ຕັດສິນຈຳຄຸກ 5 ປີ ໂທດຖານປຸ້ນຊັບພົນລະເມືອງ ແລະ ພະຍາຍາມຄາດຕະກຳ

ບັນຫາປຸ້ນຊັບພົນລະເມືອງ ເປັນໜຶ່ງໃນປະກົດການຫຍໍ້ທໍ້ທີ່ພົ້ນເດັ່ນໃນສັງຄົມ ເຮັດໃຫ້ປະຊາຊົນມີຄວາມຢ້ານກົວ ຍິ່ງຂຶ້ນໃນການດໍາລົງຊີວິດ ບໍ່ວ່າຈະຢູ່ຕົວເມືອງໃຫຍ່ ແລະ ທ້ອງຖິ່ນ, ເຊິ່ງໄລຍະຜ່ານມາ ມີຜູ້ຕົກເປັນເຫຍື່ອຈໍານວນ ບໍ່ໜ້ອຍສ້າງຄວາມເສຍຫາຍຈໍານວນຫຼາຍ ແຕ່ຜູ້ກໍ່ເຫດສ່ວນຫຼາຍກໍໜີບໍ່ພົ້ນລະບຽບກົດໝາຍ ຖືກເຈົ້າໜ້າທີ່ຈັບ ຕົວໄປສອບສວນ ສະຫຼຸບສົ່ງສໍານວນຄະດີໃຫ້ໄອຍະການສັ່ງຟ້ອງສານຕັດສິນຕາມຂັ້ນຕອນຂອງກົດໝາຍ.

ໃນວັນທີ 15 ພຶດສະພາ 2017, ຄະນະສານອາຍາ ສານປະຊາຊົນ ແຂວງອຸດົມໄຊ ໄດ້ພິຈາລະນາຕັດສິນຄະດີປຸ້ນຊັບ ພົນລະເມືອງ ແລະ ພະຍາຍາມຄາດຕະກໍາຄົນຈີນ ຢູ່ເມືອງປາກແບ່ງ ແຂວງອຸດົມໄຊ. ໃນວັນທີ 30 ເມສາ 2017, ຕາມສໍານວນຄະດີ ເລກທີ 019/ ຂຕ.ອຊ; ລົງວັນທີ 4 ພຶດສະພາ 2018 ໂດຍຈໍາເລີຍ ຊື່ ທ້າວ ລາເດັ່ນ ຫຼື ແອ່ນ້ອຍ ອາຍຸ 17 ປີ ຢູ່ບ້ານປາກແບ່ງ ເມືອງປາກແບ່ງ ແຂວງອຸດົມໄຊ ເພື່ອໃຫ້ຈໍາເລີຍຮັບຮູ້ໂທດທີ່ກໍຂຶ້ນ.

ຜ່ານການໄຕ່ສວນໃນຫ້ອງປະຊຸມສານ ທ້າວ ລາເດັ່ນ (ຈໍາເລີຍ) ສາລະພາບວ່າ: ໃນເລາ 23 ໂມງ ຂອງວັນທີ 30 ເມສາ 2017, ໄດ້ໄປຊອກຫາປຸ້ນຊັບຂອງພົນລະເມືອງຢູ່ເທດສະບານເມືອງແບ່ງ. ພໍຍ່າງໄປຮອດຮ້ານຂາຍໂທລະ ສັບຫຼັງໜຶ່ງເປັນຂອງຄົນຈີນ ຈໍາເລີຍກໍ່ປິນເຂົ້າໄປໃນຮ້ານ ແລ້ວໄດ້ເຫັນຜູ້ຍິງຄົນໜື່ງນອນຫຼັບ. ຈາກນັ້ນ, ຈໍາເລີຍ ກໍຈັບເອົາໝໍ້ໄຟທີ່ຕັ້ງຂ້າງຝາຂອງຮ້ານທັບໃສ່ຫົວເຈົ້າ ເຮັດໃຫ້ເຈົ້າຂອງຮ້ານໝົດສະຕິ ແລ້ວເອົາຜ້າຫົ່ມມາປົກໄວ້. ຈາກນັ້ນ, ຈໍາເລີຍໄດ້ໄປຈັບເອົາໂທລະສັບ ຈໍານວນ 37 ໜ່ວຍ. ໃນນັ້ນ, ຍີ່ຫໍ້ HUAWEI (ຫົວເວີຍ) ຈຳນວນ 13 ໜ່ວຍ, ບໍ່ຮູ້ຍີ່ ຫໍ້ 24 ໜ່ວຍ, ບັດເຕີມເງິນມູນຄ່າ 6.000.000 ກີບ ແລ້ວງັດຕູ້ເຊບໄດ້ເງິນ ຈໍານວນ 8.500.00 ກີບ, ປອກແຂນຄຳຈຳນວນ 1 ເສັ້ນມູນຄ່າ 7.000.000 ກີບ.

