວັນຈັນທີ່ຜ່ານມາ ໂດຍໂຮງໄຟຟ້າປູນາທີ່ຈຳເປັນຕ້ອງປິດໃຫ້ບໍລິການເມື່ອຕົ້ນເດືອນນີ້ເພື່ອຄວາມປອດໄພ ຜະລິດກະແສໄຟຟ້າຄິດເປັນສັດສ່ວນ 25% ຂອງປະລິມານກະແສໄຟຟ້າໃຊ້ເທິງເກາະຮາວາຍ ເຊິ່ງເປັນເກາະໃຫຍ່ທີ່ສຸດໃນບັນດາ 8 ເກາະຂອງລັດຮາວາຍ ນອກຈາກນີ້ ກ່ອນໜ້ານີ້ພຽງບໍ່ເທົ່າໃດມື້ ການທີ່ລາວາເລີ່ມໄຫຼຂ້າມທາງຫຼວງສາຍຫຼັກໝາຍເລກ 137 ລົງມາສູ່ມະຫາສະໝຸດປາຊິຟິກ ສົ່ງຜົນໃຫ້ເຈົ້າໜ້າທີ່ເຕືອນໄພໃຫ້ປະຊາຊົນໃຫ້ລະມັດລະວັງໝອກຄວັນພິດທີ່ເຕັມໄປດ້ວຍກົດໄຮໂດຄລໍລິດ ແລະ ອະນຸພາກແກ້ວຂະໜາດນ້ອຍ ເຊິ່ງເປັນປະຕິກິລິຍາລະຫວ່າງລາວາກັບນ້ຳທະເລ ຫາກສູດດົມຫຼືສຳພັດພຽງເລັກນ້ອຍກໍ່ອາດຈະເປັນອັນຕະລາຍຕໍ່ກັບລະບົບຫາຍໃຈ ປະສາດຕາ ແລະ ຜິວໜັງ


ຂະນະທີ່ລາຍງານຂອງສຳນັກຂ່າວສັງເກດການພູເຂົາໄຟຮາວາຍ (ເອຊວີໂອ) ລະບຸວ່າພູເຂົາໄຟຄິລາເວເກີດການລະເບີດບໍລິເວນສ່ວນຈອມຄັ້ງໃໝ່ ເມື່ອຊ່ວງເຊົ້າມືດຂອງວັນອັງຄານເວລາທ້ອງຖິ່ນ ຈຶ່ງມີການຢ້ຳເຕືອນປະຊາຊົນເຊິ່ງອາໄສຢູ່ໃຕ້ທິດທາງລົມໃຫ້ລະວັງອັນຕະລາຍຈາກກຸ່ມຄວັນພິດ ແລະ ເຖົ້າຖ່ານທີ່ລອຍມາດ້ວຍ ທັງນີ້ມີລາຍງານວ່າບ້ານເຮືອນ ແລະ ສິ່ງປຸກສ້າງລວມເກືອບ 50 ແຫ່ງໄດ້ຮັບຄວາມເສຍຫາຍຈາກລາວາພູເຂົາໄຟ ແລະ ປະຊາຊົນເກືອບ 2 000 ຄົນຕ້ອງອົບພະຍົກ ຫຼັງພູເຂົາໄຟຄິລາເວ ເຊິ່ງມີຄວາມສູງ 1,247 ແມັດ ແລະ ເປັນພູເຂົາໄຟ 1 ໃນ 5 ໜ່ວຍທີ່ຕັ້ງຢູ່ເກາະໃຫຍ່ຮາວາຍ ແລະ ເປັນໜຶ່ງໃນພູເຂົາໄຟທີ່ຊົງພະລັງທີ່ສຸດໃນໂລກໃນຕອນນີ້ດ້ວຍ ເກີດການປະທຸແຮງທີ່ສຸດໃນຮອບ 35 ປີ ຕັ້ງແຕ່ວັນທີ່ 3 ພຶດສະພາທີ່ຜ່ານມາ

Be the first to comment

Leave a Reply

Your email address will not be published.


*