ເມື່ອຄະນະສານອາຍາຂັ້ນຕົ້ນ ແຂວງອຸດົມໄຊ ຄົ້ນຄວ້າບັນດາສໍານວນຄະດີ ແລະ ເອກະສານຕ່າງໆທີ່ປະກອບໃນ ສໍານວນຄະດີຢ່າງລະອຽດຖີ່ຖ້ວນຮອບດ້ານ ແລະ ພາວະວິໄສແລ້ວຢັ້ງຢືນ ວ່າ: ທ້າວ ລາເດັ່ນ ເປັນຜູ້ກະທໍາຜິດໃນ ມາດຕາ 118 ແລະ ມາດຕາ 88 ກົດໝາຍວ່າດ້ວຍການດໍາເນີນຄະດີອາຍາໄດ້ລະບຸວ່າ: ບຸກຄົນຜູ້ໃດຫາກໄດ້ໃຊ້ ຄວາມຮຸນແຮງບຸກລຸກ ຫຼື ໄດ້ໃຊ້ການນາບຂູ່ ໂດຍກົງຕໍ່ຊີວິດ ຫຼື ສຸຂະພາບຂອງຜູ້ອື່ນ ເພື່ອເອົາຊັບມາເປັນຂອງຕົນ ຈະຖືກລົງໂທດຕັດອິດຫຼະລະພາບ ແຕ່ສີ່ປີ ຫາ ແປດປີ ແລະ ຈະຖືກປັບໃໝ ແຕ່ 800.000 ກີບ ຫາ 8.000.000 ກີບ. ໃນກໍລະນີທີ່ຜູ້ກະທຳຜິດຫາກໄດ້ເອົາການປຸ້ນຊັບເປັນອາຈິນ. ມີການຈັດຕັ້ງເປັນກຸ່ມ, ເຮັດໃຫ້ຄົນອື່ນບາດ ເຈັບສາຫັດ ຫຼື ເສຍຊີວິດ ຫຼື ໃນກໍລະນີທີ່ມີຄວາມເສຍຫາຍຢ່າງຫຼວງຫຼາຍ ຈະຖືກລົງໂທດຕັດອິດສະຫຼະພາບ ແຕ່ ແປດປີ ຫາ ສິບຫ້າປີ ແລະ ຈະຖືກປັບໃໝ ແຕ່ 3.000.000 ກີບ ຫາ 15.000.000 ກີບ.

ດັ່ງນັ້ນ, ຄະນະສານອາຍາຕັດອິດສະຫຼະພາບ ທ້າວ ລາເດັ່ນ ຫຼື ແອນ້ອຍ ( ຈຳເລີຍ ) ໃນສະຖານມີຄວາມຜິດທາງ ອາຍາ ຂໍ້ຫາປຸ້ນຊັບຂອງພົນລະເມືອງ ແລະ ພະຍາຍາມຄາດຕະກຳຜູ້ອື່ນ ຄື: ລົງໂທດຕັດອິດສະຫຼະພາບ ທ້າວ ລາ ເດັ່ນ ໃນຖານພະຍາຍາມຄາດຕະກຳໜຶ່ງປີ ແລະ ປັບໃໝ 100.000 ກີບ; ລົງໂທດຕັດອິດສະຫຼະພາບໃນຖານປຸ້ນ ຊັບຂອງພົນລະເມືອງສີ່ປີ ແລະ ປັບໃໝ 1.000.000 ກີບ ລວມໂທດຕັດອິດສະຫຼະພາບ ທ້າວ ລາເດັ່ນ ຫຼື ທ້າວ ແອ່ນ້ອຍ (ຈຳເລີຍ) ຫ້າປີ ແລະ ປັບໃໝ 1.100.000 ກີບ; ສ່ວນຄ່າເສຍຫາຍທາງແພ່ງແມ່ນໃຫ້ ທ້າວ ລາເດັ່ນ ຮັບຜິດຊອບໃຊ້ແທນຄ່າເສຍຫາຍເປັນເງິນຈຳນວນ 3.420. 000 ກີບ, ຄ່າປິ່ນປົວສຸຂະພາບຂອງຜູ້ຖືກເສຍຫາຍ ຈຳນວນ 10.017.000 ກີບ ແລະ 77. 592,33 ຢວນ ຄືນໃຫ້ນາງ ຊື່ ຊາງເອີ ໃຫ້ຄົບຕາມຈໍານວນ.

ພາບ-ຂ່າວ: ນສພ ຄວາມສະຫງົບ

Be the first to comment

Leave a Reply

Your email address will not be published.


*